The Towneley Cycle, Play 5
Isaac

001     Isaac. Com nere son and kys me,
002     that I may feyle the smell of the.
003     The smell of my son is lyke
004     to a feld with flouris, or hony bike.
005     where art thou, Esaw, my son?

006     Jacob. here, fader, and askis youre benyson.

007     Isaac. The blyssyng my fader gaf to me,
008     god of heuen & I gif the;
009     God gif the plente grete,
010     of wyne, of oyll, and of whete;
011     And graunt thi childre all
012     to worship the, both grete and small;
013     who so the blyssys, blyssed be he;
014     who so the waris, wared be he.
015     Now has thou my grete blyssyng,
016     loue the shall all thyne ofspryng;
017     Go now wheder thou has to go.

018     Jacob. Graunt mercy, sir, I will do so.

019     Esau. haue, ete, fader, of myn huntyng,
020     And gif me sythen your blyssyng.

021     Isaac. Who is that?

022     Esau. I, youre son
023     Esaw, bryngis you venyson.

024     Isaac. Who was that was right now here,
025     And broght me bruet of a dere?
026     I ete well, and blyssyd hym;
027     And he is blyssyd, ich a lym.

028     Esau. Alas! I may grete and sob.

029     Isaac. Thou art begylyd thrugh iacob,
030     That is thyne awne german brother.

031     Esau. haue ye kepyd me none other
032     Blyssyng then ye set hym one?

033     Isaac. sich another haue I none;
034     Bot god gif the to thyn handband,
035     the dew of heuen & frute of land;
036     Other then this can I not say.

037     Esau. Now, alas, and walo-way!
038     May I with that tratoure mete,
039     my faders dayes shall com with grete,
040     And my moders also;
041     may I hym mete, I shall hym slo.

042     Rebecca. Isaac it were my deth
043     If Iacob weddeth in kynd of heth;
044     I will send hym to aran,
045     there my brothere dwellys, laban;
046     And there may he serue in peasse
047     till his brother's wrath will seasse.
048     why shuld, I apon a day
049     loyse both my sonnes? better nay.

050     Isaac. Thou says soth, wife; call hym heder,
051     And let vs tell hym where & wheder
052     That he may fle esaw,
053     that vs both hetis bale to brew.

054     Rebecca. Iacob, son! thi fader & I
055     wold, speke with the; com, stand, vs by!
056     Out of contry must thou fle,
057     that Esaw slo not the.

058     Jacob. Whederward, shuld, I go, dame?

059     Rebecca. To mesopotameam;
060     To my brothere, and thyn eme,
061     that dwellys besyde Iordan streme;
062     And ther may thou with hym won,
063     to Esaw, myne other son,
064     fforget, and all his wrath be dede.

065     Jacob. I will go, fader, at youre rede.

066     Isaac. Yei, son, do as thi moder says;
067     Com kys vs both, & weynd thi ways.

068     Jacob. Haue good day, sir and dame!

069     Isaac. God sheld, the, son, from syn and shame!

070     Rebecca. And gif the grace, good man to be,
071     And send me glad tythygis to the.
072