From Stage to Page - Medieval and Renaissance Drama
The York Cycle, Play 47 - Assumption and Coronation of the Virgin
001 Jesus. Myne aungellis that are bright and schene,
002 On my message take ye the waye
003 Vnto Marie, my modir clene,
004 þat berde is brighter than the daye.
005 Grete hir wele haly bedene,
006 An to that semely schall yoe saye
007 Off heuene I haue hir chosen quene,
008 In joie and blisse that laste schall aye.
009 I wille yoou saie what I haue thoughte
010 And why that yoe schall tille hir wende,
011 I will hir body to me be brought
012 To beilde in blisse withouten ende.
013 Mi flesshe of hir in erthe was tone;
014 Vnkindely thing it were iwis,
015 þat scho schulde bide be hire allone
016 And I beilde here so high in blis.
017 Forthy tille hir than schall yoe fare
018 Full frendlye for to fecche hir hedir,
019 þere is no thyng that I loue more,
020 In blisse thanne schall we belde togedir.
021 Angel 1. O blisfull lorde nowe moste of myght,
022 We are redye with all oure myght
023 Thy bidding to fulfille,
024 To thi modir that maiden free,
025 Chosen cheffe of chastité
026 As it is thy wille.
027 Angel 2. Off this message we are full fayne,
028 We are redy with myght and mayne,
029 Bothe be day and be nyght.
030 Heuene and erthe nowe gladde may be,
031 þat frely foode nowe for to see
032 In whome that thou did light.
033 Angel 3. Lorde Jesu Criste, oure gouernoure,
034 We are all boune atte thi bidding,
035 With joie and blisse and grete honnoure,
036 We schall thi modir to the bringe.
037 Angel 4. Hayle, the doughtir of blissid Anne,
038 þe whiche consayued thurgh the holy goste,
039 And thou brought forthe both God and manne,
040 The whiche felled doune the fendis boste.
041 Angel 5. Haile, roote of risse, that fourthe brought
042 þat blissid floure oure saueoure,
043 The whiche that made mankynde of noght
044 And brought hym vppe into his toure.
045 Angel 6. Of the allone he wolde be borne
046 Into this worlde of wrecchidnesse,
047 To saue mankynde that was forlorne
048 And bringe thame oute of grete distresse.
049 Angel 1. þou may be gladde bothe day and nyght
050 To se thy sone oure saueoure,
051 He will the croune nowe, lady bright,
052 þou blissid modir and faire floure.
053 Angel 2. Marie, modir and mayden clene,
054 Chosen cheffe vnto thi childe,
055 Of heuene and erthe thou arte quene;
056 Come vppe nowe lady, meke and mylde.
057 Angel 3. þi sone has sente vs aftir the
058 To bringe the nowe vnto his blisse,
059 þer schall thou belde and blithe be,
060 Of joie and mirthe schall thou noyot misse.
061 Angel 4. For in his blisse withouten ende,
062 þere schall thou alkynne solas see,
063 þi liffe in likyng for to lende
064 With thi dere sone in trinité
065 Mary. A, blissid be God, fadir all-weldand,
066 Hymselffe wottith best what is to doo.
067 I thanke hym with harte and hande,
068 þat thus his blisse wolde take me too,
069 And yoou also his aungellis bright
070 þat fro my sone to me is sente,
071 I am redy with all my myght
072 For to fulfille his comaundement.
073 Angel 5. Go we nowe thou worthi wight
074 Vnto thi sone that is so gente,
075 We schall the bringe into his sight
076 To croune the quene, thus hase he mente.
077 Angel 6. Alle heuene and erthe schall worschippe the
078 And baynnely be at thi biddinge,
079 Thy joie schall euere incressid be,
080 Of solas sere than schall thou synge.
081 Angel 1. Jesu, lorde and heueneis kyng,
082 Here is thi modir thou aftir sente,
083 We haue her brought at thi biddynge,
084 Take hir to the as thou haste mente.
085 Mary. Jesu my sone, loved motte thou be,
086 I thanke the hartely in my thought
087 þat this wise ordand is for me,
088 And to this blisse thou haste me broght.
089 Jesus. Haile be thou Marie, maiden bright,
090 þou arte my modir and I thy sone,
091 With grace and goodnesse arte thou dight,
092 With me in blisse ay schall thou wonne.
093 Nowe schall thou haue that I the hight,
094 Thy tyme is paste of all thi care,
095 Wirschippe schall the aungellis bright,
096 Of newe schall thou witte neuere more.
097 Mary. Jesu my sone, loued motte thou be,
098 I thanke the hartely in my thoyot,
099 þat on this wise ordand is for me,
100 And to this blisse thou has me broght.
101 Jesus. Come forth with me my modir bright,
102 Into my blisse we schall assende
103 To wonne in welthe, thou worthi wight,
104 That neuere more schall it haue ende.
105 Thi newis, modir, to neuen thame nowe,
106 Are turned to joie, and soth it is
107 All aungellis bright thei schall the bowe
108 And worschippe the worthely iwis.
109 For mekill joie, modir, had thou
110 Whan Gabriell grette the wele be this,
111 And tolde the tristely for to trowe
112 þou schulde consayue the kyng of blisse.
113 Nowe maiden meke and modir myne,
114 Itt was full mekill myrthe to the
115 þat I schuld ligge in wombe of thine
116 Thurgh gretyng of an aungell free.
117 The secounde joie, modir, was syne
118 Withouten payne whan thou bare me;
119 The thirde aftir my bittir peyne
120 Fro dede on lyve thou sawe me be.
121 The fourthe was when I stied vppe right
122 To heuene vnto my fadir dere-
123 My modir, when thou saugh that sight,
124 To the it was a solas seere.
125 þis is the fifte thou worthy wight,
126 Of the jois this has no pere,
127 Nowe schall thou belde in blisse so bright
128 For euer and ay, I highte the here,
129 For thou arte cheffe of chastité
130 Off all women thou beris the floure;
131 Nowe schalle thou, lady, belde with me
132 In blisse that schall euere indowre
133 Full high on highte in magesté
134 With all worshippe and all honnoure,
135 Wher we schall euere samen be
136 Beldand in oure bigly boure.
137 Alle-kynnys swetnesse is therin
138 þat manne vppon may thynke, or wiffe,
139 With joie and blisse that neuere schall blynne
140 þer schall thou, lady, lede thy liffe.
141 þou schalte be worshippid with honnoures
142 In heuene blisse that is so bright,
143 With martiris and with confessouris,
144 With all virginis, thou worthy wight.
145 Before all othere creatours
146 I schall the giffe both grace and might,
147 In heuene and erthe to sende socoures
148 To all that seruis the day and nyght.
149 I graunte thame grace with all my myght,
150 Thurgh askyng of thi praier,
151 þat to the call be day or nyght.
152 In what disease so that thei are.
153 þou arte my liffe and my lekyng,
154 Mi modir and my mayden schene;
155 Ressayue this croune my dere darlyng,
156 þer I am kyng thou schalte be quene.
157 Myne aungellis bright, a songe yoe singe
158 In the honnoure of my modir dere,
159 And here I giffe yoou my blissing
160 Haly nowe, all in fere.
© Copyright, 2007. From Stage to Page and Gerard NeCastro. All Rights Reserved.
All materials on this page are free to all users. We only ask two things of you. First, please be sure to cite the source properly: the citation is listed below. Second, if you would, please take one minute to say hello and tell us that you are using the pages: a quick email to firstname.lastname@example.org would be perfect.
Proper Citation: NeCastro, Gerard. The York Cycle, Play 47 - Assumption and Coronation of the Virgin. From Stage to Page - Medieval and Renaissance Drama. http:www.umm.maine.edu/faculty/necastro/drama. Date Visited.