From Stage to Page - Medieval and Renaissance Drama
The York Cycle, Play 40 - Travelers to Emmaus
001 Pilgrim 1. That lorde that me lente this liffe for to lede,
002 In my wayes thou me wisse thus will of wone.
003 Qwen othir men halfe moste mirthe to ther mede,
004 þanne als a mornand manne make I my mone.
005 For douteles nowe may we drede vs-
006 Allas, thei haue refte vs oure rede,
007 With doole haue thei dight hym to dede,
008 þat lorde that was leeffe for to lede vs.
009 Pilgrim 2. He ledde vs full lelly that lorde, nowe allas,
010 Mi lorde for his lewtéhis liffe has he lorne.
011 Pilgrim 1. Saye, who comes there claterand?
012 Pilgrim 2. Sir, I Cleophas;
013 Abide, my leffe brothere, to bale am I borne.
014 But telle me whedir thou bounes?
015 Pilgrim 1. To Emax, this castell beside vs.
016 Ther may we bothe herber and hyde vs,
017 þerfore late vs tarie at no townes.
018 Pilgrim 2. Atte townes for to tarie take we no tent,
019 But take vs tome at this tyme to talke of sume tales,
020 And jangle of the Jewes and of Jesu so gente,
021 Howe thei bette that body was bote of all bales.
022 With buffettis thei bete hym full barely,
023 In sir Cayphas hall garte thei hym call;
024 And hym before sir Pilate in his hall
025 On the morne than aftir, full arely.
026 Pilgrim 1. Full arely the juggemen demed hym to dye;
027 Both prestis and prelatis to Pilate made preysing,
028 And alls cursid caytiffis and kene on Criste gan thei crie,
029 And on that lele lorde made many a lesyng.
030 þei spitte in his face to dispise hym,
031 To spoile hym nothyng thei spared hym,
032 But natheles baynly thei bared hym,
033 With scourges smertly goyng thei smote hym.
034 Pilgrim 2. þei smotte hym full smertely that the bloode oute braste,
035 þat all his hyde in hurth was hastely hidde.
036 A croune of thorne on his heede full thraly thei thraste,
037 Itt is grete dole for to deme the dedis thei hym dide.
038 With byndyng vnbaynly and betyng,
039 þane on his bakke bare he thame by
040 A crosse vnto Caluery;
041 þat swettyng was swemyed for swetyng.
042 Pilgrim 1. For all the swette that he swete with swyngis thei hym swang,
043 And raffe hym full rewfully with rapes on a rode.
044 þan heuyd thei hym highly on hight for to hang,
045 Withouten misse of this man, thus mensked thai his mode
046 þat euere has bene trewest in trastyng.
047 Methynkith myn herte is boune for to breke,
048 Of his pitefull paynes when we here speke,
049 So frendfull we fonde hym in fraistyng.
050 Pilgrim 2. In frasting we fonde hym full faithfull and free,
051 In his mynde mente he neuere mysse to no man.
052 Itt was a sorowe, forsoth, in sight for to see
053 Whanne that a spetyffull spere vnto his harte ranne.
054 In baill thus his body was beltid,
055 Into his harte thraly thei thraste;
056 Whan his piteffull paynes were paste,
057 þat swet thyng full swiftely he sweltid.
058 Pilgrim 1. He sweltid full swithe in swonyng, that swette.
059 Allas for that luffely that laide is so lowe,
060 With granyng full grissely on grounde may we grette,
061 For so comely a corse canne I none knowe.
062 With dole vnto dede thei did hym
063 For his wise werkis that he wroght thame,
064 þes false folke, whan thei bethoughte thame,
065 þat grette vnkyndynesse thei kidde hym.
066 Pilgrim 2. Vnkyndynesse thei kidde hym, tho caitiffis so kene,
067 And als vnwitty wightis wrought thei hym wrake.
068 Jesus. What are thes meruailes that yoe of mene
069 And thus mekill mournyng in mynde that yoe make,
070 Walkyng thus wille by thes wayes?
071 Pilgrim 2. Why, arte thou a pilgryme and haste bene
072 At Jerusalem, and haste thou noght sene
073 What dole has ben done in thes daies?
074 Jesus. In ther daies, dere sir, what dole was ther done?
075 Of that werke wolde I witte, and youre will were,
076 And therfore I pray you telle me now sone,
077 Was ther any hurlyng in hande? Nowe late me here.
078 Pilgrim 1. Why, herde thou no carpyng nor crying
079 Att Jerusalem ther thou haste bene,
080 Whenne Jesu the Nazarene
081 Was doulfully dight to the dying?
082 Pilgrim 2. To the dying thei dight hym that defte was and dere,
083 Thurgh prokering of princes that were ther in prees.
084 Forthy as wightis that are will thus walke we in were,
085 For-pechyng als pilgrymes that putte are to pees.
086 For mornyng of oure maistir thus morne wee,
087 As wightis that are wilsome thus walke we,
088 Of Jesus in telling thus talke we,
089 Fro townes for takyng thus turne we.
090 Pilgrim 1. þus turne we fro townes, but take we entent
091 How thei mourthered that man that we of mene.
092 Full rewfully with ropis on rode thei hym rente
093 And takkid hym thertill full tyte in a tene.
094 Vpperightis full rudely thei raised hym,
095 þanne myghtely to noye hym withall,
096 In a mortaise faste lete hym fall-
097 To pynne hym thei putte hym and peysed hym.
098 Pilgrim 2. Thei peysed hym to pynne hym, that pereles of pese;
099 þus on that wight that was wise wroyot thei grete wondir,
100 3itt with that sorowe wolde thei noyot sesse-
101 They schogged hym and schotte hym his lymes all in sondir,
102 His braynes thus brake thei and braste hym.
103 A blynde knyght, such was his happe,
104 Inne with a spere-poynte atte the pappe
105 To the harte full thraly he thraste hym.
106 Pilgrim 1. Thei thraste hym full thraly, than was ther no threpyng,
107 þus with dole was that dere vnto dede dight.
108 His bak and his body was bolned for betyng-
109 Itt was, I saie the forsoth, a sorowfull sight.
110 But ofte-sithes haue we herde saie,
111 And we trowe as we herde telle,
112 That he was to rawsoune Israell;
113 But nowe is this the thirde daye.
114 Pilgrim 2. þes dayes newe owre wittis are waxen in were,
115 For some of oure women for certayne thei saide
116 That thai sawe in ther sightis solas full seere,
117 Howe all was lemand light wher he was laide.
118 þei called vs, as euer myght thei thriffe,
119 For certayne thei saugh it in sight,
120 A visioune of aungellis bright,
121 And tolde thame ther lorde was alyue.
122 Pilgrim 1. On lyue tolde thei that lorde leued hir in lande;
123 þez women come lightly to warne, I wene.
124 Some of oure folke hyed forthe, and faste thei it fande
125 þat all was soth that thei saide that sight had thei sene.
126 For lely thei loked ther he laye
127 þei wende ther that foode to haue fonne;
128 þanne was his toumbe tome as a tonne-
129 þanne wiste thei that wight was away.
130 Pilgrim 2. Awaye is that wight that wonte was vs for to wisse.
131 Jesus. A, fooles that are fauty and failes of youre feithe,
132 þis bale bud hym bide and belde thame in blisse-
133 But yoe be lele of youre laye youre liffe holde I laith.
134 To prophetis he proued it and preched,
135 And also to Moyses gan he saie
136 þat he muste nedis die on a day,
137 And Moyses forth talde it and teched,
138 And talde it and teched it many tymes than.
139 Pilgrim 1. A, more of this talking we pray you to telle vs.
140 Pilgrim 2. 3a sir, be youre carping full kyndely we kenne
141 3e meene of oure maistir of whome that we melle vs.
142 Pilgrim 1. 3a, goode sir, see what I saie yoou,
143 Se yoe this castell beside her?
144 All nyght we thynke for to bide here;
145 Bide with vs sir pilgrime, we praye yoou.
146 We praye yoou, sir pilgrime, yoe presse noyot to passe.
147 Jesus. 3is sir, me bus nede.
148 Pilgrim 1. Nay sir, the nyght is ovir-nere.
149 Jesus. And I haue ferre for to founde.
150 Pilgrim 2. I hope wele thou has.
151 Pilgrim 1. We praye the sir, hartely, all nyght holde the here.
152 Jesus. I thanke youe of this kyndinesse yoe kydde me.
153 Pilgrim 1. Go in sir, sadly and sone.
154 Pilgrim 2. Sir, daunger dowte noyot, haue done.
155 Jesus. Sir, I muste nedis do as yoe bid me.
156 3e bidde me so baynly I bide for the beste.
157 Pilgrim 1. Lo, her is a sege goode sir, I saie yoou.
158 Pilgrim 2. With such goode as we haue glad we oure geste.
159 Pilgrim 1. Sir, of this poure pitaunce take parte now we pray yow.
160 Jesus. Nowe blisse I this brede that brought is on the borde.
161 Fraste theron faithfully, my frendis, you to feede.
162 Pilgrim 1. [... ...] vnterly haue we tane entent-
163 Ow, I trowe some torfoyr is betidde vs!
164 Saie, wher is this man?
165 Pilgrim 2. Away is he wente-
166 Right now satte he beside vs.
167 Pilgrim 1. Beside vs we both sawe hym sitte,
168 And by no poynte couthe I parceyue hym passe.
169 Pilgrim 2. Nay, be the werkis that he wrought full wele myght we witte
170 Itt was Jesus hymselffe-I wiste who it was.
171 Pilgrim 1. Itt was Jesus thus wisely that wrought,
172 þat raised was and rewfully rente on the rode.
173 Of bale and of bittirnesse has he vs boght,
174 Boune was and betyn that all braste on bloode.
175 Pilgrim 2. All braste on bloode, so sore was he bette,
176 With ther wickid Jewes that wrethfull was euere;
177 With scourges and scharpe thornes on his heede sette,
178 Suche torfoyr and torment of telle herde I neuere.
179 Pilgrim 1. Of telle herde I neuere of so pitefull peyne
180 As suffered oure souerayne hyngand on hight;
181 Nowe is he resen with myght and with mayne,
182 I telle for sikir, we saugh hym in sight.
183 Pilgrim 2. We saugh hym in sight, nowe take we entent
184 Be the brede that he brake vs so baynly betwene,
185 Such wondirfull wais as we haue wente
186 Of Jesus the gente was neuere none seene.
187 Pilgrim 1. Sene was ther neuere so wondirfull werkes,
188 Be see ne be sande, in this worlde so wide.
189 Menskfully in mynde thes materes now merkis,
190 And preche we it prestly on euery ilke side.
191 Pilgrim 2. On euery ilke side prestely prechis we-
192 Go we to Jerusaleme thes tydingis to telle.
193 Oure felawes fro fandyng nowe fraste we,
194 More of this mater her may we not melle.
195 Pilgrim 1. Here may we notte melle more at this tyde,
196 For prossesse of plaies that precis in plight.
197 He bringe to his blisse on euery ilke side,
198 þat sofferayne lorde that moste is of myght.
© Copyright, 2007. From Stage to Page and Gerard NeCastro. All Rights Reserved.
All materials on this page are free to all users. We only ask two things of you. First, please be sure to cite the source properly: the citation is listed below. Second, if you would, please take one minute to say hello and tell us that you are using the pages: a quick email to firstname.lastname@example.org would be perfect.
Proper Citation: NeCastro, Gerard. The York Cycle, Play 40 - Travelers to Emmaus. From Stage to Page - Medieval and Renaissance Drama. http:www.umm.maine.edu/faculty/necastro/drama. Date Visited.