From Stage to Page - Medieval and Renaissance Drama
The Towneley Cycle, Play 14 - The Offering of the Magi (Oblacio Magorum)
001 Herodes. Peasse, I byd, both far and nere,
002 I warne you leyf youre sawes sere;
003 Who that makys noyse whyls I am here,
004 I say, shall dy.
005 Of all this warld, sooth, far & nere,
006 The lord am I.
007 Lord am I of euery land,
008 Of towre and towne, of se and sand;
009 Agans me dar noman stand,
010 That berys lyfe;
011 All erthly thyng bowes to my hand,
012 Both man and wyfe.
013 Man and wyfe, that warne I you,
014 That in this warld, is lyfand now,
015 To mahowne & me all shall bow,
016 Both old, and ying;
017 On hym wyll I ich man trow,
018 Ffor any thyng.
019 Ffor any thyng it shall be so;
020 Lord ouer all where I go,
021 Who so says agane, I shall hym slo,
022 Where so he dwell;
023 The feynd, if he were my fo,
024 I shuld, hym fell.
025 To fell those fatures I am bowne,
026 And dystroy those dogys in feyld, and towne
027 That will not trow on sant Mahowne,
028 Oure god so swete;
029 Those fals faturs I shall fell downe
030 Vnder my feete.
031 Vnder my feete I shall thaym fare,
032 Those ladys that will [not] lere my lare,
033 Ffor I am myghty man ay whare,
034 Of ilk a pak;
035 Clenly shapen, hyde and hare,
036 Withoutten lak.
037 The myght of me may no man mene,
038 Ffor all [that] dos me any teyn,
039 I shall dyng thaym downe bydeyn,
040 And wyrk thaym wo;
041 And on assay it shall be seyn,
042 Or I go.
043 And therfor will I send and se
044 In all this land, full hastely,
045 To looke if any dwelland be
046 In towre or towne,
047 That wyll not hold, holly on me,
048 And on mahowne.
049 If ther be fonden any of tho,
050 With bytter payn I shall theym slo;
051 My messynger, swyth looke thou go
052 Thrugh ilk countre,
053 In all this land, both to and fro,
054 I commaunde the;
055 And truly looke thou spyr and spy,-
056 In euery stede ther thou commys by,-
057 Who trowes not on mahowne most myghty,
058 Oure god so fre;
059 And looke thou bryng theym hastely
060 Heder vnto me.
061 And I shall fownd, thaym for to flay,
062 Those laddys that will not lede oure lay;
063 Therfor, boy, now I the pray
064 That thou go tytt.
065 Nuncius. It shal be done, lord, if I may,
066 Withoutten lett:
067 And certys, if I may any fynde,
068 I shall not leyfe oone of them behynde.
069 Herodes. No, bot boldly thou thaym bynde
070 And with the leyde:
071 Mahowne, that weldys water and wynde,
072 The wish and spede!
073 Nuncius. All peasse, lordyngys, and hold, you styll,
074 To I haue sayde what I will;
075 Take goode hede Vnto my skyll,
076 Both old, and ying;
077 In message what is commen you tyll
078 Ffrom herode, the kyng.
079 He commaundys you, euerilkon,
080 To hold no kyng bot hym alon,
081 And othere god ye worship none
082 Bot mahowne so fre;
083 And if ye do, ye mon be slone;
084 Thus told, he me.
085 Primus Rex, Jaspar. Lord, of whom this light is lent,
086 And vnto me this sight has sent,
087 I pray to the, with good intent,
088 Ffrom shame me shelde;
089 So that I no harmes hent
090 By way[e]s wylde.
091 Also I pray the specyally,
092 Thou graunt me grace of company,
093 That I may haue som beyldyng by,
094 In my trauayll:
095 And, certys, for to lyf or dy
096 I shall not fayll,
097 To that I in som land haue bene,
098 To wyt what this starne may mene,
099 That has me led, with bemys shene,
100 Ffro my cuntre;
101 Now weynd I will, withoutten weyn,
102 The sothe to se.
103 Secundus Rex, Melchior. A! lord, that is withoutten ende!
104 Whens euer this selcouth light dyscende,
105 That thus kyndly has me kende
106 Oute of my land,
107 And shewyd to me ther I can leynd,
108 Thus bright shynand?
109 Certys, I sagh neuer none so bright;
110 I shall neuer ryst by day nor nyght,
111 To I wyt whens may com this lyght,
112 And from what place;
113 He that it send vnto my sight
114 Leyne me that grace!
115 Primus Rex, Jaspar. A, sir, wheder ar ye away?
116 Tell me, good sir, I you pray.
117 Secundus Rex, Melchior. Certys, I trow, the sothe to say,
118 None wote bot I;
119 I haue folowed yond, starne, veray,
120 Ffrom araby;
121 Ffor I am kyng of that cuntre,
122 And melchor ther call men me.
123 Primus Rex, Jaspar. And kyng, sir, was I wont to be,
124 In tars, at hame,
125 Both of towne and cyte;
126 Iaspar is my name;
127 The light of yond starne sagh I thedyr.
128 Secundus Rex, Melchior. That lord be louyd that send me hedyr!
129 Ffor it will grathly ken vs whedyr,
130 That we shall weynd;
131 We owe to loue hym both togedyr,
132 That it to vs wold send.
133 Tercius Rex, Balthesar. A, lord! in land what may this mene?
134 So selcouth sight was neuer sene,
135 Sich a starne, shynand so shene,
136 Sagh I neuer none;
137 It gyffys lyght ouer all, bedene,
138 By hym alone.
139 What it may mene, that know I noght;
140 Bot yonder ar two, me thynk, in thoght,
141 I thank hym that thaym heder has broght
142 Thus vnto me;
143 I shall assay if thay wote oght
144 What it may be.
145 Lordyngys, that ar leyf and dere,
146 I pray you tell me with good chere
147 Wheder ye weynd, on this manere,
148 And where that ye haue bene;
149 And of this starne, that shynys thus clere,
150 What it may mene.
151 Primus Rex, Jaspar. Syr, I say you certanly,
152 Ffrom tars for yond starne soght haue I.
153 Secundus Rex, Melchior. To seke yond light from araby,
154 Sir, haue I went.
155 Tercius Rex, Balthesar. Now hertely I thank hym for-thy,
156 That it has sent.
157 Primus Rex, Jaspar. Good sir, what cuntre cam ye fra?
158 Tercius Rex, Balthesar. This light has led me fro saba;
159 And balthesar, my name to say,
160 The sothe to tell.
161 Secundus Rex, Melchior. And, kyngis, sir, are we twa,
162 Ther as we dwell.
163 Tercius Rex. Now, syrs, syn we ar semled here,
164 I rede we ryde togeder, in fere,
165 Vnto we wytt, on all manere,
166 Ffor good or yll,
167 What it may mene, this sterne so clere
168 Shynand vs tyll.
169 Primus Rex, Jaspar. A, lordyngys! behold, the lyght
170 Of yond, starne, with bemys bright!
171 Ffor sothe I sagh neuer sich a sight
172 In no-kyns land;
173 A starne thus, aboute mydnyght,
174 So bright shynand.
175 It gyfys more light it self alone
176 Then any son that euer shone,
177 Or mone, when he of son has ton
178 His light so cleyn;
179 Sich selcouth sight haue I sene none,
180 What so euer it meyn.
181 Secundus Rex, Melchior. Behold, lordyngys, vnto his pase,
182 And se how nygh the erth hit gase;
183 It is a tokyn that it mase
184 Of nouelry;
185 A meruell it is, good tent who tase,
186 Now here in hy.
187 Ffor sich a starne was neuer ere seyn,
188 As wyde in warld as we haue beyn,
189 Ffor blasyng bemys, shynand full sheyn,
190 Ffrom hit ar sent;
191 Meruell I haue what it may meyn
192 In myn intent.
193 Tercius Rex, Balthesar. Certys, syrs, the sothe to say,
194 I shall dyscry now, if I may,
195 What it may meyn, yond starne veray,
196 Shynand tyll vs;
197 It has bene sayde syn many a day
198 It shuld, be thus.
199 Yond starne betokyns, well wote I,
200 The byrth of a prynce, syrs, securly,
201 That shewys well the prophecy
202 That it so be;
203 Or els the rewlys of astronomy
204 Dyssauys me.
205 Primus Rex, Jaspar. Certan, balaam spekys of this thyng,
206 That of Iacob a starne shall spryng
207 That shall ouercom kasar and kyng,
208 Withoutten stryfe;
209 All folk shalbe to hym obeyng
210 That berys the lyfe.
211 Now wote I well this is the same,
212 In euery place he shall haue hame,
213 All shall hym bowe that berys name,
214 In ilk cuntre;
215 Who trowys it not, thay ar to blame,
216 What so thay be.
217 Secundus Rex, Melchior. Certys, lordyngys, full well wote I,
218 Ffulfyllyd, is now the prophecy;
219 That prynce that shall ouer com in hy
220 Kasar and kyng,
221 This starne berith witnes, wytterly,
222 Of his beryng.
223 Tercius Rex, Balthesar. Now is fulfyllyd here in this land
224 That balaam sayd, I vnderstand;
225 Now is he borne that se and sand
226 Shall weyld, at wyll:
227 That shewys this starne, so bright shynand,
228 Vs thre vntyll.
229 Primus Rex, Jaspar. Lordyngys, I rede we weynd all thre
230 Ffor to wyrship that chyld, so fre,
231 In tokyn that he kyng shalbe
232 Of alkyn thyng;
233 This gold now wyll I bere with me,
234 To myn offeryng.
235 Secundus Rex, Melchior. Go we fast, syrs, I you pray,
236 To worship hym if that we may;
237 I bryng rekyls, the sothe to say,
238 Here in myn hende,
239 In tokyn that he [is] god veray,
240 Withoutten ende.
241 Tercius Rex, Balthesar. Syrs, as ye say right so I red;
242 Hast we tytt vnto that sted
243 To wirship hym, as for oure hed,
244 With oure offeryng;
245 In tokyn that he shalbe ded,
246 This Myrr I bryng.
247 Primus Rex, Jaspar. Where is that kyng of Iues land,
248 That shalbe lord, of se and sand,
249 And folk shall bow vnto his hand
250 Both more and myn?
251 To wyrship hym with oure offerand
252 We wyll not blyn.
253 Secundus Rex, Melchior. We shall not rest, euen nor morne,
254 Vnto we com ther he is borne.
255 Tercius Rex, Balthesar. Ffolowe this light, els be we lorne,
256 Ffor sothe, I trowe,
257 That frely to we com beforne;
258 Syrs, go we now.
259 Nuncius. Mahowne, that is of greatt pausty,
260 My lord, sir herode, the saue and se!
261 Herodes. Where has thou bene so long fro me,
262 Vyle stynkand lad?
263 Nuncius. Lord, gone youre herand, in this cuntre,
264 As ye me bad.
265 Herodes. Thou lyys, lurdan, the dewill the hang!
266 Why has thou dwelt away so lang?
267 Nuncius. Lord, ye wyte me all with wrang.
268 Herodes. What tythyngys? say!
269 Nuncius. Som good, som yll, mengyd emang.
270 Herodes. How? I the pray.
271 Do tell me fast how thou has farne;
272 Thy waryson shall thou not tharne.
273 Nuncius. As I cam walkand, I you warne,
274 Lord, by the way,
275 I met thre kyngis sekeand a barne,
276 Thus can thay say.
277 Herodes. To seke a barne! for what thyng?
278 Told, thay any new tythyng?
279 Nuncius. Yey, lord! thay sayd, he shuld, be kyng
280 Of towne and towre;
281 Ffor thy thay went, with thare offeryng,
282 Hym to honoure.
283 Herodes. Kyng! the dewill! bot of what empyre?
284 Of what land shuld, that lad, be syre?
285 Nay, I shall with that trature tyre;
286 Sore shall he rewe!
287 Nuncius. Lord, by a starne as bright as fyre
288 This kyng thay knew;
289 It led thaym outt of thare cuntre.
290 Herodes. We, fy! fy! dewyls on thame all thre!
291 He shall neuer haue myght to me,
292 That new borne lad;
293 When thare wytt in a starne shuld, be,
294 I hold, thaym mad.
295 Those lurdans wote not what thay say;
296 Thay ryfe my hede, that dar I lay;
297 Ther dyd no tythyngis many a day,
298 Sich harme me to;
299 Ffor wo my wytt is all away;
300 What shall I do?
301 Why, what the dewyll is in thare harnes?
302 Is thare wytt all in the starnes?
303 These tythyngis mar my mode in ernes;
304 And of this thyng
305 To wytt the sothe, full sore me yarnes,
306 Of this new kyng.
307 Kyng? what the dewyll, other then I!
308 We, fy on dewyls! fy, fy!
309 Certys, that boy shall dere aby!
310 His ded is dight!
311 Shall he be kyng thus hastely?
312 Who the dewill made hym knyght?
313 Alas, for shame! this is a skorne!
314 Thay fynde no reson thaym beforne;
315 Shuld, that brodell, that late is borne,
316 Be most of mayn?
317 Nay, if the dewyll of hell had sworne,
318 He shall agane.
319 Alas, alas! for doyll and, care!
320 So mekyll sorow had I neuer are;
321 If it be sothe, for euer mare
322 I am vndoyn;
323 At good clerkys and wyse of lare
324 I wyll wyt soyn.
325 Bot fyrst yit will I send, and se
326 The answere of those lurdans thre.
327 Messyngere, tytt hy thou the,
328 And make the yare;
329 Go, byd those kyngys com speke with me,
330 That told, thou of are.
331 Say I haue greatt herand thaym tyll.
332 Nuncius. It shalbe done, lord, at youre wyll,
333 Youre byddyng shall I soyn fulfyll
334 In ilk cuntre.
335 Herodes. Mahowne the shelde from all kyns yll,
336 Ffor his pauste.
337 Nuncius. Mahowne you saue, sir kyngys thre,
338 I haue message to you preue',
339 Ffrom herode, kyng of this cuntre,
340 That is oure chefe;
341 And lo, syrs, if ye trow not me,
342 Ye rede this brefe.
343 Primus Rex, Jaspar. Welcom be thou, belamy!
344 What is his wyll? tell vs in hy.
345 Nuncius. Certys, sir, that wote not I,
346 Bot thus he sayde to me,
347 That ye shuld, com full hastely
348 To hym all thre,
349 Ffor nede herand, he sayd me so.
350 Secundus Rex, Melchior. Messynger, before thou go,
351 And tell thi lord we ar all thro
352 His wyll to do;
353 Both I and my felose two
354 Shall com hym to.
355 Nuncius. Mahowne you looke, my lord so dere.
356 Herodes. Welcom be thou, messyngere!
357 How has thou farne syn thou was here?
358 Thou tell me tytt.
359 Nuncius. Lord, I haue traueld, far and nere
360 Withoutten lett,
361 And done youre herand, sir, sothely;
362 Thre kyngis with me broght haue I,
363 Ffro saba, tars, and araby,
364 Then haue thay soght.
365 Herodes. Thi waryson shall thou haue for thy,
366 By hym me boght;
367 And, certanly, that is good skyll,
368 And syrs, ye ar welcom me tyll.
369 Tercius Rex, Balthesar. Lord, thi bydyng to fulfyll
370 Are we full thro.
371 Herodes. A, mekyll thank of youre good wyll
372 That ye wyll so.
373 Ffor, certys, I haue couett greattly
374 To speke with you, and here now why:
375 Tell me, I pray you specyally,
376 Ffor any thyng,
377 What tokynyng saw ye on the sky
378 Of this new kyng?
379 Primus Rex, Jaspar. We sagh his starne ryse in the eest,
380 That shall be kyng of man and best,
381 Ffor thy, lord, we haue not cest,
382 Syn that we wyst,
383 With oure gyftys, riche and, honest,
384 To bere that blyst.
385 Secundus Rex, Melchior. Lord, when that starne rose vs beforne,
386 Ther by we knew that chyld, was borne.
387 Herodes. Out, alas, I am forlorne
388 Ffor euer mare!
389 I wold, be rent and al to-torne
390 Ffor doyll and care!
391 Alas, alas, I am full wo!
392 Syr kyngys, syt downe, & rest you so.
393 By scrypture, syrs, what say ye two?
394 Withoutten lytt;
395 What ye can say ther to
396 Let se now tytt.
397 These kyngys do me to vnderstand,
398 That borne is newly, in this land,
399 A kyng that shall weld, se and sand;
400 Thay tell me so;
401 And therfor, syrs, I you commaunde
402 Youre bookys go to,
403 And looke grathly, for any thyng,
404 If ye fynd oght of sich a kyng.
405 Primus Consultus & Doctor. It shall be done at youre bydyng,
406 By hym me boght,
407 And soyn we shall you tythyngys bryng
408 If we fynd, oght.
409 Secundus Consultus & Doctor. Soyn shall we wyt, lord, if I may,
410 If oght be wretyn in oure lay.
411 Herodes. Now, masters, therof I you pray
412 On all manere.
413 Primus Consultus & Doctor. Com furth, let vs assay
414 Oure bookys both in fere.
415 Secundus Consultus & Doctor. Certys, sir, lo, here fynd, I
416 Well wretyn in a prophecy,
417 How that profett Isay,
418 That neuer begyld,
419 Tellys that a madyn of hir body
420 Shall bere a chyld.
421 Primus Consultus & Doctor. And also, sir, to you I tell
422 The meruellest thyng that euer fell,
423 Hyr madynhede with hir shall dwell,
424 As dyd beforne;
425 That child shall hight 'emanuell'
426 When he is borne.
427 Secundus Consultus & Doctor. Lord, this is sothe, securely,
428 Wytnes the profett Isay.
429 Herodes. Outt, alas! for doyll I dy,
430 Long or my day!
431 Shall he haue more pauste then I?
432 A, waloway!
433 Alas, alas, I am forlorne!
434 I wold, be rent and all to torne;
435 Bot looke yit, as ye dyd, beforne,
436 Ffor luf of me;
437 And tell me where that boy is borne;
438 Onone lett se.
439 Primus Consultus & Doctor. All redy, lord, with mayn & mode.
440 Herodes. Haue done belyf, or I go wode;
441 And, certys, that gadlyng wer as good
442 Haue greuyd me noght;
443 I shall se that brodell bloode,
444 By hym that me has boght!
445 Secundus Consultus & Doctor. Micheas the prophett, withoutten nay,
446 How that he tellys I shall you say;
447 In bedlem, land of Iuda,
448 As I say you,
449 Out of it a duke shall spra;
450 Thus fynd we now.
451 Primus Consultus & Doctor. Syr, thus we fynd, in prophecy:
452 Therfor we say you, securely,
453 In bedlem, we say you truly,
454 Borne is that kyng.
455 Herodes. The dewill hang you high to dry,
456 Ffor this tythyng!
457 And certys ye ly! it may not be!
458 Secundus Consultus & Doctor. Lord, we wytnes it truly;
459 Here the sothe youre self may se,
460 If ye can rede.
461 Herodes. A, waloway! full wo is me!
462 The dewill you spede!
463 Primus Consultus & Doctor. Lord, it is sothe, all that we say,
464 We fynde it wretyn in oure lay.
465 Herodes. Go hens, harlottys, in twenty dewill way,
466 Ffast and belyfe!
467 Mighty mahowne, as he well may,
468 Lett you neuer thryfe!
469 Alas, wherto were I a crowne?
470 Or is cald of greatt renowne?
471 I am the fowlest borne downe
472 That euer was man;
473 And, namely with a fowll swalchon,
474 That no good can.
475 Alas, that euer I shuld be knyght,
476 Or holdyn man of mekyll myght,
477 If a lad shuld, reyfe me my right
478 All thus me fro;
479 Myn dede ere shuld I dyght,
480 Or it were so.
481 Ye nobyll kyngys, harkyns as heynd!
482 Ye shall haue saue condyth to weynd;
483 Bot com agane with me to leynd,
484 Syrs, I you pray;
485 Ye shall me fynd a faythfull freynd,
486 If ye do swa.
487 If it be sothe, this new tythyng,
488 Som worship wold I do that kyng,
489 Therfor I pray you that ye bryng
490 Me tythyngys soyn.
491 Primus Rex, Jaspar. All redy, lord, at youre bydyng
492 It shalbe doyn.
493 Secundus Rex, Melchior. Alas, in warld, how haue we sped!
494 Where is the lyght that vs has led?
495 Som clowde, for sothe, that starne has cled
496 Ffrom vs away;
497 In strong stowre now ar we sted;
498 What may we say?
499 Tercius Rex, Balthesar. Wo worth herode, that cursyd wyght!
500 Wo worth that tyrant day and nyght!
501 Ffor thrugh hym haue we lost that sight,
502 And for his gyle,
503 That shoyn to vs with bemys bright
504 Within a whyle.
505 Primus Rex, Jaspar. Lordyngys, I red, we pray all thre
506 To that lord, whose natyuyte
507 The starne betokyned that we can se,
508 All with his wyll;
509 Pray we specyally that he
510 Wold, show it vs vntyll
511 Secundus Rex, Melchior. Thou chyld, whose myght no tong may tell,
512 As thou art lord of heuen and hell,
513 Thy nobyll starne, emanuell,
514 Thou send vs yare;
515 That we may wytt by fyrth and fell
516 How we shall fare.
517 Tercius Rex, Balthesar. A, to that chyld be euer honoure,
518 That in this tyd has stynt oure stoure,
519 And lent vs lyght to oure socoure,
520 On this manere;
521 We loue the, lord of towne and towre,
522 Holly in fere.
523 We owe to loue hym ouer all thyng,
524 That thus has send vs oure askyng;
525 Behold, yond starne has made stynyng,
526 Syrs, securly;
527 Of this chyld, shall we haue knowyng,
528 I hope, in hy.
529 Secundus Rex, Melchior. Lordyngys dere, drede thar vs noght,
530 Oure greatt trauell tyll end is broght;
531 Yond, is the place that we haue soght
532 Ffrom far cuntre;
533 Yond is the chyld, that all has wroght,
534 Behold, and se!
535 Tercius Rex, Balthesar. I red we make offeryng, all thre,
536 Vnto this chyld, of greatt pauste,
537 And worship hym with gyftys fre
538 That we haue broght;
539 Oure boytt of bayll ay wyll he be,
540 Well haue we soght.
541 Primus Rex, Jaspar. Hayll be thou, maker of all kyn thyng!
542 That boytt of all oure bayll may bryng!
543 In tokyn that thou art oure kyng,
544 And shalbe ay,
545 Resayf this gold, to myn offeryng,
546 Prynce, I the pray.
547 Secundus Rex, Melchior. Hayll, ouercomer of kyng and of knyght!
548 That fourmed fysh, and fowyll in flyght!
549 Ffor thou art godis son most of myght,
550 And all weldand,
551 I bryng the rekyls, as is right,
552 To myn offerand.
553 Tercius Rex, Balthesar. Hayll, kyng in kyth, cowrand on kne!
554 Hayll, oone-fold, god, in persons thre!
555 In tokyn that thou dede shalbe,
556 By kyndly skyll,
557 To thy grauyng this myr of me
558 Resaue the tyll.
559 Mary. Syr kyngys, make comforth you betweyn,
560 And meruell not what it may mene;
561 This chyld, that on me borne has bene,
562 All bayll may blyn;
563 I am his moder, and madyn clene
564 Withoutten syn.
565 Therfor, lordyngys, where so ye fare,
566 Boldly looke ye tell ay whare
567 How I this blyst of bosom bare,
568 That best shalbe;
569 And madyn cleyn, as I was are,
570 Thrugh his pauste.
571 And truly, syrs, looke that ye trow
572 That othere lord is none at-lowe;
573 Both man and beest to hym shall bowe,
574 In towne and feyld;
575 My blyssyng, syrs, be now with you
576 Where so ye beyld.
577 Primus Rex, Jaspar. A, lordyngys dere! the sothe to say,
578 We haue made a good Iornay;
579 We loue this lord, that shall last ay
580 With outten ende;
581 He is oure beyld, both nyght and day,
582 Where so we weynd.
583 Secundus Rex, Melchior. Lordyngys, we haue traueld, lang,
584 And restyd haue we lytyll emang,
585 Ffor-thi I red now, or we gang,
586 With all oure mayn
587 Et vs fownde a slepe to fang;
588 Then were I fayn;
589 Ffor in greatt stowres we haue ben sted.
590 Lo, here a lytter redy cled.
591 Tercius Rex, Balthesar. I loue my lord! we haue well sped,
592 To rest with wyn;
593 Lordyngys, syn we shall go to bed,
594 Ye shall begyn.
595 Angel. Syr curtes kyngys, to me take tent,
596 And turne by tyme or ye be tenyd;
597 Ffrom god his self thus am I sent
598 To warne you, as youre faythfull freynd,
599 How herode kyng has malyce ment,
600 And shapys with shame you forto sheynd;
601 And so that ye no harmes hent,
602 By othere ways god wyll ye weynd
603 Into youre awne cuntre;
604 And if ye ask hym boyn,
605 Ffor this dede that ye haue done,
606 Youre beyld, ay wyll he be.
607 Primus Rex, Jaspar. Wakyns, wakyns, lordyngys dere!
608 Oure dwellyng is no longer here;
609 An angell spake tyll vs in fere;
610 Bad vs, as heynd,
611 That we ne shuld, on no manere,
612 Home by herode weynd.
613 Secundus Rex, Melchior. All myghty god in trynyte,
614 With hart enterely thank I the,
615 That thyn angell send tyll vs thre,
616 And kend vs so,
617 Oure fals fo man for to fle,
618 That wold, vs slo.
619 Tercius Rex, Balthesar. We aght to loue hym more and myn,
620 That comly kyng of all man-kyn;
621 I rew full sore that we shall twyn
622 On this manere;
623 Ffor commen we haue, with mekyll wyn,
624 By wayes sere.
625 Primus Rex, Jaspar. Twyn must vs nedys, syrs, permafay,
626 And ilk on weynd, by dyuers way;
627 This wyll me lede, the sothe to say,
628 To my cuntre;
629 Ffor-thy, lordyngys, now haue good day!
630 God with you be!
631 Secundus Rex, Melchior. Certys, I must pas by se and sand;
632 This is the gate, I vnderstand,
633 That wyll me lede vnto my land
634 The right way;
635 To god of heuen I you commaunde,
636 And haue good day!
637 Tercius Rex, Balthesar. This is the way that I must weynd;
638 Now god till vs his socoure send,
639 And he, that is withoutten end
640 And ay shalbe,
641 Saue vs from fowndyng of the feynd,
642 Ffor his pauste.
© Copyright, 2007. From Stage to Page and Gerard NeCastro. All Rights Reserved.
All materials on this page are free to all users. We only ask two things of you. First, please be sure to cite the source properly: the citation is listed below. Second, if you would, please take one minute to say hello and tell us that you are using the pages: a quick email to email@example.com would be perfect.
Proper Citation: NeCastro, Gerard. The Towneley Cycle, Play 14 - The Offering of the Magi (Oblacio Magorum). From Stage to Page - Medieval and Renaissance Drama. http:www.umm.maine.edu/faculty/necastro/drama. Date Visited.