Chaucer Texts

eChaucer ¤ Chaucer in the Twenty-First Century

Troilus and Criseyde - Book 5
Heere

	Aprochen gan the fatal destyne
	That Joves hath in disposicioun,
	And to yow, angry Parcas, sustren thre,
	Committeth to don execucioun;
5	For which Criseyde moste out of the town,
	And Troilus shal dwellen forth in pyne
	Til Lachesis his thred no lenger twyne.
	The gold-tressed Phebus heighe on-lofte
	Thries hadde alle with his bemes cleene
10	The snowes molte, and Zepherus as ofte
	Ibrought ayeyn the tendre leves grene,
	Syn that the sone of Ecuba the queene
	Bigan to love hire first for whom his sorwe
	Was al, that she departe sholde a-morwe.
15	Ful redy was at prime Diomede
	Criseyde unto the Grekis oost to lede,
	For sorwe of which she felt hire herte blede,
	As she that nyste what was best to rede.
	And trewely, as men in bokes rede,
20	Men wiste nevere womman han the care,
	Ne was so loth out of a town to fare.
	This Troilus, withouten reed or loore,
	As man that hath his joies ek forlore,
	Was waytyng on his lady evere more
25	As she that was the sothfast crop and more
	Of al his lust or joies heretofore.
	But Troilus, now far-wel al thi joie,
	For shaltow nevere sen hire eft in Troie!
	Soth is that while he bood in this manere,
30	He gan his wo ful manly for to hide,
	That wel unnethe it sene was in his chere;
	But at the yate ther she sholde out ride,
	With certeyn folk he hoved hire t' abide,
	So wo-bigon, al wolde he naught hym pleyne,
35	That on his hors unnethe he sat for peyne.
	For ire he quook, so gan his herte gnawe,
	Whan Diomede on horse gan hym dresse,
	And seyde to hymself this ilke sawe:
	"Allas," quod he, "thus foul a wrecchednesse,
40	Whi suffre ich it? Whi nyl ich it redresse?
	Were it nat bet atones for to dye
	Than evere more in langour thus to drye?
	"Whi nyl I make atones riche and pore
	To have inough to doone er that she go?
45	Why nyl I brynge al Troie upon a roore?
	Whi nyl I slen this Diomede also?
	Why nyl I rather with a man or two
	Stele hire away? Whi wol I this endure?
	Whi nyl I helpen to myn owen cure?"
50	But why he nolde don so fel a dede,
	That shal I seyn, and whi hym liste it spare:
	He hadde in herte alweyes a manere drede
	Lest that Criseyde, in rumour of this fare,
	Sholde han ben slayn; lo, this was al his care.
55	And ellis, certeyn, as I seyde yore,
	He hadde it don, withouten wordes more.
	Criseyde, whan she redy was to ride,
	Ful sorwfully she sighte, and seyde "Allas!"
	But forth she moot, for aught that may bitide;
60	Ther is non other remedie in this cas.
	And forth she rit ful sorwfully a pas.
	What wonder is, though that hire sore smerte,
	Whan she forgoth hire owen swete herte?
	This Troilus, in wise of curteysie,
65	With hauk on honde and with an huge route
	Of knyghtes, rood and did hire companye,
	Passyng al the valeye fer withoute,
	And ferther wolde han riden, out of doute,
	Ful fayn, and wo was hym to gon so sone;
70	But torne he moste, and it was ek to done.
	And right with that was Antenor ycome
	Out of the Grekis oost, and every wight
	Was of it glad, and seyde he was welcome.
	And Troilus, al nere his herte light,
75	He peyned hym with al his fulle myght
	Hym to withholde of wepyng atte leeste,
	And Antenor he kiste and made feste.
	And therwithal he moste his leve take,
	And caste his eye upon hire pitously,
80	And neer he rood, his cause for to make,
	To take hire by the honde al sobrely.
	And Lord, so she gan wepen tendrely!
	And he ful softe and sleighly gan hire seye,
	"Now holde youre day, and do me nat to deye."
85	With that his courser torned he aboute
	With face pale, and unto Diomede
	No word he spak, ne non of al his route;
	Of which the sone of Tideus took hede,
	As he that koude more than the crede
90	In swich a craft, and by the reyne hire hente;
	And Troilus to Troie homward he wente.
	This Diomede, that ledde hire by the bridel,
	Whan that he saugh the folk of Troie aweye,
	Thoughte, "Al my labour shal nat ben on ydel,
95	If that I may, for somwhat shal I seye,
	For at the werste it may yet shorte oure weye.
	I have herd seyd ek tymes twyes twelve,
	`He is a fool that wol foryete hymselve.'"
	But natheles, this thoughte he wel ynough,
100	That "Certeynlich I am aboute nought,
	If that I speke of love or make it tough;
	For douteles, if she have in hire thought
	Hym that I gesse, he may nat ben ybrought
	So soon awey; but I shal fynde a meene
105	That she naught wite as yet shal what I mene."
	This Diomede, as he that koude his good,
	Whan tyme was, gan fallen forth in speche
	Of this and that, and axed whi she stood
	In swich disese, and gan hire ek biseche
110	That if that he encresse myghte or eche
	With any thyng hire ese, that she sholde
	Comaunde it hym, and seyde he don it wolde.
	For treweliche he swor hire as a knyght
	That ther nas thyng with which he myghte hire plese,
115	That he nolde don his peyne and al his myght
	To don it, for to don hire herte an ese;
	And preyede hire she wolde hire sorwe apese,
	And seyde, "Iwis, we Grekis kan have joie
	To honouren yow as wel as folk of Troie."
120	He seyde ek thus: "I woot yow thynketh straunge --
	Ne wonder is, for it is to yow newe --
	Th' aquayntaunce of thise Troianis to chaunge
	For folk of Grece, that ye nevere knewe.
	But wolde nevere God but if as trewe
125	A Grek ye sholde among us alle fynde
	As any Troian is, and ek as kynde.
	"And by the cause I swor yow right, lo, now,
	To ben youre frend, and helply, to my myght,
	And for that more aquayntaunce ek of yow
130	Have ich had than another straunger wight,
	So fro this forth, I pray yow, day and nyght
	Comaundeth me, how soore that me smerte,
	To don al that may like unto youre herte;
	"And that ye me wolde as youre brother trete,
135	And taketh naught my frendshipe in despit;
	And though youre sorwes be for thynges grete --
	Not I nat whi -- but out of more respit
	Myn herte hath for t' amende it gret delit;
	And if I may youre harmes nat redresse,
140	I am right sory for youre hevynesse,
	"For though ye Troians with us Grekes wrothe
	Han many a day ben, alwey yet, parde,
	O god of Love in soth we serven bothe.
	And for the love of God, my lady fre,
145	Whomso ye hate, as beth nat wroth with me,
	For trewely, ther kan no wyght yow serve
	That half so loth youre wratthe wold disserve.
	"And nere it that we ben so neigh the tente
	Of Calcas, which that sen us bothe may,
150	I wolde of this yow telle al myn entente --
	But this enseled til anothir day.
	Yeve me youre hond; I am, and shal ben ay,
	God helpe me so, while that my lyf may dure,
	Youre owene aboven every creature.
155	"Thus seyde I nevere er now to womman born,
	For God myn herte as wisly glade so,
	I loved never womman here-biforn
	As paramours, ne nevere shal no mo.
	And for the love of God, beth nat my fo,
160	Al kan I naught to yow, my lady deere,
	Compleyne aright, for I am yet to leere.
	"And wondreth nought, myn owen lady bright,
	Though that I speke of love to yow thus blyve;
	For I have herd er this of many a wight,
165	Hath loved thyng he nevere saigh his lyve.
	Ek I am nat of power for to stryve
	Ayeyns the god of Love, but hym obeye
	I wole alwey; and mercy I yow preye.
	"Ther ben so worthi knyghtes in this place,
170	And ye so fayr, that everich of hem alle
	Wol peynen hym to stonden in youre grace.
	But myghte me so faire a grace falle,
	That ye me for youre servant wolde calle,
	So lowely ne so trewely yow serve
175	Nil non of hem as I shal til I sterve."
	Criseyde unto that purpos lite answerde,
	As she that was with sorwe oppressed so
	That, in effect, she naught his tales herde
	But here and ther, now here a word or two.
180	Hire thoughte hire sorwful herte brast a-two,
	For whan she gan hire fader fer espie
	Wel neigh down of hire hors she gan to sye.
	But natheles she thonketh Diomede
	Of al his travaile and his goode cheere,
185	And that hym list his frendshipe hire to bede;
	And she accepteth it in good manere,
	And wol do fayn that is hym lief and dere,
	And tristen hym she wolde, and wel she myghte,
	As seyde she; and from hire hors sh' alighte.
190	Hire fader hath hire in his armes nome,
	And twenty tyme he kiste his doughter sweete,
	And seyde, "O deere doughter myn, welcome!"
	She seyde ek she was fayn with hym to mete,
	And stood forth muwet, milde, and mansuete.
195	But here I leve hire with hire fader dwelle,
	And forth I wol of Troilus yow telle.
	To Troie is come this woful Troilus,
	In sorwe aboven alle sorwes smerte,
	With feloun look and face dispitous.
200	Tho sodeynly doun from his hors he sterte,
	And thorugh his paleis, with a swollen herte,
	To chaumbre he wente; of nothyng took he hede,
	Ne non to hym dar speke a word for drede.
	And ther his sorwes that he spared hadde
205	He yaf an issue large, and "Deth!" he criede;
	And in his throwes frenetik and madde
	He corseth Jove, Appollo, and ek Cupide;
	He corseth Ceres, Bacus, and Cipride,
	His burthe, hymself, his fate, and ek nature,
210	And, save his lady, every creature.
	To bedde he goth, and walwith ther and torneth
	In furie, as doth he Ixion in helle,
	And in this wise he neigh til day sojorneth.
	But tho bigan his herte a lite unswelle
215	Thorugh teris, which that gonnen up to welle,
	And pitously he cryde upon Criseyde,
	And to hymself right thus he spak, and seyde,
	"Wher is myn owene lady, lief and deere?
	Wher is hire white brest? Wher is it, where?
220	Wher ben hire armes and hire eyen cleere
	That yesternyght this tyme with me were?
	Now may I wepe allone many a teere,
	And graspe aboute I may, but in this place,
	Save a pilowe, I fynde naught t' enbrace.
225	"How shal I do? Whan shal she come ayeyn?
	I not, allas, whi lete ich hire to go;
	As wolde God ich hadde as tho ben sleyn!
	O herte myn, Criseyde, O swete fo!
	O lady myn, that I love and na mo,
230	To whom for evermo myn herte I dowe,
	Se how I dey, ye nyl me nat rescowe!
	"Who seth yow now, my righte lode-sterre?
	Who sit right now or stant in youre presence?
	Who kan conforten now youre hertes werre?
235	Now I am gon, whom yeve ye audience?
	Who speketh for me right now in myn absence?
	Allas, no wight; and that is al my care,
	For wel woot I, as yvele as I ye fare.
	"How sholde I thus ten dayes ful endure,
240	Whan I the firste nyght have al this tene?
	How shal she don ek, sorwful creature?
	For tendernesse, how shal she sustene
	Swich wo for me? O pitous, pale, grene
	Shal ben youre fresshe, wommanliche face
245	For langour, er ye torne unto this place."
	And whan he fil in any slomberynges,
	Anon bygynne he sholde for to grone
	And dremen of the dredefulleste thynges
	That myghte ben; as mete he were allone
250	In place horrible makyng ay his mone,
	Or meten that he was amonges alle
	His enemys, and in hire hondes falle.
	And therwithal his body sholde sterte,
	And with the stert al sodeynliche awake,
255	And swich a tremour fele aboute his herte
	That of the fere his body sholde quake;
	And therwithal he sholde a noyse make,
	And seme as though he sholde falle depe
	From heighe o-lofte; and thanne he wolde wepe,
260	And rewen on hymself so pitously
	That wonder was to here his fantasie.
	Another tyme he sholde myghtyly
	Conforte hymself, and sein it was folie
	So causeles swich drede for to drye;
265	And eft bygynne his aspre sorwes newe,
	That every man myght on his sorwes rewe.
	Who koude telle aright or ful discryve
	His wo, his pleynt, his langour, and his pyne?
	Naught alle the men that han or ben on lyve.
270	Thow, redere, maist thiself ful wel devyne
	That swich a wo my wit kan nat diffyne;
	On ydel for to write it sholde I swynke,
	Whan that my wit is wery it to thynke.
	On hevene yet the sterres weren seene,
275	Although ful pale ywoxen was the moone,
	And whiten gan the orisonte shene
	Al estward, as it wont is for to doone;
	And Phebus with his rosy carte soone
	Gan after that to dresse hym up to fare
280	Whan Troilus hath sent after Pandare.
	This Pandare, that of al the day biforn
	Ne myghte han comen Troilus to se,
	Although he on his hed it hadde sworn --
	For with the kyng Priam al day was he,
285	So that it lay nought in his libertee
	Nowher to gon -- but on the morwe he wente
	To Troilus, whan that he for hym sente.
	For in his herte he koude wel devyne
	That Troilus al nyght for sorwe wook;
290	And that he wolde telle hym of his pyne,
	This knew he wel ynough, withoute book.
	For which to chaumbre streght the wey he took,
	And Troilus tho sobrelich he grette,
	And on the bed ful sone he gan hym sette.
295	"My Pandarus," quod Troilus, "the sorwe
	Which that I drye I may nat longe endure.
	I trowe I shal nat lyven til to-morwe.
	For which I wolde alweys, on aventure,
	To the devysen of my sepulture
300	The forme; and of my moeble thow dispone
	Right as the semeth best is for to done.
	"But of the fir and flaumbe funeral
	In which my body brennen shal to glede,
	And of the feste and pleyes palestral
305	At my vigile, I prey the, tak good hede
	That that be wel; and offre Mars my steede,
	My swerd, myn helm; and, leve brother deere,
	My sheld to Pallas yef, that shyneth cleere.
	"The poudre in which myn herte ybrend shal torne,
310	That preye I the thow take and it conserve
	In a vessell that men clepeth an urne,
	Of gold, and to my lady that I serve,
	For love of whom thus pitouslich I sterve,
	So yeve it hire, and do me this plesaunce,
315	To preyen hire kepe it for a remembraunce.
	"For wele I fele, by my maladie
	And by my dremes now and yore ago,
	Al certeynly that I mot nedes dye.
	The owle ek, which that hette Escaphilo,
320	Hath after me shright al thise nyghtes two.
	And god Mercurye, of me now, woful wrecche,
	The soule gyde, and whan the liste, it fecche!"
	Pandare answerde and seyde, "Troilus,
	My deere frend, as I have told the yore,
325	That it is folye for to sorwen thus,
	And causeles, for which I kan namore.
	But whoso wil nought trowen reed ne loore,
	I kan nat sen in hym no remedie,
	But lat hym worthen with his fantasie.
330	"But, Troilus, I prey the, tel me now
	If that thow trowe er this that any wight
	Hath loved paramours as wel as thow?
	Ye, God woot, and fro many a worthi knyght
	Hath his lady gon a fourtenyght,
335	And he nat yet made halvendel the fare.
	What nede is the to maken al this care?
	"Syn day by day thow maist thiselven se
	That from his love, or ellis from his wif,
	A man mot twynnen of necessite --
340	Ye, though he love hire as his owene lif --
	Yet nyl he with hymself thus maken strif.
	For wel thou woost, my leve brother deere,
	That alwey frendes may nat ben yfeere.
	"How don this folk that seen hire loves wedded
345	By frendes myght, as it bitit ful ofte,
	And sen hem in hire spouses bed ybedded?
	God woot, they take it wisly, faire, and softe,
	Forwhi good hope halt up hire herte o-lofte.
	And for they kan a tyme of sorwe endure,
350	As tyme hem hurt, a tyme doth hem cure.
	"So shuldestow endure, and laten slide
	The tyme, and fonde to ben glad and light.
	Ten dayes nys so longe nought t' abide.
	And syn she the to comen hath bihyght,
355	She nyl hire heste breken for no wight.
	For dred the nat that she nyl fynden weye
	To come ayein; my lif that dorste I leye.
	"Thi swevnes ek and al swich fantasie
	Drif out and lat hem faren to meschaunce,
360	For they procede of thi malencolie
	That doth the fele in slep al this penaunce.
	A straw for alle swevenes signifiaunce!
	God helpe me so, I counte hem nought a bene!
	Ther woot no man aright what dremes mene.
365	"For prestes of the temple tellen this,
	That dremes ben the revelaciouns
	Of goddes, and as wel they telle, ywis,
	That they ben infernals illusiouns;
	And leches seyn that of complexiouns
370	Proceden they, or fast, or glotonye.
	Who woot in soth thus what thei signifie?
	"Ek oother seyn that thorugh impressiouns,
	As if a wight hath faste a thyng in mynde,
	That therof cometh swiche avysiouns;
375	And other seyn, as they in bokes fynde,
	That after tymes of the yer, by kynde,
	Men dreme, and that th' effect goth by the moone.
	But leve no drem, for it is nought to doone.
	"Wel worth. of dremes ay thise olde wives,
380	And treweliche ek augurye of thise fowles,
	For fere of which men wenen lese here lyves,
	As revenes qualm, or shrichyng of thise owles.
	To trowen on it bothe fals and foul is.
	Allas, allas, so noble a creature
385	As is a man shal dreden swich ordure!
	"For which with al myn herte I the biseche,
	Unto thiself that al this thow foryyve;
	And ris now up withowten more speche,
	And lat us caste how forth may best be dryve
390	This tyme, and ek how fresshly we may lyve
	Whan that she comth, the which shal be right soone.
	God helpe me so, the beste is thus to doone.
	"Ris, lat us speke of lusty lif in Troie
	That we han led, and forth the tyme dryve;
395	And ek of tyme comyng us rejoie,
	That bryngen shal oure blisse now so blyve;
	And langour of thise twyes dayes fyve
	We shal therwith so foryete or oppresse
	That wel unneth it don shal us duresse.
400	"This town is ful of lordes al aboute,
	And trewes lasten al this mene while.
	Go we pleye us in som lusty route
	To Sarpedoun, nat hennes but a myle;
	And thus thow shalt the tyme wel bygile,
405	And dryve it forth unto that blisful morwe
	That thow hire se, that cause is of thi sorwe.
	"Now ris, my deere brother Troilus,
	For certes it non honour is to the
	To wepe and in thi bedde to jouken thus;
410	For trewelich, of o thyng trust to me:
	If thow thus ligge a day, or two, or thre,
	The folk wol seyn that thow for cowardise
	The feynest sik, and that thow darst nat rise!"
	This Troilus answerde, "O brother deere,
415	This knowen folk that han ysuffred peyne,
	That though he wepe and make sorwful cheere
	That feleth harm and smert in every veyne,
	No wonder is. and though ich evere pleyne,
	Or alwey wepe, I am no thyng to blame,
420	Syn I have lost the cause of al my game.
	"But syn of fyne force I mot arise,
	I shal arise as soone as evere I may;
	And God, to whom myn herte I sacrifice,
	So sende us hastely the tenthe day!
425	For was ther nevere fowel so fayn of May
	As I shal ben whan that she comth in Troie
	That cause is of my torment and my joie.
	"But whider is thi reed," quod Troilus,
	"That we may pleye us best in al this town?"
430	"By God, my conseil is," quod Pandarus,
	"To ride and pleye us with kyng Sarpedoun."
	So longe of this they speken up and down
	Til Troilus gan at the laste assente
	To rise, and forth to Sarpedoun they wente.
435	This Sarpedoun, as he that honourable
	Was evere his lyve, and ful of heigh largesse,
	With al that myghte yserved ben on table
	That deynte was, al coste it gret richesse,
	He fedde hem day by day, that swich noblesse,
440	As seyden bothe the mooste and ek the leeste,
	Was nevere er that day wist at any feste.
	Nor in this world ther is non instrument
	Delicious, thorugh wynd or touche of corde,
	As fer as any wight hath evere ywent,
445	That tonge telle or herte may recorde,
	That at that feste it nas wel herd acorde;
	Ne of ladys ek so fair a compaignie
	On daunce, er tho, was nevere iseye with ie.
	But what availeth this to Troilus,
450	That for his sorwe nothyng of it roughte?
	For evere in oon his herte pietous
	Ful bisyly Criseyde, his lady, soughte.
	On hire was evere al that his herte thoughte,
	Now this, now that, so faste ymagenynge
455	That glade, iwis, kan hym no festeyinge.
	Thise ladies ek that at this feste ben,
	Syn that he saugh his lady was aweye,
	It was his sorwe upon hem for to sen,
	Or for to here on instrumentes pleye.
460	For she that of his herte berth the keye
	Was absent, lo, this was his fantasie --
	That no wight sholde maken melodie.
	Nor ther nas houre in al the day or nyght,
	Whan he was there as no wight myghte hym heere,
465	That he ne seyde, "O lufsom lady bryght,
	How have ye faren syn that ye were here?
	Welcome, ywis, myn owne lady deere!"
	But weylaway, al this nat but a maze.
	Fortune his howve entended bet to glaze!
470	The lettres ek that she of olde tyme
	Hadde hym ysent, he wolde allone rede
	An hondred sithe atwixen noon and prime,
	Refiguryng hire shap, hire wommanhede,
	Withinne his herte, and every word or dede
475	That passed was; and thus he drof t' an ende
	The ferthe day, and seyde he wolde wende.
	And seyde, "Leve brother Pandarus,
	Intendestow that we shal here bleve
	Til Sarpedoun wol forth congeyen us?
480	Yet were it fairer that we toke oure leve.
	For Goddes love, lat us now soone at eve
	Oure leve take, and homward lat us torne,
	For treweliche, I nyl nat thus sojourne."
	Pandare answerde, "Be we comen hider
485	To fecchen fir and rennen hom ayein?
	God help me so, I kan nat tellen whider
	We myghte gon, if I shal sothly seyn,
	Ther any wight is of us more feyn
	Than Sarpedoun; and if we hennes hye
490	Thus sodeynly, I holde it vilanye.
	"Syn that we seyden that we wolde bleve
	With hym a wowke, and now, thus sodeynly,
	The ferthe day to take of hym owre leve --
	He wolde wondren on it, trewely!
495	Lat us holden forth oure purpos fermely;
	And syn that ye bihighten hym to bide,
	Holde forward now, and after lat us ride."
	Thus Pandarus, with alle peyne and wo,
	Made hym to dwelle; and at the wikes ende
500	Of Sarpedoun they toke hire leve tho,
	And on hire wey they spedden hem to wende.
	Quod Troilus, "Now Lord me grace sende,
	That I may fynden at myn hom-comynge
	Criseyde comen!" And therwith gan he synge.
505	"Ye, haselwode!" thoughte this Pandare,
	And to hymself ful softeliche he seyde,
	"God woot, refreyden may this hote fare,
	Er Calkas sende Troilus Criseyde!"
	But natheles, he japed thus, and pleyde,
510	And swor, ywys, his herte hym wel bihighte
	She wolde come as soone as evere she myghte.
	Whan they unto the paleys were ycomen
	Of Troilus, they doun of hors alighte,
	And to the chambre hire wey than han they nomen;
515	And into tyme that it gan to nyghte
	They spaken of Criseyde the brighte;
	And after this, whan that hem bothe leste,
	They spedde hem fro the soper unto reste.
	On morwe, as soone as day bygan to clere,
520	This Troilus gan of his slep t' abrayde,
	And to Pandare, his owen brother deere,
	"For love of God," ful pitously he sayde,
	"As go we sen the palais of Criseyde;
	For syn we yet may have namore feste,
525	So lat us sen hire paleys atte leeste."
	And therwithal, his meyne for to blende,
	A cause he fond in towne for to go,
	And to Criseydes hous they gonnen wende.
	But Lord, this sely Troilus was wo!
530	Hym thoughte his sorwful herte braste a-two.
	For whan he saugh hire dores spered alle,
	Wel neigh for sorwe adoun he gan to falle.
	Therwith, whan he was war and gan biholde
	How shet was every wyndow of the place,
535	As frost, hym thoughte, his herte gan to colde;
	For which with chaunged dedlich pale face,
	Withouten word, he forthby gan to pace,
	And as God wolde, he gan so faste ride
	That no wight of his contenance espide.
540	Than seide he thus: "O paleys desolat,
	O hous of houses whilom best ihight,
	O paleys empty and disconsolat,
	O thow lanterne of which queynt is the light,
	O paleys, whilom day, that now art nyght,
545	Wel oughtestow to falle, and I to dye,
	Syn she is went that wont was us to gye!
	"O paleis, whilom crowne of houses alle,
	Enlumyned with sonne of alle blisse!
	O ryng, fro which the ruby is out falle,
550	O cause of wo, that cause hast ben of lisse!
	Yet, syn I may no bet, fayn wolde I kisse
	Thy colde dores, dorste I for this route;
	And farwel shryne, of which the seynt is oute!"
	Therwith he caste on Pandarus his ye,
555	With chaunged face, and pitous to biholde;
	And whan he myghte his tyme aright aspie,
	Ay as he rood to Pandarus he tolde
	His newe sorwe and ek his joies olde,
	So pitously and with so ded an hewe
560	That every wight myghte on his sorwe rewe.
	Fro thennesforth he rideth up and down,
	And every thyng com hym to remembraunce
	As he rood forby places of the town
	In which he whilom hadde al his plesaunce.
565	"Lo, yonder saugh ich last my lady daunce;
	And in that temple, with hire eyen cleere,
	Me kaughte first my righte lady dere.
	"And yonder have I herd ful lustyly
	My dere herte laugh; and yonder pleye
570	Saugh ich hire ones ek ful blisfully;
	And yonder ones to me gan she seye,
	`Now goode swete, love me wel, I preye';
	And yond so goodly gan she me biholde
	That to the deth myn herte is to hire holde.
575	"And at that corner, in the yonder hous,
	Herde I myn alderlevest lady deere
	So wommanly, with vois melodious,
	Syngen so wel, so goodly, and so cleere
	That in my soule yet me thynketh ich here
580	The blisful sown; and in that yonder place
	My lady first me took unto hire grace."
	Thanne thoughte he thus: "O blisful lord Cupide,
	Whan I the proces have in my memorie
	How thow me hast wereyed on every syde,
585	Men myght a book make of it, lik a storie.
	What nede is the to seke on me victorie,
	Syn I am thyn and holly at thi wille?
	What joie hastow thyn owen folk to spille?
	"Wel hastow, lord, ywroke on me thyn ire,
590	Thow myghty god, and dredefull for to greve!
	Now mercy, lord! Thow woost wel I desire
	Thi grace moost of alle lustes leeve,
	And lyve and dye I wol in thy byleve;
	For which I n' axe in guerdoun but o bone --
595	That thow Criseyde ayein me sende sone.
	"Destreyne hire herte as faste to retorne
	As thow doost myn to longen hire to see;
	Than woot I wel that she nyl naught sojorne.
	Now blisful lord, so cruel thow ne be
600	Unto the blood of Troie, I preye the,
	As Juno was unto the blood Thebane,
	For which the folk of Thebes caughte hire bane."
	And after this he to the yates wente
	Ther as Criseyde out rood a ful good paas,
605	And up and down ther made he many a wente,
	And to hymself ful ofte he seyde, "Allas,
	Fro hennes rood my blisse and my solas!
	As wolde blisful God now, for his joie,
	I myghte hire sen ayein come into Troie!
610	"And to the yonder hille I gan hire gyde,
	Allas, and ther I took of hire my leve!
	And yond I saugh hire to hire fader ride,
	For sorwe of which myn herte shal tocleve;
	And hider hom I com whan it was eve,
615	And here I dwelle out cast from alle joie,
	And shal, til I may sen hire eft in Troie."
	And of hymself ymagened he ofte
	To ben defet, and pale, and waxen lesse
	Than he was wont, and that men seyden softe,
620	"What may it be? Who kan the sothe gesse
	Whi Troilus hath al this hevynesse?"
	And al this nas but his malencolie,
	That he hadde of hymself swich fantasie.
	Another tyme ymaginen he wolde
625	That every wight that wente by the weye
	Hadde of hym routhe, and that they seyen sholde,
	"I am right sory Troilus wol deye."
	And thus he drof a day yet forth or tweye,
	As ye have herd; swich lif right gan he lede
630	As he that stood bitwixen hope and drede.
	For which hym likede in his songes shewe
	Th' enchesoun of his wo, as he best myghte;
	And made a song of wordes but a fewe,
	Somwhat his woful herte for to lighte;
635	And whan he was from every mannes syghte,
	With softe vois he of his lady deere,
	That absent was, gan synge as ye may heere:
	"O sterre, of which I lost have al the light,
	With herte soor wel oughte I to biwaille
640	That evere derk in torment, nyght by nyght,
	Toward my deth with wynd in steere I saille;
	For which the tenthe nyght, if that I faille
	The gydyng of thi bemes bright an houre,
	My ship and me Caribdis wol devoure."
645	This song whan he thus songen hadde, soone
	He fil ayeyn into his sikes olde;
	And every nyght, as was his wone to doone,
	He stood the brighte moone to byholde,
	And al his sorwe he to the moone tolde,
650	And seyde, "Ywis, whan thow art horned newe,
	I shal be glad, if al the world be trewe!
	"I saugh thyn hornes olde ek by the morwe
	Whan hennes rood my righte lady dere
	That cause is of my torment and my sorwe;
655	For which, O brighte Latona the clere,
	For love of God, ren faste aboute thy spere!
	For whan thyne hornes newe gynnen sprynge,
	Than shal she come that may my blisse brynge."
	The dayes moore and lenger every nyght
660	Than they ben wont to be, hym thoughte tho,
	And that the sonne went his cours unright
	By lenger weye than it was wont to do;
	And seyde, "Ywis, me dredeth evere mo
	The sonnes sone, Pheton, be on lyve,
665	And that his fader carte amys he dryve."
	Upon the walles faste ek wolde he walke,
	And on the Grekis oost he wolde se;
	And to hymself right thus he wolde talke:
	"Lo, yonder is myn owene lady free,
670	Or ellis yonder, ther tho tentes be;
	And thennes comth this eyr, that is so soote
	That in my soule I fele it doth me boote.
	"And hardily, this wynd that more and moore
	Thus stoundemele encresseth in my face
675	Is of my ladys depe sikes soore.
	I preve it thus: for in noon other place
	Of al this town, save onliche in this space,
	Fele I no wynd that sowneth so lik peyne;
	It seyth, `Allas! Whi twynned be we tweyne?'"
680	This longe tyme he dryveth forth right thus
	Til fully passed was the nynthe nyght;
	And ay bisyde hym was this Pandarus,
	That bisily did al his fulle myght
	Hym to conforte and make his herte light,
685	Yevyng hym hope alwey the tenthe morwe
	That she shal come and stynten al his sorwe.
	Upon that other syde ek was Criseyde,
	With wommen fewe, among the Grekis stronge,
	For which ful ofte a day "Allas," she seyde,
690	"That I was born! Wel may myn herte longe
	After my deth, for now lyve I to longe.
	Allas, and I ne may it nat amende,
	For now is wors than evere yet I wende!
	"My fader nyl for nothyng do me grace
695	To gon ayeyn, for naught I kan hym queme;
	And if so be that I my terme pace,
	My Troilus shal in his herte deme
	That I am fals, and so it may wel seme:
	Thus shal ich have unthonk on every side --
700	That I was born so weilaway the tide!
	"And if that I me putte in jupartie
	To stele awey by nyght, and it bifalle
	That I be kaught, I shal be holde a spie;
	Or elles -- lo, this drede I moost of alle --
705	If in the hondes of som wrecche I falle,
	I nam but lost, al be myn herte trewe.
	Now, myghty God, thow on my sorwe rewe!"
	Ful pale ywoxen was hire brighte face,
	Hire lymes lene, as she that al the day
710	Stood, whan she dorste, and loked on the place
	Ther she was born, and ther she dwelt hadde ay;
	And al the nyght wepyng, allas, she lay.
	And thus despeired, out of alle cure,
	She ladde hire lif, this woful creature.
715	Ful ofte a day she sighte ek for destresse,
	And in hireself she wente ay purtraynge
	Of Troilus the grete worthynesse,
	And al his goodly wordes recordynge
	Syn first that day hire love bigan to springe.
720	And thus she sette hire woful herte afire
	Thorugh remembraunce of that she gan desire.
	In al this world ther nys so cruel herte
	That hire hadde herd compleynen in hire sorwe
	That nolde han wepen for hire peynes smerte,
725	So tendrely she weep, bothe eve and morwe.
	Hire nedede no teris for to borwe!
	And this was yet the werste of al hire peyne:
	Ther was no wight to whom she dorste hire pleyne.
	Ful rewfully she loked upon Troie,
730	Biheld the toures heigh and ek the halles;
	"Allas," quod she, "the plesance and the joie,
	The which that now al torned into galle is,
	Have ich had ofte withinne yonder walles!
	O Troilus, what dostow now?" she seyde.
735	"Lord, wheyther thow yet thenke upon Criseyde?
	"Allas, I ne hadde trowed on youre loore
	And went with yow, as ye me redde er this!
	Than hadde I now nat siked half so soore.
	Who myghte han seyd that I hadde don amys
740	To stele awey with swich oon as he ys.
	But al to late comth the letuarie
	Whan men the cors unto the grave carie.
	"To late is now to speke of that matere.
	Prudence, allas, oon of thyne eyen thre
745	Me lakked alwey, er that I come here!
	On tyme ypassed wel remembred me,
	And present tyme ek koud ich wel ise,
	But future tyme, er I was in the snare,
	Koude I nat sen; that causeth now my care.
750	"But natheles, bityde what bityde,
	I shal to-morwe at nyght, by est or west,
	Out of this oost stele in som manere syde,
	And gon with Troilus where as hym lest.
	This purpos wol ich holde, and this is best.
755	No fors of wikked tonges janglerie,
	For evere on love han wrecches had envye.
	"For whoso wol of every word take hede,
	Or reulen hym by every wightes wit,
	Ne shal he nevere thryven, out of drede;
760	For that that som men blamen evere yit,
	Lo, other manere folk comenden it.
	And as for me, for al swich variaunce,
	Felicite clepe I my suffisaunce.
	"For which, withouten any wordes mo,
765	To Troie I wole, as for conclusioun."
	But God it wot, er fully monthes two,
	She was ful fer fro that entencioun!
	For bothe Troilus and Troie town
	Shal knotteles thorughout hire herte slide;
770	For she wol take a purpos for t' abide.
	This Diomede, of whom yow telle I gan,
	Goth now withinne hymself ay arguynge,
	With al the sleghte and al that evere he kan,
	How he may best, with shortest taryinge,
775	Into his net Criseydes herte brynge.
	To this entent he koude nevere fyne;
	To fisshen hire he leyde out hook and lyne.
	But natheles, wel in his herte he thoughte
	That she nas nat withoute a love in Troie,
780	For nevere sythen he hire thennes broughte
	Ne koude he sen hire laughe or maken joie.
	He nyst how best hire herte for t' acoye;
	"But for t' asay," he seyde, "it naught n' agreveth,
	For he that naught n' asaieth naught n' acheveth."
785	Yet seyde he to hymself upon a nyght,
	"Now am I nat a fool, that woot wel how
	Hire wo for love is of another wight,
	And hereupon to gon assaye hire now?
	I may wel wite it nyl nat ben my prow,
790	For wise folk in bookes it expresse,
	`Men shal nat wowe a wight in hevynesse.'
	"But whoso myghte wynnen swich a flour
	From hym for whom she morneth nyght and day,
	He myghte seyn he were a conquerour."
795	And right anon, as he that bold was ay,
	Thoughte in his herte, "Happe how happe may,
	Al sholde I dye, I wol hire herte seche!
	I shal namore lesen but my speche."
	This Diomede, as bokes us declare,
800	Was in his nedes prest and corageous,
	With sterne vois and myghty lymes square,
	Hardy, testif, strong, and chivalrous
	Of dedes, lik his fader Tideus.
	And som men seyn he was of tonge large;
805	And heir he was of Calydoigne and Arge.
	Criseyde mene was of hire stature;
	Therto of shap, of face, and ek of cheere,
	Ther myghte ben no fairer creature.
	And ofte tymes this was hire manere:
810	To gon ytressed with hire heres clere
	Doun by hire coler at hire bak byhynde,
	Which with a thred of gold she wolde bynde;
	And, save hire browes joyneden yfeere,
	Ther nas no lak, in aught I kan espien.
815	But for to speken of hire eyen cleere,
	Lo, trewely, they writen that hire syen
	That Paradis stood formed in hire yen.
	And with hire riche beaute evere more
	Strof love in hire ay, which of hem was more.
820	She sobre was, ek symple, and wys withal,
	The best ynorisshed ek that myghte be,
	And goodly of hire speche in general,
	Charitable, estatlich, lusty, fre;
	Ne nevere mo ne lakked hire pite;
825	Tendre-herted, slydynge of corage;
	But trewely, I kan nat telle hire age.
	And Troilus wel woxen was in highte,
	And complet formed by proporcioun
	So wel that kynde it nought amenden myghte;
830	Yong, fressh, strong, and hardy as lyoun;
	Trewe as stiel in ech condicioun;
	Oon of the beste entecched creature
	That is or shal whil that the world may dure.
	And certeynly in storye it is yfounde
835	That Troilus was nevere unto no wight,
	As in his tyme, in no degree secounde
	In durryng don that longeth to a knyght.
	Al myghte a geant passen hym of myght,
	His herte ay with the first and with the beste
840	Stood paregal, to durre don that hym leste.
	But for to tellen forth of Diomede:
	It fel that after, on the tenthe day
	Syn that Criseyde out of the citee yede,
	This Diomede, as fressh as braunche in May,
845	Com to the tente ther as Calkas lay,
	And feyned hym with Calkas han to doone;
	But what he mente, I shal yow tellen soone.
	Criseyde, at shorte wordes for to telle,
	Welcomed hym and down hym by hire sette --
850	And he was ethe ynough to maken dwelle!
	And after this, withouten longe lette,
	The spices and the wyn men forth hem fette;
	And forth they speke of this and that yfeere,
	As frendes don, of which som shal ye heere.
855	He gan first fallen of the werre in speche
	Bitwixe hem and the folk of Troie town;
	And of th' assege he gan hire ek biseche
	To telle hym what was hire opynyoun;
	Fro that demaunde he so descendeth down
860	To axen hire if that hire straunge thoughte
	The Grekis gise and werkes that they wroughte;
	And whi hire fader tarieth so longe
	To wedden hire unto som worthy wight.
	Criseyde, that was in hire peynes stronge
865	For love of Troilus, hire owen knyght,
	As ferforth as she konnyng hadde or myght
	Answerde hym tho; but as of his entente,
	It semed nat she wiste what he mente.
	But natheles, this ilke Diomede
870	Gan in hymself assure, and thus he seyde:
	"If ich aright have taken of yow hede,
	Me thynketh thus, O lady myn, Criseyde,
	That syn I first hond on youre bridel leyde,
	Whan ye out come of Troie by the morwe,
875	Ne koude I nevere sen yow but in sorwe.
	"Kan I nat seyn what may the cause be,
	But if for love of som Troian it were,
	The which right sore wolde athynken me
	That ye for any wight that dwelleth there
880	Sholden spille a quarter of a tere
	Or pitously youreselven so bigile --
	For dredeles, it is nought worth the while.
	"The folk of Troie, as who seyth, alle and some
	In prisoun ben, as ye youreselven se;
885	Nor thennes shal nat oon on-lyve come
	For al the gold atwixen sonne and se.
	Trusteth wel, and understondeth me,
	Ther shal nat oon to mercy gon on-lyve,
	Al were he lord of worldes twies fyve!
890	"Swich wreche on hem for fecchynge of Eleyne
	Ther shal ben take, er that we hennes wende,
	That Manes, which that goddes ben of peyne,
	Shal ben agast that Grekes wol hem shende,
	And men shul drede, unto the worldes ende,
895	From hennesforth to ravysshen any queene,
	So cruel shal oure wreche on hem be seene.
	"And but if Calkas lede us with ambages --
	That is to seyn, with double wordes slye,
	Swiche as men clepen a word with two visages --
900	Ye shal wel knowen that I naught ne lie,
	And al this thyng right sen it with youre ye,
	And that anon, ye nyl nat trowe how sone;
	Now taketh hede, for it is for to doone.
	"What! Wene ye youre wise fader wolde
905	Han yeven Antenor for yow anon,
	If he ne wiste that the cite sholde
	Destroied ben? Whi, nay, so mote I gon!
	He knew ful wel ther shal nat scapen oon
	That Troian is. and for the grete feere
910	He dorste nat ye dwelte lenger there.
	"What wol ye more, lufsom lady deere?
	Lat Troie and Troian fro youre herte pace!
	Drif out that bittre hope, and make good cheere,
	And clepe ayeyn the beaute of youre face
915	That ye with salte teris so deface,
	For Troie is brought in swich a jupartie
	That it to save is now no remedie.
	"And thenketh wel, ye shal in Grekis fynde
	A moore parfit love, er it be nyght,
920	Than any Troian is, and more kynde,
	And bet to serven yow wol don his myght.
	And if ye vouchesauf, my lady bright,
	I wol ben he to serven yow myselve,
	Yee, levere than be kyng of Greces twelve!"
925	And with that word he gan to waxen red,
	And in his speche a litel wight he quok,
	And caste asyde a litel wight his hed,
	And stynte a while; and afterward he wok,
	And sobreliche on hire he threw his lok,
930	And seyde, "I am, al be it yow no joie,
	As gentil man as any wight in Troie.
	"For if my fader Tideus," he seyde,
	"Ilyved hadde, ich hadde ben er this
	Of Calydoyne and Arge a kyng, Criseyde!
935	And so hope I that I shal yet, iwis.
	But he was slayn -- allas, the more harm is. --
	Unhappily at Thebes al to rathe,
	Polymyte and many a man to scathe.
	"But herte myn, syn that I am youre man --
940	And ben the first of whom I seche grace --
	To serve yow as hertely as I kan,
	And evere shal whil I to lyve have space,
	So, er that I departe out of this place,
	Ye wol me graunte that I may to-morwe,
945	At bettre leyser, telle yow my sorwe."
	What sholde I telle his wordes that he seyde?
	He spak inough for o day at the meeste.
	It preveth wel; he spak so that Criseyde
	Graunted on the morwe, at his requeste,
950	For to speken with hym at the leeste --
	So that he nolde speke of swich matere.
	And thus to hym she seyde, as ye may here,
	As she that hadde hire herte on Troilus
	So faste that ther may it non arace;
955	And strangely she spak, and seyde thus:
	"O Diomede, I love that ilke place
	Ther I was born; and Joves, for his grace,
	Delyvere it soone of al that doth it care!
	God, for thy myght, so leve it wel to fare!
960	"That Grekis wolde hire wrath on Troie wreke,
	If that they myght, I knowe it wel, iwis;
	But it shal naught byfallen as ye speke,
	And God toforn! And forther over this,
	I woot my fader wys and redy is,
965	And that he me hath bought, as ye me tolde,
	So deere, I am the more unto hym holde.
	"That Grekis ben of heigh condicioun
	I woot ek wel; but certeyn, men shal fynde
	As worthi folk withinne Troie town,
970	As konnyng, and as parfit, and as kynde,
	As ben bitwixen Orkades and Inde;
	And that ye koude wel yowre lady serve,
	I trowe ek wel, hire thank for to deserve.
	"But as to speke of love, ywis," she seyde,
975	"I hadde a lord, to whom I wedded was,
	The whos myn herte al was, til that he deyde;
	And other love, as help me now Pallas,
	Ther in myn herte nys, ne nevere was.
	And that ye ben of noble and heigh kynrede,
980	I have wel herd it tellen, out of drede.
	"And that doth me to han so gret a wonder
	That ye wol scornen any womman so.
	Ek, God woot, love and I ben fer ysonder!
	I am disposed bet, so mot I go,
985	Unto my deth, to pleyne and maken wo.
	What I shal after don I kan nat seye;
	But trewelich, as yet me list nat pleye.
	"Myn herte is now in tribulacioun,
	And ye in armes bisy day by day.
990	Herafter, whan ye wonnen han the town,
	Peraventure so it happen may
	That whan I se that nevere yit I say
	Than wol I werke that I nevere wroughte!
	This word to yow ynough suffisen oughte.
995	"To-morwe ek wol I speken with yow fayn,
	So that ye touchen naught of this matere.
	And whan yow list, ye may come here ayayn;
	And er ye gon, thus muche I sey yow here:
	As help me Pallas with hire heres clere,
1000	If that I sholde of any Grek han routhe,
	It sholde be youreselven, by my trouthe!
	"I say nat therfore that I wol yow love,
	N' y say nat nay; but in conclusioun,
	I mene wel, by God that sit above!"
1005	And therwithal she caste hire eyen down,
	And gan to sike, and seyde, "O Troie town,
	Yet bidde I God in quiete and in reste
	I may yow sen, or do myn herte breste."
	But in effect, and shortly for to seye,
1010	This Diomede al fresshly newe ayeyn
	Gan pressen on, and faste hire mercy preye;
	And after this, the sothe for to seyn,
	Hire glove he took, of which he was ful feyn;
	And finaly, whan it was woxen eve
1015	And al was wel, he roos and tok his leve.
	The brighte Venus folwede and ay taughte
	The wey ther brode Phebus down alighte;
	And Cynthea hire char-hors overraughte
	To whirle out of the Leoun, if she myghte;
1020	And Signifer his candels sheweth brighte
	Whan that Criseyde unto hire bedde wente
	Inwith hire fadres faire brighte tente,
	Retornyng in hire soule ay up and down
	The wordes of this sodeyn Diomede,
1025	His grete estat, and perel of the town,
	And that she was allone and hadde nede
	Of frendes help; and thus bygan to brede
	The cause whi, the sothe for to telle,
	That she took fully purpos for to dwelle.
1030	The morwen com, and gostly for to speke,
	This Diomede is come unto Criseyde;
	And shortly, lest that ye my tale breke,
	So wel he for hymselven spak and seyde
	That alle hire sikes soore adown he leyde;
1035	And finaly, the sothe for to seyne,
	He refte hire of the grete of al hire peyne.
	And after this the storie telleth us
	That she hym yaf the faire baye stede
	The which he ones wan of Troilus;
1040	And ek a broche -- and that was litel nede --
	That Troilus was, she yaf this Diomede.
	And ek, the bet from sorwe hym to releve,
	She made hym were a pencel of hire sleve.
	I fynde ek in stories elleswhere,
1045	Whan thorugh the body hurt was Diomede
	Of Troilus, tho wep she many a teere
	Whan that she saugh his wyde wowndes blede,
	And that she took, to kepen hym, good hede;
	And for to helen hym of his sorwes smerte,
1050	Men seyn -- I not -- that she yaf hym hire herte.
	But trewely, the storie telleth us,
	Ther made nevere womman moore wo
	Than she, whan that she falsed Troilus.
	She seyde, "Allas, for now is clene ago
1055	My name of trouthe in love, for everemo!
	For I have falsed oon the gentileste
	That evere was, and oon the worthieste!
	"Allas, of me, unto the worldes ende,
	Shal neyther ben ywriten nor ysonge
1060	No good word, for thise bokes wol me shende.
	O, rolled shal I ben on many a tonge!
	Thorughout the world my belle shal be ronge!
	And wommen moost wol haten me of alle.
	Allas, that swich a cas me sholde falle!
1065	"Thei wol seyn, in as muche as in me is,
	I have hem don dishonour, weylaway!
	Al be I nat the first that dide amys,
	What helpeth that to don my blame awey?
	But syn I se ther is no bettre way,
1070	And that to late is now for me to rewe,
	To Diomede algate I wol be trewe.
	"But, Troilus, syn I no bettre may,
	And syn that thus departen ye and I,
	Yet prey I God, so yeve yow right good day,
1075	As for the gentileste, trewely,
	That evere I say, to serven feythfully,
	And best kan ay his lady honour kepe."
	And with that word she brast anon to wepe.
	"And certes yow ne haten shal I nevere;
1080	And frendes love, that shal ye han of me,
	And my good word, al sholde I lyven evere.
	And trewely I wolde sory be
	For to seen yow in adversitee;
	And gilteles, I woot wel, I yow leve.
1085	But al shal passe; and thus take I my leve."
	But trewely, how longe it was bytwene
	That she forsok hym for this Diomede,
	Ther is non auctour telleth it, I wene.
	Take every man now to his bokes heede,
1090	He shal no terme fynden, out of drede.
	For though that he bigan to wowe hire soone,
	Er he hire wan, yet was ther more to doone.
	Ne me ne list this sely womman chyde
	Forther than the storye wol devyse.
1095	Hire name, allas, is publysshed so wide
	That for hire gilt it oughte ynough suffise.
	And if I myghte excuse hire any wise,
	For she so sory was for hire untrouthe,
	Iwis, I wolde excuse hire yet for routhe.
1100	This Troilus, as I byfore have told,
	Thus driveth forth, as wel as he hath myght;
	But often was his herte hoot and cold,
	And namely that ilke nynthe nyght,
	Which on the morwe she hadde hym bihight
1105	To com ayeyn. God woot, ful litel reste
	Hadde he that nyght -- nothyng to slepe hym leste.
	The laurer-crowned Phebus with his heete
	Gan, in his cours ay upward as he wente,
	To warmen of the est se the wawes weete,
1110	And Nysus doughter song with fressh entente,
	Whan Troilus his Pandare after sente;
	And on the walles of the town they pleyde,
	To loke if they kan sen aught of Criseyde.
	Tyl it was noon they stoden for to se
1115	Who that ther come, and every maner wight
	That com fro fer, they seyden it was she --
	Til that thei koude knowen hym aright.
	Now was his herte dul, now was it light.
	And thus byjaped stonden for to stare
1120	Aboute naught this Troilus and Pandare.
	To Pandarus this Troilus tho seyde,
	"For aught I woot, byfor noon, sikirly,
	Into this town ne comth nat here Criseyde.
	She hath ynough to doone, hardyly,
1125	To wynnen from hire fader, so trowe I.
	Hire olde fader wol yet make hire dyne
	Er that she go -- God yeve hys herte pyne!"
	Pandare answerede, "It may wel be, certeyn.
	And forthi lat us dyne, I the byseche,
1130	And after noon than maystow come ayeyn."
	And hom they go, withoute more speche,
	And comen ayeyn -- but longe may they seche
	Er that they fynde that they after cape.
	Fortune hem bothe thenketh for to jape!
1135	Quod Troilus, "I se wel now that she
	Is taried with hire olde fader so,
	That er she come, it wol neigh even be.
	Com forth; I wol unto the yate go.
	Thise porters ben unkonnyng evere mo,
1140	And I wol don hem holden up the yate
	As naught ne were, although she come late."
	The day goth faste, and after that com eve,
	And yet com nought to Troilus Criseyde.
	He loketh forth by hegge, by tre, by greve,
1145	And fer his hed over the wal he leyde;
	And at the laste he torned hym and seyde,
	"By God, I woot hire menyng now, Pandare!
	Almoost, ywys, al newe was my care.
	"Now douteles, this lady kan hire good;
1150	I woot she meneth riden pryvely.
	I comende hire wisdom, by myn hood!
	She wol nat maken peple nycely
	Gaure on hire whan she comth, but softely
	By nyghte into the town she thenketh ride.
1155	And, deere brother, thynk nat longe t' abide.
	"We han naught elles for to don, ywis.
	And Pandarus, now woltow trowen me?
	Have here my trouthe, I se hire! Yond she is.
	Heve up thyn eyen, man! Maistow nat se?"
1160	Pandare answerede, "Nay, so mote I the!
	Al wrong, by God! What saistow, man? Where arte?
	That I se yond nys but a fare-carte."
	"Allas, thow seyst right soth," quod Troilus.
	"But, hardily, it is naught al for nought
1165	That in myn herte I now rejoysse thus;
	It is ayeyns som good I have a thought.
	Not I nat how, but syn that I was wrought
	Ne felte I swich a comfort, dar I seye;
	She comth to-nyght, my lif that dorste I leye!"
1170	Pandare answerde, "It may be, wel ynough,"
	And held with hym of al that evere he seyde.
	But in his herte he thoughte, and softe lough,
	And to hymself ful sobreliche he seyde,
	"From haselwode, there joly Robyn pleyde,
1175	Shal come al that that thow abidest heere.
	Ye, fare wel al the snow of ferne yere!"
	The warden of the yates gan to calle
	The folk which that withoute the yates were,
	And bad hem dryven in hire bestes alle,
1180	Or all the nyght they moste bleven there.
	And fer withinne the nyght, with many a teere,
	This Troilus gan homward for to ride,
	For wel he seth it helpeth naught t' abide.
	But natheles, he gladed hym in this:
1185	He thought he misacounted hadde his day,
	And seyde, "I understonde have al amys.
	For thilke nyght I last Criseyde say,
	She seyde, `I shal ben here, if that I may,
	Er that the moone, O deere herte swete,
1190	The Leoun passe, out of this Ariete.'
	"For which she may yet holde al hire byheste."
	And on the morwe unto the yate he wente,
	And up and down, by west and ek by este,
	Upon the walles made he many a wente.
1195	But al for nought; his hope alwey hym blente.
	For which at nyght, in sorwe and sikes sore,
	He wente hym hom, withouten any more.
	His hope al clene out of his herte fledde;
	He nath wheron now lenger for to honge;
1200	But for the peyne hym thoughte his herte bledde,
	So were his throwes sharpe and wonder stronge;
	For whan he saugh that she abood so longe,
	He nyste what he juggen of it myghte,
	Syn she hath broken that she hym bihighte.
1205	The thridde, ferthe, fifte, sexte day
	After tho dayes ten of which I tolde,
	Bitwixen hope and drede his herte lay,
	Yet somwhat trustyng on hire hestes olde.
	But whan he saugh she nolde hire terme holde,
1210	He kan now sen non other remedie
	But for to shape hym soone for to dye.
	Therwith the wikked spirit, God us blesse,
	Which that men clepeth woode jalousie,
	Gan in hym crepe, in al this hevynesse;
1215	For which, by cause he wolde soone dye,
	He ne et ne drank, for his malencolye,
	And ek from every compaignye he fledde:
	This was the lif that al the tyme he ledde.
	He so defet was, that no manere man
1220	Unneth hym myghte knowen ther he wente;
	So was he lene, and therto pale and wan,
	And feble, that he walketh by potente;
	And with his ire he thus hymselve shente.
	But whoso axed hym wherof hym smerte,
1225	He seyde his harm was al aboute his herte.
	Priam ful ofte, and ek his moder deere,
	His bretheren and his sustren gonne hym freyne
	Whi he so sorwful was in al his cheere,
	And what thyng was the cause of al his peyne;
1230	But al for naught. He nolde his cause pleyne,
	But seyde he felte a grevous maladie
	Aboute his herte, and fayn he wolde dye.
	So on a day he leyde hym doun to slepe,
	And so byfel that yn his slep hym thoughte
1235	That in a forest faste he welk to wepe
	For love of here that hym these peynes wroughte;
	And up and doun as he the forest soughte,
	He mette he saugh a bor with tuskes grete,
	That slepte ayeyn the bryghte sonnes hete.
1240	And by this bor, faste in his armes folde,
	Lay, kyssyng ay, his lady bryght, Criseyde.
	For sorwe of which, whan he it gan byholde,
	And for despit, out of his slep he breyde,
	And loude he cride on Pandarus, and seyde:
1245	"O Pandarus, now know I crop and roote.
	I n' am but ded; ther nys noon other bote.
	"My lady bryght, Criseyde, hath me bytrayed,
	In whom I trusted most of ony wight.
	She elliswhere hath now here herte apayed.
1250	The blysful goddes thorugh here grete myght
	Han in my drem yshewed it ful right.
	Thus yn my drem Criseyde have I byholde" --
	And al this thing to Pandarus he tolde.
	"O my Criseyde, allas, what subtilte,
1255	What newe lust, what beaute, what science,
	What wratthe of juste cause have ye to me?
	What gilt of me, what fel experience
	Hath fro me raft, allas, thyn advertence?
	O trust, O feyth, O depe asseuraunce!
1260	Who hath me reft Criseyde, al my plesaunce?
	"Allas, whi leet I you from hennes go,
	For which wel neigh out of my wit I breyde?
	Who shal now trowe on any othes mo?
	God wot, I wende, O lady bright, Criseyde,
1265	That every word was gospel that ye seyde!
	But who may bet bigile, yf hym lyste,
	Than he on whom men weneth best to triste?
	"What shal I don, my Pandarus, allas?
	I fele now so sharp a newe peyne,
1270	Syn that ther lith no remedye in this cas,
	That bet were it I with myn hondes tweyne
	Myselven slowh alwey than thus to pleyne;
	For thorugh the deth my wo sholde han an ende,
	Ther every day with lyf myself I shende."
1275	Pandare answerde and seyde, "Allas the while
	That I was born! Have I nat seyd er this,
	That dremes many a maner man bigile?
	And whi? For folk expounden hem amys.
	How darstow seyn that fals thy lady ys
1280	For any drem, right for thyn owene drede?
	Lat be this thought; thow kanst no dremes rede.
	"Peraunter, ther thow dremest of this boor,
	It may so be that it may signifie
	Hire fader, which that old is and ek hoor,
1285	Ayeyn the sonne lith o poynt to dye,
	And she for sorwe gynneth wepe and crie,
	And kisseth hym, ther he lith on the grounde:
	Thus sholdestow thi drem aright expounde!"
	"How myghte I than don," quod Troilus,
1290	"To knowe of this, yee, were it nevere so lite?"
	"Now seystow wisly," quod this Pandarus;
	"My red is this: syn thow kanst wel endite,
	That hastily a lettre thow hire write,
	Thorugh which thow shalt wel bryngyn it aboute
1295	To know a soth of that thow art in doute.
	"And se now whi: for this I dar wel seyn,
	That if so is that she untrewe be,
	I kan nat trowen that she wol write ayeyn.
	And if she write, thow shalt ful sone yse
1300	As wheither she hath any liberte
	To come ayeyn; or ellis in som clause,
	If she be let, she wol assigne a cause.
	"Thow hast nat writen hire syn that she wente,
	Nor she to the; and this I dorste laye,
1305	Ther may swich cause ben in hire entente
	That hardily thow wolt thiselven saye
	That hire abod the best is for yow twaye.
	Now writ hire thanne, and thow shalt feele sone
	A soth of al. Ther is namore to done."
1310	Acorded ben to this conclusioun,
	And that anon, thise ilke lordes two;
	And hastily sit Troilus adown,
	And rolleth in his herte to and fro
	How he may best discryven hire his wo.
1315	And to Criseyde, his owen lady deere,
	He wrot right thus, and seyde as ye may here:
	"Right fresshe flour, whos I ben have and shal,
	Withouten part of elleswhere servyse,
	With herte, body, lif, lust, thought, and al,
1320	I, woful wyght, in everich humble wise
	That tonge telle or herte may devyse,
	As ofte as matere occupieth place,
	Me recomaunde unto youre noble grace.
	"Liketh yow to witen, swete herte,
1325	As ye wel knowe, how longe tyme agon
	That ye me lefte in aspre peynes smerte,
	Whan that ye wente, of which yet boote non
	Have I non had, but evere wors bigon
	Fro day to day am I, and so mot dwelle,
1330	While it yow list, of wele and wo my welle.
	"For which to yow, with dredful herte trewe,
	I write, as he that sorwe drifth to write,
	My wo, that everich houre encresseth newe,
	Compleynyng, as I dar or kan endite.
1335	And that defaced is, that may ye wite
	The teris which that fro myn eyen reyne,
	That wolden speke, if that they koude, and pleyne.
	"Yow first biseche I, that youre eyen clere
	To loke on this defouled ye nat holde;
1340	And over al this, that ye, my lady deere,
	Wol vouchesauf this lettre to byholde;
	And by the cause ek of my cares colde
	That sleth my wit, if aught amys m' asterte,
	Foryeve it me, myn owen swete herte!
1345	"If any servant dorste or oughte of right
	Upon his lady pitously compleyne,
	Thanne wene I that ich oughte be that wight,
	Considered this, that ye thise monthes tweyne
	Han taried, ther ye seyden, soth to seyne,
1350	But dayes ten ye nolde in oost sojourne --
	But in two monthes yet ye nat retourne.
	"But for as muche as me moot nedes like
	Al that yow liste, I dar nat pleyne moore,
	But humblely, with sorwful sikes sike,
1355	Yow write ich myn unresty sorwes soore,
	Fro day to day desiryng evere moore
	To knowen fully, if youre wille it weere,
	How ye han ferd and don whil ye be theere;
	"The whos welfare and hele ek God encresse
1360	In honour swich that upward in degree
	It growe alwey, so that it nevere cesse.
	Right as youre herte ay kan, my lady free,
	Devyse, I prey to God so moot it be,
	And graunte it that ye soone upon me rewe,
1365	As wisly as in al I am yow trewe.
	"And if yow liketh knowen of the fare
	Of me, whos wo ther may no wit discryve,
	I kan namore but, chiste of every care,
	At wrytyng of this lettre I was on-lyve,
1370	Al redy out my woful gost to dryve,
	Which I delaye, and holde hym yet in honde,
	Upon the sighte of matere of youre sonde.
	"Myn eyen two, in veyn with which I se,
	Of sorwful teris salte arn waxen welles;
1375	My song, in pleynte of myn adversitee;
	My good, in harm; myn ese ek woxen helle is.
	My joie, in wo; I kan sey yow naught ellis,
	But torned is -- for which my lif I warie --
	Everich joie or ese in his contrarie;
1380	"Which with youre comyng hom ayeyn to Troie
	Ye may redresse, and more a thousand sithe
	Than evere ich hadde encressen in me joie.
	For was ther nevere herte yet so blithe
	To han his lif as I shal ben as swithe
1385	As I yow se; and though no manere routhe
	Commeve yow, yet thynketh on youre trouthe.
	"And if so be my gilt hath deth deserved,
	Or if yow list namore upon me se,
	In guerdoun yet of that I have yow served,
1390	Byseche I yow, myn owen lady free,
	That hereupon ye wolden write me,
	For love of God, my righte lode-sterre,
	That deth may make an ende of al my werre;
	"If other cause aught doth yow for to dwelle,
1395	That with youre lettre ye me recomforte;
	For though to me youre absence is an helle,
	With pacience I wol my wo comporte,
	And with youre lettre of hope I wol desporte.
	Now writeth, swete, and lat me thus nat pleyne;
1400	With hope, or deth, delivereth me fro peyne.
	"Iwis, myne owene deere herte trewe,
	I woot that whan ye next upon me se,
	So lost have I myn hele and ek myn hewe,
	Criseyde shal nought konne knowen me.
1405	Iwys, myn hertes day, my lady free,
	So thursteth ay myn herte to byholde
	Youre beute, that my lif unnethe I holde.
	"I say namore, al have I for to seye
	To yow wel more than I telle may;
1410	But wheither that ye do me lyve or deye,
	Yet praye I God, so yeve yow right good day!
	And fareth wel, goodly, faire, fresshe may,
	As she that lif or deth may me comande!
	And to youre trouthe ay I me recomande,
1415	"With hele swich that, but ye yeven me
	The same hele, I shal non hele have.
	In yow lith, whan yow liste that it so be,
	The day in which me clothen shal my grave;
	In yow my lif, in yow myght for to save
1420	Me fro disese of alle peynes smerte;
	And far now wel, myn owen swete herte! Le vostre T."
	This lettre forth was sent unto Criseyde,
	Of which hire answere in effect was this:
	Ful pitously she wroot ayeyn, and seyde,
1425	That also sone as that she myghte, ywys,
	She wolde come, and mende al that was mys.
	And fynaly she wroot and seyde hym thenne,
	She wolde come, ye, but she nyste whenne.
	But in hire lettre made she swich festes
1430	That wonder was, and swerth she loveth hym best,
	Of which he fond but botmeles bihestes.
	But Troilus, thow maist now, est or west,
	Pipe in an ivy lef, if that the lest!
	Thus goth the world. God shilde us fro meschaunce,
1435	And every wight that meneth trouthe avaunce!
	Encressen gan the wo fro day to nyght
	Of Troilus, for tarying of Criseyde;
	And lessen gan his hope and ek his myght,
	For which al down he in his bed hym leyde.
1440	He ne eet, ne dronk, ne slep, ne word seyde,
	Ymagynyng ay that she was unkynde,
	For which wel neigh he wex out of his mynde.
	This drem, of which I told have ek byforn,
	May nevere outen of his remembraunce.
1445	He thought ay wel he hadde his lady lorn,
	And that Joves of his purveyaunce
	Hym shewed hadde in slep the signifiaunce
	Of hire untrouthe and his disaventure,
	And that the boor was shewed hym in figure.
1450	For which he for Sibille his suster sente,
	That called was Cassandre ek al aboute,
	And al his drem he tolde hire er he stente,
	And hire bisoughte assoilen hym the doute
	Of the stronge boor with tuskes stoute;
1455	And fynaly, withinne a litel stounde,
	Cassandre hym gan right thus his drem expounde:
	She gan first smyle, and seyde, "O brother deere,
	If thow a soth of this desirest knowe,
	Thow most a fewe of olde stories heere,
1460	To purpos how that Fortune overthrowe
	Hath lordes olde, thorugh which, withinne a throwe,
	Thow wel this boor shalt knowe, and of what kynde
	He comen is, as men in bokes fynde.
	"Diane, which that wroth was and in ire
1465	For Grekis nolde don hire sacrifice,
	Ne encens upon hire auter sette afire,
	She, for that Grekis gonne hire so despise,
	Wrak hire in a wonder cruel wise;
	For with a boor as gret as ox in stalle
1470	She made up frete hire corn and vynes alle.
	"To sle this boor was al the contre raysed,
	Amonges which ther com, this boor to se,
	A mayde, oon of this world the beste ypreysed;
	And Meleagre, lord of that contree,
1475	He loved so this fresshe mayden free
	That with his manhod, er he wolde stente,
	This boor he slough, and hire the hed he sente;
	"Of which, as olde bokes tellen us,
	Ther ros a contek and a gret envye;
1480	And of this lord descended Tideus
	By ligne, or ellis olde bookes lye.
	But how this Meleagre gan to dye
	Thorugh his moder, wol I yow naught telle,
	For al to longe it were for to dwelle."
1485	She tolde ek how Tideus, er she stente,
	Unto the stronge citee of Thebes,
	To cleymen kyngdom of the citee, wente,
	For his felawe, daun Polymytes,
	Of which the brother, daun Ethiocles,
1490	Ful wrongfully of Thebes held the strengthe;
	This tolde she by proces, al by lengthe.
	She tolde ek how Hemonydes asterte,
	Whan Tideus slough fifty knyghtes stoute.
	She tolde ek alle the prophecyes by herte,
1495	And how that seven kynges with hire route
	Bysegeden the citee al aboute;
	And of the holy serpent, and the welle,
	And of the furies, al she gan hym telle;
	Of Archymoris brennynge and the pleyes,
1500	And how Amphiorax fil thorugh the grounde,
	How Tideus was sleyn, lord of Argeyes,
	And how Ypomedoun in litel stounde
	Was dreynt, and ded Parthonope of wownde;
	And also how Capaneus the proude
1505	With thonder-dynt was slayn, that cride loude.
	She gan ek telle hym how that eyther brother,
	Ethiocles and Polymyte also,
	At a scarmuche ech of hem slough other,
	And of Argyves wepynge and hire wo;
1510	And how the town was brent, she tolde ek tho;
	And so descendeth down from gestes olde
	To Diomede, and thus she spak and tolde:
	"This ilke boor bitokneth Diomede,
	Tideus sone, that down descended is
1515	Fro Meleagre, that made the boor to blede;
	And thy lady, wherso she be, ywis,
	This Diomede hire herte hath, and she his.
	Wep if thow wolt, or lef, for out of doute,
	This Diomede is inne, and thow art oute."
1520	"Thow seyst nat soth," quod he, "thow sorceresse,
	With al thy false goost of prophecye!
	Thow wenest ben a gret devyneresse!
	Now sestow nat this fool of fantasie
	Peyneth hire on ladys for to lye?
1525	Awey!" quod he. "Ther Joves yeve the sorwe!
	Thow shalt be fals, peraunter, yet tomorwe!
	"As wel thow myghtest lien on Alceste,
	That was of creatures, but men lye,
	That evere weren, kyndest and the beste!
1530	For whan hire housbonde was in jupertye
	To dye hymself but if she wolde dye,
	She ches for hym to dye and gon to helle,
	And starf anon, as us the bokes telle."
	Cassandre goth, and he with cruel herte
1535	Foryat his wo, for angre of hire speche;
	And from his bed al sodeynly he sterte,
	As though al hool hym hadde ymad a leche.
	And day by day he gan enquere and seche
	A sooth of this with al his fulle cure;
1540	And thus he drieth forth his aventure.
	Fortune, which that permutacioun
	Of thynges hath, as it is hire comitted
	Thorugh purveyaunce and disposicioun
	Of heighe Jove, as regnes shal be flitted
1545	Fro folk in folk, or when they shal be smytted,
	Gan pulle awey the fetheres brighte of Troie
	Fro day to day, til they ben bare of joie.
	Among al this, the fyn of the parodie
	Of Ector gan aprochen wonder blyve.
1550	The fate wolde his soule sholde unbodye,
	And shapen hadde a mene it out to dryve,
	Ayeyns which fate hym helpeth nat to stryve;
	But on a day to fighten gan he wende,
	At which -- allas! -- he caughte his lyves ende.
1555	For which me thynketh every manere wight
	That haunteth armes oughte to biwaille
	The deth of hym that was so noble a knyght;
	For as he drough a kyng by th' aventaille,
	Unwar of this, Achilles thorugh the maille
1560	And thorugh the body gan hym for to ryve;
	And thus this worthi knyght was brought of lyve.
	For whom, as olde bokes tellen us,
	Was mad swich wo that tonge it may nat telle,
	And namely, the sorwe of Troilus,
1565	That next hym was of worthynesse welle;
	And in this wo gan Troilus to dwelle
	That, what for sorwe, and love, and for unreste,
	Ful ofte a day he bad his herte breste.
	But natheles, though he gan hym dispaire,
1570	And dradde ay that his lady was untrewe,
	Yet ay on hire his herte gan repaire.
	And as thise lovers don, he soughte ay newe
	To gete ayeyn Criseyde, brighte of hewe;
	And in his herte he wente hire excusynge,
1575	That Calkas caused al hire tariynge.
	And ofte tyme he was in purpos grete
	Hymselven lik a pilgrym to desgise
	To seen hire; but he may nat contrefete
	To ben unknowen of folk that weren wise,
1580	Ne fynde excuse aright that may suffise
	If he among the Grekis knowen were;
	For which he wep ful ofte and many a tere.
	To hire he wroot yet ofte tyme al newe
	Ful pitously -- he lefte it nought for slouthe --
1585	Bisechyng hire that sithen he was trewe,
	That she wol come ayeyn and holde hire trouthe.
	For which Criseyde upon a day, for routhe --
	I take it so -- touchyng al this matere,
	Wrot hym ayeyn, and seyde as ye may here:
1590	"Cupides sone, ensample of goodlyheede,
	O swerd of knyghthod, sours of gentilesse,
	How myght a wight in torment and in drede
	And heleles, yow sende as yet gladnesse?
	I herteles, I sik, I in destresse!
1595	Syn ye with me, nor I with yow, may dele,
	Yow neyther sende ich herte may nor hele.
	"Youre lettres ful, the papir al ypleynted,
	Conceyved hath myn hertes pietee.
	I have ek seyn with teris al depeynted
1600	Youre lettre, and how that ye requeren me
	To come ayeyn, which yet ne may nat be;
	But whi, lest that this lettre founden were,
	No mencioun ne make I now, for feere.
	"Grevous to me, God woot, is youre unreste,
1605	Youre haste, and that the goddes ordinaunce
	It semeth nat ye take it for the beste.
	Nor other thyng nys in youre remembraunce,
	As thynketh me, but only youre plesaunce.
	But beth nat wroth, and that I yow biseche;
1610	For that I tarie is al for wikked speche.
	"For I have herd wel moore than I wende,
	Touchyng us two, how thynges han ystonde,
	Which I shal with dissymelyng amende.
	And beth nat wroth, I have ek understonde
1615	How ye ne do but holden me in honde.
	But now no force. I kan nat in yow gesse
	But alle trouthe and alle gentilesse.
	"Come I wole; but yet in swich disjoynte
	I stonde as now that what yer or what day
1620	That this shal be, that kan I naught apoynte.
	But in effect I pray yow, as I may,
	Of youre good word and of youre frendship ay;
	For trewely, while that my lif may dure,
	As for a frend ye may in me assure.
1625	"Yet preye ich yow, on yvel ye ne take
	That it is short which that I to yow write;
	I dar nat, ther I am, wel lettres make,
	Ne nevere yet ne koude I wel endite.
	Ek gret effect men write in place lite;
1630	Th' entente is al, and nat the lettres space.
	And fareth now wel. God have yow in his grace!
	La vostre Tr 5 C."
	This Troilus this lettre thoughte al straunge
	Whan he it saugh, and sorwfullich he sighte;
	Hym thoughte it lik a kalendes of chaunge.
1635	But fynaly, he ful ne trowen myghte
	That she ne wolde hym holden that she hyghte;
	For with ful yvel wille list hym to leve
	That loveth wel, in swich cas, though hym greve.
	But natheles men seyen that at the laste,
1640	For any thyng, men shal the soothe se;
	And swich a cas bitidde, and that as faste,
	That Troilus wel understod that she
	Nas nought so kynde as that hire oughte be.
	And fynaly, he woot now out of doute
1645	That al is lost that he hath ben aboute.
	Stood on a day in his malencolie
	This Troilus, and in suspecioun
	Of hire for whom he wende for to dye.
	And so bifel that thorughout Troye town,
1650	As was the gise, iborn was up and down
	A manere cote-armure, as seith the storie,
	Byforn Deiphebe, in signe of his victorie;
	The whiche cote, as telleth Lollius,
	Deiphebe it hadde rent fro Diomede
1655	The same day. And whan this Troilus
	It saugh, he gan to taken of it hede,
	Avysyng of the lengthe and of the brede,
	And al the werk; but as he gan byholde,
	Ful sodeynly his herte gan to colde,
1660	As he that on the coler fond withinne
	A broch that he Criseyde yaf that morwe
	That she from Troie moste nedes twynne,
	In remembraunce of hym and of his sorwe.
	And she hym leyde ayeyn hire feith to borwe
1665	To kepe it ay! But now ful wel he wiste,
	His lady nas no lenger on to triste.
	He goth hym hom and gan ful soone sende
	For Pandarus, and al this newe chaunce,
	And of this broche, he tolde hym word and ende,
1670	Compleynyng of hire hertes variaunce,
	His longe love, his trouthe, and his penaunce.
	And after deth, withouten wordes moore,
	Ful faste he cride, his reste hym to restore.
	Than spak he thus, "O lady myn, Criseyde,
1675	Where is youre feith, and where is youre biheste?
	Where is youre love? Where is youre trouthe?" he seyde.
	"Of Diomede have ye now al this feeste!
	Allas, I wolde han trowed atte leeste
	That syn ye nolde in trouthe to me stonde,
1680	That ye thus nolde han holden me in honde!
	"Who shal now trowe on any othes mo?
	Allas, I nevere wolde han wend, er this,
	That ye, Criseyde, koude han chaunged so;
	Ne, but I hadde agilt and don amys,
1685	So cruel wende I nought youre herte, ywis,
	To sle me thus! Allas, youre name of trouthe
	Is now fordon, and that is al my routhe.
	"Was ther non other broch yow liste lete
	To feffe with youre newe love," quod he,
1690	"But thilke broch that I, with teris wete,
	Yow yaf as for a remembraunce of me?
	Non other cause, allas, ne hadde ye
	But for despit, and ek for that ye mente
	Al outrely to shewen youre entente.
1695	"Thorugh which I se that clene out of youre mynde
	Ye han me cast -- and I ne kan nor may,
	For al this world, withinne myn herte fynde
	To unloven yow a quarter of a day!
	In corsed tyme I born was, weilaway,
1700	That yow, that doon me al this wo endure,
	Yet love I best of any creature!
	"Now God," quod he, "me sende yet the grace
	That I may meten with this Diomede!
	And trewely, if I have myght and space,
1705	Yet shal I make, I hope, his sydes blede.
	O God," quod he, "that oughtest taken heede
	To fortheren trouthe, and wronges to punyce,
	Whi nyltow don a vengeaunce of this vice?
	"O Pandarus, that in dremes for to triste
1710	Me blamed hast, and wont art oft upbreyde,
	Now maistow sen thiself, if that the liste,
	How trewe is now thi nece, bright Criseyde!
	In sondry formes, God it woot," he seyde,
	"The goddes shewen bothe joie and tene
1715	In slep, and by my drem it is now sene.
	"And certeynly, withouten moore speche,
	From hennesforth, as ferforth as I may,
	Myn owen deth in armes wol I seche;
	I recche nat how soone be the day!
1720	But trewely, Criseyde, swete may,
	Whom I have ay with al my myght yserved,
	That ye thus doon, I have it nat deserved."
	This Pandarus, that al thise thynges herde,
	And wiste wel he seyde a soth of this,
1725	He nought a word ayeyn to hym answerde;
	For sory of his frendes sorwe he is,
	And shamed for his nece hath don amys,
	And stant, astoned of thise causes tweye,
	As stille as ston; a word ne kowde he seye.
1730	But at the laste thus he spak, and seyde:
	"My brother deer, I may do the namore.
	What sholde I seyen? I hate, ywys, Cryseyde;
	And, God woot, I wol hate hire evermore!
	And that thow me bisoughtest don of yoore,
1735	Havyng unto myn honour ne my reste
	Right no reward, I dide al that the leste.
	"If I dide aught that myghte liken the,
	It is me lief; and of this tresoun now,
	God woot that it a sorwe is unto me!
1740	And dredeles, for hertes ese of yow,
	Right fayn I wolde amende it, wiste I how.
	And fro this world, almyghty God I preye
	Delivere hire soon! I kan namore seye."
	Gret was the sorwe and pleynte of Troilus,
1745	But forth hire cours Fortune ay gan to holde.
	Criseyde loveth the sone of Tideus,
	And Troilus moot wepe in cares colde.
	Swich is this world, whoso it kan byholde;
	In ech estat is litel hertes reste.
1750	God leve us for to take it for the beste!
	In many cruel bataille, out of drede,
	Of Troilus, this ilke noble knyght,
	As men may in thise olde bokes rede,
	Was seen his knyghthod and his grete myght;
1755	And dredeles, his ire, day and nyght,
	Ful cruwely the Grekis ay aboughte;
	And alwey moost this Diomede he soughte.
	And ofte tyme, I fynde that they mette
	With blody strokes and with wordes grete,
1760	Assayinge how hire speres weren whette;
	And, God it woot, with many a cruel hete
	Gan Troilus upon his helm to bete!
	But natheles, Fortune it naught ne wolde
	Of oothers hond that eyther deyen sholde.
1765	And if I hadde ytaken for to write
	The armes of this ilke worthi man,
	Than wolde ich of his batailles endite;
	But for that I to writen first bigan
	Of his love, I have seyd as I kan --
1770	His worthi dedes, whoso list hem heere,
	Rede Dares, he kan telle hem alle ifeere --
	Bysechyng every lady bright of hewe,
	And every gentil womman, what she be,
	That al be that Criseyde was untrewe,
1775	That for that gilt she be nat wroth with me.
	Ye may hire gilt in other bokes se;
	And gladlier I wol write, yif yow leste,
	Penolopees trouthe and good Alceste.
	N' y sey nat this al oonly for thise men,
1780	But moost for wommen that bitraised be
	Thorugh false folk -- God yeve hem sorwe, amen! --
	That with hire grete wit and subtilte
	Bytraise yow. And this commeveth me
	To speke, and in effect yow alle I preye,
1785	Beth war of men, and herkneth what I seye!
	Go, litel bok, go, litel myn tragedye,
	Ther God thi makere yet, er that he dye,
	So sende myght to make in som comedye!
	But litel book, no makyng thow n' envie,
1790	But subgit be to alle poesye;
	And kis the steppes where as thow seest pace
	Virgile, Ovide, Omer, Lucan, and Stace.
	And for ther is so gret diversite
	In Englissh and in writyng of oure tonge,
1795	So prey I God that non myswrite the,
	Ne the mysmetre for defaute of tonge;
	And red wherso thow be, or elles songe,
	That thow be understonde, God I biseche!
	But yet to purpos of my rather speche:
1800	The wrath, as I bigan yow for to seye,
	Of Troilus the Grekis boughten deere,
	For thousandes his hondes maden deye,
	As he that was withouten any peere,
	Save Ector, in his tyme, as I kan heere.
1805	But -- weilawey, save only Goddes wille,
	Despitously hym slough the fierse Achille.
	And whan that he was slayn in this manere,
	His lighte goost ful blisfully is went
	Up to the holughnesse of the eighthe spere,
1810	In convers letyng everich element;
	And ther he saugh with ful avysement
	The erratik sterres, herkenyng armonye
	With sownes ful of hevenyssh melodie.
	And down from thennes faste he gan avyse
1815	This litel spot of erthe that with the se
	Embraced is, and fully gan despise
	This wrecched world, and held al vanite
	To respect of the pleyn felicite
	That is in hevene above; and at the laste,
1820	Ther he was slayn his lokyng down he caste,
	And in hymself he lough right at the wo
	Of hem that wepten for his deth so faste,
	And dampned al oure werk that foloweth so
	The blynde lust, the which that may nat laste,
1825	And sholden al oure herte on heven caste;
	And forth he wente, shortly for to telle,
	Ther as Mercurye sorted hym to dwelle.
	Swich fyn hath, lo, this Troilus for love!
	Swich fyn hath al his grete worthynesse!
1830	Swich fyn hath his estat real above!
	Swich fyn his lust, swich fyn hath his noblesse!
	Swych fyn hath false worldes brotelnesse!
	And thus bigan his lovyng of Criseyde,
	As I have told, and in this wise he deyde.
1835	O yonge, fresshe folkes, he or she,
	In which that love up groweth with youre age,
	Repeyreth hom fro worldly vanyte,
	And of youre herte up casteth the visage
	To thilke God that after his ymage
1840	Yow made, and thynketh al nys but a faire,
	This world that passeth soone as floures faire.
	And loveth hym the which that right for love
	Upon a crois, oure soules for to beye,
	First starf, and roos, and sit in hevene above;
1845	For he nyl falsen no wight, dar I seye,
	That wol his herte al holly on hym leye.
	And syn he best to love is, and most meke,
	What nedeth feynede loves for to seke?
	Lo here, of payens corsed olde rites!
1850	Lo here, what alle hire goddes may availle!
	Lo here, thise wrecched worldes appetites!
	Lo here, the fyn and guerdoun for travaille
	Of Jove, Appollo, of Mars, of swich rascaille!
	Lo here, the forme of olde clerkis speche
1855	In poetrie, if ye hire bokes seche.
	O moral Gower, this book I directe
	To the and to the, philosophical Strode,
	To vouchen sauf, ther nede is, to correcte,
	Of youre benignites and zeles goode.
1860	And to that sothfast Crist, that starf on rode,
	With al myn herte of mercy evere I preye,
	And to the Lord right thus I speke and seye:
	Thow oon, and two, and thre, eterne on lyve,
	That regnest ay in thre, and two, and oon,
1865	Uncircumscript, and al maist circumscrive,
	Us from visible and invisible foon
	Defende, and to thy mercy, everichon,
	So make us, Jesus, for thi mercy, digne,
	For love of mayde and moder thyn benigne.
1870	Amen.

Explicit liber Troili Criseydis.

Site Updated June 15, 2011