Chaucer Texts

eChaucer ¤ Chaucer in the Twenty-First Century

Troilus and Criseyde
Book III
Incipit prohemium tercii libri.

	O blisful light of which the bemes clere
	Adorneth al the thridde heven faire!
	O sonnes lief, O Joves doughter deere,
	Plesance of love, O goodly debonaire,
5	In gentil hertes ay redy to repaire!
	O veray cause of heele and of gladnesse,
	Iheryed be thy myght and thi goodnesse!
	In hevene and helle, in erthe and salte see
	Is felt thi myght, if that I wel descerne,
10	As man, brid, best, fissh, herbe, and grene tree
	Thee fele in tymes with vapour eterne.
	God loveth, and to love wol nought werne,
	And in this world no lyves creature
	Withouten love is worth, or may endure.
15	Ye Joves first to thilke effectes glade,
	Thorugh which that thynges lyven alle and be,
	Comeveden, and amorous him made
	On mortal thyng, and as yow list, ay ye
	Yeve hym in love ese or adversitee,
20	And in a thousand formes down hym sente
	For love in erthe, and whom yow liste he hente.
	Ye fierse Mars apaisen of his ire,
	And as yow list, ye maken hertes digne;
	Algates hem that ye wol sette a-fyre,
25	They dreden shame, and vices they resygne;
	Ye do hem corteys be, fresshe and benigne;
	And heighe or lowe, after a wight entendeth,
	The joies that he hath, youre myght it sendeth.
	Ye holden regne and hous in unitee;
30	Ye sothfast cause of frendship ben also;
	Ye knowe al thilke covered qualitee
	Of thynges, which that folk on wondren so,
	Whan they kan nought construe how it may jo
	She loveth hym, or whi he loveth here,
35	As whi this fissh, and naught that, comth to were.
	Ye folk a lawe han set in universe,
	And this knowe I by hem that lovers be,
	That whoso stryveth with yow hath the werse.
	Now, lady bryght, for thi benignite,
40	At reverence of hem that serven the,
	Whos clerc I am, so techeth me devyse
	Som joye of that is felt in thi servyse.
	Ye in my naked herte sentement
	Inhielde, and do me shewe of thy swetnesse.
45	Caliope, thi vois be now present,
	For now is nede: sestow nought my destresse,
	How I mot telle anonright the gladnesse
	Of Troilus, to Venus heryinge?
	To which gladnesse, who nede hath, God hym brynge!

Explicit prohemium tercii libri.
Incipit liber tercius.

50	Lay al this mene while Troilus,
	Recordyng his lesson in this manere:
	"Mafay," thoughte he, "thus wol I sey, and thus;
	Thus wol I pleyne unto my lady dere;
	That word is good, and this shal be my cheere;
55	This nyl I nought foryeten in no wise."
	God leve hym werken as he kan devyse!
	And, Lord, so that his herte gan to quappe,
	Heryng hire come, and shorte for to sike!
	And Pandarus, that ledde hire by the lappe,
60	Com ner, and gan in at the curtyn pike,
	And seyde, "God do boot on alle syke!
	Se who is here yow comen to visite:
	Lo, here is she that is youre deth to wite."
	Therwith it semed as he wepte almost.
65	"Ha, a," quod Troilus so reufully,
	"Wher me be wo, O myghty God, thow woost!
	Who is al ther? I se nought trewely."
	"Sire," quod Criseyde, "it is Pandare and I."
	"Ye, swete herte? Allas, I may nought rise,
70	To knele and do yow honour in som wyse."
	And dressed hym upward, and she right tho
	Gan bothe hire hondes softe upon hym leye.
	"O, for the love of God, do ye nought so
	To me," quod she, "I! What is this to seye?
75	Sire, comen am I to yow for causes tweye:
	First, yow to thonke, and of youre lordshipe eke
	Continuance I wolde yow biseke."
	This Troilus, that herde his lady preye
	Of lordshipe hym, wax neither quyk ne ded,
80	Ne myghte o word for shame to it seye,
	Although men sholde smyten of his hed.
	But Lord, so he wex sodeynliche red,
	And sire, his lessoun, that he wende konne
	To preyen hire, is thorugh his wit ironne.
85	Criseyde al this aspied wel ynough,
	For she was wis, and loved hym nevere the lasse,
	Al nere he malapert, or made it tough,
	Or was to bold, to synge a fool a masse.
	But whan his shame gan somwhat to passe,
90	His resons, as I may my rymes holde,
	I yow wol telle, as techen bokes olde.
	In chaunged vois, right for his verray drede,
	Which vois ek quook, and therto his manere
	Goodly abaist, and now his hewes rede,
95	Now pale, unto Criseyde, his lady dere,
	With look down cast and humble iyolden chere,
	Lo, the alderfirste word that hym asterte
	Was, twyes, "Mercy, mercy, swete herte!"
	And stynte a while, and whan he myghte out brynge,
100	The nexte word was, "God woot, for I have,
	As ferforthly as I have had konnynge,
	Ben youres al, God so my soule save,
	And shal til that I, woful wight, be grave!
	And though I dar, ne kan, unto yow pleyne,
105	Iwis, I suffre nought the lasse peyne.
	"Thus muche as now, O wommanliche wif,
	I may out brynge, and if this yow displese,
	That shal I wreke upon myn owen lif
	Right soone, I trowe, and do youre herte an ese,
110	If with my deth youre wreththe may apese.
	But syn that ye han herd me somwhat seye,
	Now recche I nevere how soone that I deye."
	Therwith his manly sorwe to biholde
	It myghte han mad an herte of stoon to rewe;
115	And Pandare wep as he to water wolde,
	And poked evere his nece new and newe,
	And seyde, "Wo bygon ben hertes trewe!
	For love of God, make of this thing an ende,
	Or sle us both at ones er ye wende."
120	"I, what?" quod she, "by God and by my trouthe,
	I not nat what ye wilne that I seye."
	"I, what?" quod he, "That ye han on hym routhe,
	For Goddes love, and doth hym nought to deye!"
	"Now than thus," quod she, "I wolde hym preye
125	To telle me the fyn of his entente.
	Yet wist I nevere wel what that he mente."
	"What that I mene, O swete herte deere?"
	Quod Troilus, "O goodly, fresshe free,
	That with the stremes of youre eyen cleere
130	Ye wolde somtyme frendly on me see,
	And thanne agreen that I may ben he,
	Withouten braunche of vice on any wise,
	In trouthe alwey to don yow my servise,
	"As to my lady right and chief resort,
135	With al my wit and al my diligence;
	And I to han, right as yow list, comfort,
	Under yowre yerde, egal to myn offence,
	As deth, if that I breke youre defence;
	And that ye deigne me so muchel honoure
140	Me to comanden aught in any houre;
	"And I to ben youre -- verray, humble, trewe,
	Secret, and in my paynes pacient,
	And evere mo desiren fresshly newe
	To serve, and ben ylike diligent,
145	And with good herte al holly youre talent
	Receyven wel, how sore that me smerte;
	Lo, this mene I, myn owen swete herte."
	Quod Pandarus, "Lo, here an hard requeste,
	And resonable, a lady for to werne!
150	Now, nece myn, by natal Joves feste,
	Were I a god, ye sholden sterve as yerne,
	That heren wel this man wol nothing yerne
	But youre honour, and sen hym almost sterve,
	And ben so loth to suffren hym yow serve."
155	With that she gan hire eyen on hym caste
	Ful esily and ful debonairly,
	Avysyng hire, and hied nought to faste
	With nevere a word, but seyde hym softely,
	"Myn honour sauf, I wol wel trewely,
160	And in swich forme as he gan now devyse,
	Receyven hym fully to my servyse,
	"Bysechyng hym, for Goddes love, that he
	Wolde, in honour of trouthe and gentilesse,
	As I wel mene, ek menen wel to me,
165	And myn honour with wit and bisynesse
	Ay kepe; and if I may don hym gladnesse,
	From hennesforth, iwys, I nyl nought feyne.
	Now beth al hool; no lenger ye ne pleyne.
	"But natheles, this warne I yow," quod she,
170	"A kynges sone although ye be, ywys,
	Ye shal namore han sovereignete
	Of me in love, than right in that cas is.
	N' y nyl forbere, if that ye don amys,
	To wratthe yow; and whil that ye me serve,
175	Chericen yow right after ye disserve.
	"And shortly, deere herte and al my knyght,
	Beth glad, and draweth yow to lustinesse,
	And I shal trewely, with al my myght,
	Youre bittre tornen al into swetenesse.
180	If I be she that may yow do gladnesse,
	For every wo ye shal recovere a blisse" --
	And hym in armes took, and gan hym kisse.
	Fil Pandarus on knees, and up his eyen
	To heven threw, and held his hondes highe:
185	"Immortal god," quod he, "that mayst nought deyen,
	Cupide I mene, of this mayst glorifie;
	And Venus, thow mayst maken melodie!
	Withouten hond, me semeth that in the towne,
	For this merveille ich here ech belle sowne.
190	"But ho! namore as now of this matere;
	For-whi this folk wol comen up anon,
	That han the lettre red; lo, I hem here.
	But I conjure the, Criseyde, anon,
	And to, thow Troilus, whan thow mayst goon,
195	That at myn hous ye ben at my warnynge,
	For I ful well shal shape youre comynge;
	"And eseth there youre hertes right ynough;
	And lat se which of yow shal bere the belle
	To speke of love aright!" -- therwith he lough --
200	"For ther have ye a leiser for to telle."
	Quod Troilus, "How longe shal I dwelle,
	Er this be don?" Quod he, "Whan thow mayst ryse,
	This thyng shal be right as I yow devyse."
	With that Eleyne and also Deiphebus
205	Tho comen upward, right at the steires ende;
	And Lord, so thanne gan gronen Troilus,
	His brother and his suster for to blende.
	Quod Pandarus, "It tyme is that we wende.
	Tak, nece myn, youre leve at alle thre,
210	And lat hem speke, and cometh forth with me."
	She took hire leve at hem ful thriftily,
	As she wel koude, and they hire reverence
	Unto the fulle diden, hardyly,
	And wonder wel speken, in hire absence,
215	Of hire in preysing of hire excellence --
	Hire governaunce, hire wit, and hire manere
	Comendeden, it joie was to here.
	Now lat hire wende unto hire owen place,
	And torne we to Troilus ayein,
220	That gan ful lightly of the lettre pace
	That Deiphebus hadde in the gardyn seyn;
	And of Eleyne and hym he wolde feyn
	Delivered ben, and seyde that hym leste
	To slepe, and after tales have reste.
225	Eleyne hym kiste, and took hire leve blyve,
	Deiphebus ek, and hom wente every wight;
	And Pandarus, as faste as he may dryve,
	To Troilus tho com, as lyne right,
	And on a paillet al that glade nyght
230	By Troilus he lay, with mery chere,
	To tale; and wel was hem they were yfeere.
	Whan every wight was voided but they two,
	And alle the dores weren faste yshette,
	To telle in short, withouten wordes mo,
235	This Pandarus, withouten any lette,
	Up roos, and on his beddes syde hym sette,
	And gan to speken in a sobre wyse
	To Troilus, as I shal yow devyse:
	"Myn alderlevest lord, and brother deere,
240	God woot, and thow, that it sat me so soore,
	Whan I the saugh so langwisshyng to-yere
	For love, of which thi wo wax alwey moore,
	That I, with al my myght and al my loore,
	Have evere sithen don my bisynesse
245	To brynge the to joye out of distresse,
	"And have it brought to swich plit as thow woost,
	So that thorugh me thow stondest now in weye
	To faren wel; I sey it for no bost,
	And wostow whi? For shame it is to seye:
250	For the have I bigonne a gamen pleye
	Which that I nevere do shal eft for other,
	Although he were a thousand fold my brother.
	"That is to seye, for the am I bicomen,
	Bitwixen game and ernest, swich a meene
255	As maken wommen unto men to comen;
	Al sey I nought, thow wost wel what I meene.
	For the have I my nece, of vices cleene,
	So fully maad thi gentilesse triste,
	That al shal ben right as thiselven liste.
260	"But God, that al woot, take I to witnesse,
	That nevere I this for coveitise wroughte,
	But oonly for t' abregge that distresse
	For which wel neigh thow deidest, as me thoughte.
	But, goode brother, do now as the oughte,
265	For Goddes love, and kep hire out of blame,
	Syn thow art wys, and save alwey hire name.
	"For wel thow woost, the name as yet of here
	Among the peeple, as who seyth, halwed is.
	For that man is unbore, I dar wel swere,
270	That evere wiste that she dide amys.
	But wo is me, that I, that cause al this,
	May thynken that she is my nece deere,
	And I hire em, and traitour ek yfeere!
	"And were it wist that I, thorugh myn engyn,
275	Hadde in my nece yput this fantasie,
	To doon thi lust and holly to ben thyn,
	Whi, al the world upon it wolde crie,
	And seyn that I the werste trecherie
	Dide in this cas, that evere was bigonne,
280	And she forlost, and thow right nought ywonne.
	"Wherfore, er I wol ferther gon a pas,
	The preie ich eft, althogh thow shuldest deye,
	That privete go with us in this cas;
	That is to seyn, that thow us nevere wreye;
285	And be nought wroth, though I the ofte preye
	To holden secree swich an heigh matere,
	For skilfull is, thow woost wel, my praiere.
	"And thynk what wo ther hath bitid er this,
	For makyng of avantes, as men rede;
290	And what meschaunce in this world yet ther is,
	Fro day to day, right for that wikked dede;
	For which thise wise clerkes that ben dede
	Han evere yet proverbed to us yonge,
	That `firste vertu is to kepe tonge.'
295	"And nere it that I wilne as now t' abregge
	Diffusioun of speche, I koude almoost
	A thousand olde stories the allegge
	Of wommen lost through fals and foles bost.
	Proverbes kanst thiself ynowe and woost
300	Ayeins that vice, for to ben a labbe,
	Al seyde men soth as often as thei gabbe.
	"O tonge, allas, so often here-byforn
	Hath mad ful many a lady bright of hewe
	Seyd `Weilaway, the day that I was born!'
305	And many a maydes sorwe for to newe;
	And for the more part, al is untrewe
	That men of yelpe, and it were brought to preve.
	Of kynde non avauntour is to leve.
	"Avauntour and a lyere, al is on;
310	As thus: I pose, a womman grante me
	Hire love, and seith that other wol she non,
	And I am sworn to holden it secree,
	And after I go telle it two or thre --
	Iwis, I am avauntour at the leeste,
315	And lyere, for I breke my biheste.
	"Now loke thanne, if they be nought to blame,
	Swich manere folk -- what shal I clepe hem, what? --
	That hem avaunte of wommen, and by name,
	That nevere yet bihyghte hem this ne that,
320	Ne knewe hem more than myn olde hat!
	No wonder is, so God me sende hele,
	Though wommen dreden with us men to dele.
	"I sey nought this for no mistrust of yow,
	Ne for no wis-man, but for foles nyce,
325	And for the harm that in the werld is now,
	As wel for folie ofte as for malice;
	For wel woot I, in wise folk that vice
	No womman drat, if she be wel avised;
	For wyse ben by foles harm chastised.
330	"But now to purpos; leve brother deere,
	Have al this thyng that I have seyd in mynde,
	And kep the clos, and be now of good cheere,
	For at thi day thow shalt me trewe fynde.
	I shal thi proces set in swych a kynde,
335	And God toforn, that it shal the suffise,
	For it shal be right as thow wolt devyse.
	"For wel I woot, thow menest wel, parde;
	Therfore I dar this fully undertake.
	Thow woost ek what thi lady graunted the,
340	And day is set the chartres up to make.
	Have now good nyght, I may no lenger wake;
	And bid for me, syn thow art now in blysse,
	That God me sende deth or soone lisse."
	Who myghte tellen half the joie or feste
345	Which that the soule of Troilus tho felte,
	Heryng th' effect of Pandarus byheste?
	His olde wo, that made his herte swelte,
	Gan tho for joie wasten and tomelte,
	And al the richesse of his sikes sore
350	At ones fledde; he felte of hem namore.
	But right so as thise holtes and thise hayis,
	That han in wynter dede ben and dreye,
	Revesten hem in grene whan that May is,
	Whan every lusty liketh best to pleye;
355	Right in that selve wise, soth to seye,
	Wax sodeynliche his herte ful of joie,
	That gladder was ther nevere man in Troie.
	And gan his look on Pandarus up caste
	Ful sobrely, and frendly for to se,
360	And seyde, "Frend, in Aperil the laste --
	As wel thow woost, if it remembre the --
	How neigh the deth for wo thow fownde me,
	And how thow dedest al thi bisynesse
	To knowe of me the cause of my destresse.
365	"Thow woost how longe ich it forbar to seye
	To the, that art the man that I best triste;
	And peril non was it to the bywreye,
	That wist I wel; but telle me, if the liste,
	Sith I so loth was that thiself it wiste,
370	How dorst I mo tellen of this matere,
	That quake now, and no wight may us here?
	"But natheles, by that God I the swere,
	That, as hym list, may al this world governe --
	And, if I lye, Achilles with his spere
375	Myn herte cleve, al were my lif eterne,
	As I am mortal, if I late or yerne
	Wolde it bewreye, or dorst, or sholde konne,
	For al the good that God made under sonne --
	"That rather deye I wolde, and determyne,
380	As thynketh me, now stokked in prisoun,
	In wrecchidnesse, in filthe, and in vermyne,
	Caytif to cruel kyng Agamenoun;
	And this in all the temples of this town
	Upon the goddes alle, I wol the swere
385	To-morwe day, if that it liketh here.
	"And that thow hast so muche ido for me
	That I ne may it nevere more disserve,
	This know I wel, al myghte I now for the
	A thousand tymes on a morwe sterve.
390	I kan namore, but that I wol the serve
	Right as thi sclave, whider so thow wende,
	For evere more, unto my lyves ende.
	"But here, with al myn herte, I the biseche
	That nevere in me thow deme swich folie
395	As I shal seyn: me thoughte by thi speche
	That this which thow me dost for compaignie,
	I sholde wene it were a bauderye.
	I am nought wood, al if I lewed be!
	It is nought so, that woot I wel, parde!
400	"But he that gooth for gold or for ricchesse
	On swich message, calle hym what the list;
	And this that thow doost, calle it gentilesse,
	Compassioun, and felawship, and trist.
	Departe it so, for wyde-wher is wist
405	How that ther is diversite requered
	Bytwixen thynges like, as I have lered.
	"And that thow knowe I thynke nought ne wene
	That this servise a shame be or jape,
	I have my faire suster Polixene,
410	Cassandre, Eleyne, or any of the frape --
	Be she nevere so fair or wel yshape,
	Tel me which thow wilt of everychone,
	To han for thyn, and lat me thanne allone.
	"But, sith thow hast don me this servyse
415	My lif to save and for non hope of mede,
	So for the love of God, this grete emprise
	Perfourme it out, for now is moste nede;
	For heigh and lough, withowten any drede,
	I wol alwey thyn hestes alle kepe.
420	Have now good nyght, and lat us bothe slepe."
	Thus held hym ech of other wel apayed,
	That al the world ne myghte it bet amende;
	And on the morwe, whan they were arayed,
	Ech to his owen nedes gan entende.
425	But Troilus, though as the fir he brende
	For sharp desir of hope and of plesaunce,
	He nought forgat his goode governaunce,
	But in hymself with manhod gan restreyne
	Ech racle dede and ech unbridled cheere,
430	That alle tho that lyven, soth to seyne,
	Ne sholde han wist, by word or by manere,
	What that he mente, as touchyng this matere.
	From every wight as fer as is the cloude
	He was, so wel dissimilen he koude.
435	And al the while which that I yow devyse,
	This was his lif: with all his fulle myght,
	By day, he was in Martes heigh servyse --
	This is to seyn, in armes as a knyght;
	And for the more part, the longe nyght
440	He lay and thoughte how that he myghte serve
	His lady best, hire thonk for to deserve.
	Nil I naught swere, although he lay ful softe,
	That in his thought he nas somwhat disesed,
	Ne that he torned on his pilwes ofte,
445	And wold of that hym missed han ben sesed.
	But in swich cas men is nought alwey plesed,
	For aught I woot, namore than was he;
	That kan I deme of possibilitee.
	But certeyn is, to purpos for to go,
450	That in this while, as writen is in geeste,
	He say his lady somtyme, and also
	She with hym spak, whan that she dorst or leste;
	And by hire bothe avys, as was the beste,
	Apoynteden full warly in this nede,
455	So as they durste, how they wolde procede.
	But it was spoken in so short a wise,
	In swich await alwey, and in swich feere,
	Lest any wight devynen or devyse
	Wolde of hem two, or to it laye an ere,
460	That al this world so leef to hem ne were
	As that Cupide wolde hem grace sende
	To maken of hire speche aright an ende.
	But thilke litel that they spake or wroughte,
	His wise goost took ay of al swych heede,
465	It semed hire he wiste what she thoughte
	Withouten word, so that it was no nede
	To bidde hym ought to doon, or ought forbeede;
	For which she thought that love, al come it late,
	Of alle joie hadde opned hire the yate.
470	And shortly of this proces for to pace,
	So wel his werk and wordes he bisette,
	That he so ful stood in his lady grace,
	That twenty thousand tymes, er she lette,
	She thonked God that evere she with hym mette.
475	So koude he hym governe in swich servyse,
	That al the world ne myght it bet devyse.
	For whi she fond hym so discret in al,
	So secret, and of swich obeisaunce,
	That wel she felte he was to hire a wal
480	Of stiel, and sheld from every displesaunce;
	That to ben in his goode governaunce,
	So wis he was, she was namore afered --
	I mene, as fer as oughte ben requered.
	And Pandarus, to quike alwey the fir,
485	Was evere ylike prest and diligent;
	To ese his frend was set al his desir.
	He shof ay on, he to and fro was sent;
	He lettres bar whan Troilus was absent;
	That nevere man, as in his frendes nede,
490	Ne bar hym bet than he, withouten drede.
	But now, paraunter, som man wayten wolde
	That every word, or soonde, or look, or cheere
	Of Troilus that I rehercen sholde,
	In al this while unto his lady deere --
495	I trowe it were a long thyng for to here --
	Or of what wight that stant in swich disjoynte,
	His wordes alle, or every look, to poynte.
	For sothe, I have naught herd it don er this
	In story non, ne no man here, I wene;
500	And though I wolde, I koude nought, ywys;
	For ther was som epistel hem bitwene,
	That wolde, as seyth myn autour, wel contene
	Neigh half this book, of which hym liste nought write.
	How sholde I thanne a lyne of it endite?
505	But to the grete effect: than sey I thus,
	That stondyng in concord and in quiete,
	Thise ilke two, Criseyde and Troilus,
	As I have told, and in this tyme swete --
	Save only often myghte they nought mete,
510	Ne leiser have hire speches to fulfelle --
	That it bifel right as I shal yow telle:
	That Pandarus, that evere dide his myght
	Right for the fyn that I shal speke of here,
	As for to bryngen to his hows som nyght
515	His faire nece and Troilus yfere,
	Wheras at leiser al this heighe matere,
	Touchyng here love, were at the fulle upbounde,
	Hadde out of doute a tyme to it founde.
	For he with gret deliberacioun
520	Hadde every thyng that herto myght availle
	Forncast and put in execucioun,
	And neither left for cost ne for travaille.
	Come if hem list, hem sholde no thyng faille;
	And for to ben in ought aspied there,
525	That, wiste he wel, an impossible were.
	Dredeles, it cler was in the wynd
	Of every pie and every lette-game;
	Now al is wel, for al the world is blynd
	In this matere, bothe fremde and tame.
530	This tymbur is al redy up to frame;
	Us lakketh nought but that we witen wolde
	A certeyn houre, in which she comen sholde.
	And Troilus, that al this purveiaunce
	Knew at the fulle, and waited on it ay,
535	Hadde hereupon ek mad gret ordinaunce,
	And found his cause, and therto his aray,
	If that he were missed, nyght or day,
	Ther-while he was aboute this servyse,
	That he was gon to don his sacrifise,
540	And moste at swich a temple allone wake,
	Answered of Apollo for to be;
	And first to sen the holy laurer quake,
	Er that Apollo spak out of the tree,
	To telle hym next whan Grekes sholde flee --
545	And forthy lette hym no man, God forbede,
	But prey Apollo helpen in this nede.
	Now is ther litel more for to doone,
	But Pandare up and, shortly for to seyne,
	Right sone upon the chaungynge of the moone,
550	Whan lightles is the world a nyght or tweyne,
	And that the wolken shop hym for to reyne,
	He streght o morwe unto his nece wente --
	Ye han wel herd the fyn of his entente.
	Whan he was com, he gan anon to pleye
555	As he was wont, and of hymself to jape;
	And finaly he swor and gan hire seye,
	By this and that, she sholde hym nought escape,
	Ne lenger don hym after hire to cape;
	But certeynly she moste, by hire leve,
560	Come soupen in his hous with hym at eve.
	At which she lough, and gan hire faste excuse,
	And seyde, "It reyneth. lo, how sholde I gon?"
	"Lat be," quod he, "ne stant nought thus to muse.
	This moot be don! Ye shal be ther anon."
565	So at the laste herof they fille aton,
	Or elles, softe he swor hire in hire ere,
	He nolde nevere comen ther she were.
	Soone after this, she to hym gan to rowne,
	And axed hym if Troilus were there.
570	He swor hire nay, for he was out of towne,
	And seyde, "Nece, I pose that he were;
	Yow thurste nevere han the more fere;
	For rather than men myghte hym ther aspie,
	Me were levere a thousand fold to dye."
575	Nought list myn auctour fully to declare
	What that she thoughte whan he seyde so,
	That Troilus was out of towne yfare,
	As if he seyde therof soth or no;
	But that, withowten await, with hym to go,
580	She graunted hym, sith he hire that bisoughte,
	And, as his nece, obeyed as hire oughte.
	But natheles, yet gan she hym biseche,
	Although with hym to gon it was no fere,
	For to ben war of goosissh poeples speche,
585	That dremen thynges whiche as nevere were,
	And wel avyse hym whom he broughte there;
	And seyde hym, "Em, syn I moste on yow triste,
	Loke al be wel, and do now as yow liste."
	He swor hire yis, by stokkes and by stones,
590	And by the goddes that in hevene dwelle,
	Or elles were hym levere, soule and bones,
	With Pluto kyng as depe ben in helle
	As Tantalus -- what sholde I more telle?
	Whan al was wel, he roos and took his leve,
595	And she to soper com, whan it was eve,
	With a certein of hire owen men,
	And with hire faire nece Antigone,
	And other of hire wommen nyne or ten.
	But who was glad now, who, as trowe ye,
600	But Troilus, that stood and myght it se
	Thorughout a litel wyndow in a stewe,
	Ther he bishet syn mydnyght was in mewe,
	Unwist of every wight but of Pandare?
	But to the point: now whan that she was come,
605	With alle joie and alle frendes fare
	Hire em anon in armes hath hire nome,
	And after to the soper, alle and some,
	Whan tyme was, ful softe they hem sette.
	God woot, ther was no deynte for to fette!
610	And after soper gonnen they to rise,
	At ese wel, with herte fresshe and glade;
	And wel was hym that koude best devyse
	To liken hire, or that hire laughen made:
	He song; she pleyde; he tolde tale of Wade.
615	But at the laste, as every thyng hath ende,
	She took hire leve, and nedes wolde wende.
	But O Fortune, executrice of wierdes,
	O influences of thise hevenes hye!
	Soth is, that under God ye ben oure hierdes,
620	Though to us bestes ben the causez wrie.
	This mene I now: for she gan homward hye,
	But execut was al bisyde hire leve
	The goddes wil, for which she moste bleve.
	The bente moone with hire hornes pale,
625	Saturne, and Jove, in Cancro joyned were,
	That swych a reyn from heven gan avale
	That every maner womman that was there
	Hadde of that smoky reyn a verray feere;
	At which Pandare tho lough, and seyde thenne,
630	"Now were it tyme a lady to gon henne!
	"But goode nece, if I myghte evere plese
	Yow any thyng, than prey ich yow," quod he,
	"To don myn herte as now so gret an ese
	As for to dwelle here al this nyght with me,
635	For-whi this is youre owen hous, parde.
	For by my trouthe, I sey it nought a-game,
	To wende as now, it were to me a shame."
	Criseyde, which that koude as muche good
	As half a world, took hede of his preiere;
640	And syn it ron, and al was on a flod,
	She thoughte, "As good chep may I dwellen here,
	And graunte it gladly with a frendes chere,
	And have a thonk, as grucche and thanne abide;
	For hom to gon, it may nought wel bitide."
645	"I wol," quod she, "myn uncle lief and deere;
	Syn that yow list, it skile is to be so.
	I am right glad with yow to dwellen here;
	I seyde but a-game I wolde go."
	"Iwys, graunt mercy, nece," quod he tho,
650	"Were it a game or no, soth for to telle,
	Now am I glad, syn that yow list to dwelle."
	Thus al is wel; but tho bigan aright
	The newe joie and al the feste agayn.
	But Pandarus, if goodly hadde he myght,
655	He wolde han hyed hire to bedde fayn,
	And seyde, "Lord, this is an huge rayn!
	This were a weder for to slepen inne --
	And that I rede us soone to bygynne.
	"And nece, woot ye wher I wol yow leye,
660	For that we shul nat liggen far asonder,
	And for ye neither shullen, dar I seye,
	Heren noyse of reynes nor of thonder?
	By God, right in my litel closet yonder.
	And I wol in that outer hous allone
665	Be wardein of youre wommen everichone.
	"And in this myddel chambre that ye se
	Shal youre wommen slepen, wel and softe;
	And there I seyde shal youreselven be;
	And if ye liggen wel to-nyght, com ofte,
670	And careth nought what weder is alofte.
	The wyn anon, and whan so that yow leste,
	So go we slepe: I trowe it be the beste."
	Ther nys no more, but hereafter soone,
	The voide dronke, and travers drawe anon,
675	Gan every wight that hadde nought to done
	More in the place out of the chaumbre gon.
	And evere mo so sterneliche it ron,
	And blew therwith so wondirliche loude,
	That wel neigh no man heren other koude.
680	Tho Pandarus, hire em, right as hym oughte,
	With wommen swiche as were hire most aboute,
	Ful glad unto hire beddes syde hire broughte,
	And took his leve, and gan ful lowe loute,
	And seyde, "Here at this closet dore withoute,
685	Right overthwart, youre wommen liggen alle,
	That whom yow list of hem ye may here calle."
	So whan that she was in the closet leyd,
	And alle hire wommen forth by ordinaunce
	Abedde weren, ther as I have seyd,
690	Ther was nomore to skippen nor to traunce,
	But boden go to bedde, with meschaunce,
	If any wight was steryng anywhere,
	And lat hem slepen that abedde were.
	But Pandarus, that wel koude ech a deel
695	Th' olde daunce, and every point therinne,
	Whan that he sey that alle thyng was wel,
	He thought he wolde upon his werk bigynne,
	And gan the stuwe doore al softe unpynne;
	And stille as stoon, withouten lenger lette,
700	By Troilus adown right he hym sette,
	And shortly to the point right for to gon,
	Of al this werk he tolde hym word and ende,
	And seyde, "Make the redy right anon,
	For thow shalt into hevene blisse wende."
705	"Now, blisful Venus, thow me grace sende!"
	Quod Troilus, "For nevere yet no nede
	Hadde ich er now, ne halvendel the drede."
	Quod Pandarus, "Ne drede the nevere a deel,
	For it shal be right as thow wolt desire;
710	So thryve I, this nyght shal I make it weel,
	Or casten al the gruwel in the fire."
	"Yet, blisful Venus, this nyght thow me enspire,"
	Quod Troilus, "As wys as I the serve,
	And evere bet and bet shal, til I sterve.
715	"And if ich hadde, O Venus ful of myrthe,
	Aspectes badde of Mars or of Saturne,
	Or thow combust or let were in my birthe,
	Thy fader prey al thilke harm disturne
	Of grace, and that I glad ayein may turne,
720	For love of hym thow lovedest in the shawe --
	I meene Adoun, that with the boor was slawe.
	"O Jove ek, for the love of faire Europe,
	The which in forme of bole awey thow fette,
	Now help! O Mars, thow with thi blody cope,
725	For love of Cipris, thow me nought ne lette!
	O Phebus, thynk whan Dane hireselven shette
	Under the bark, and laurer wax for drede;
	Yet for hire love, O help now at this nede!
	"Mercurie, for the love of Hierse eke,
730	For which Pallas was with Aglawros wroth,
	Now help! And ek Diane, I the biseke
	That this viage be nought to the looth!
	O fatal sustren which, er any cloth
	Me shapen was, my destine me sponne,
735	So helpeth to this werk that is bygonne!"
	Quod Pandarus, "Thow wrecched mouses herte,
	Artow agast so that she wol the bite?
	Wy! Don this furred cloke upon thy sherte,
	And folwe me, for I wol have the wite.
740	But bid, and lat me gon biforn a lite."
	And with that word he gan undon a trappe,
	And Troilus he brought in by the lappe.
	The sterne wynd so loude gan to route
	That no wight oother noise myghte heere;
745	And they that layen at the dore withoute,
	Ful sikerly they slepten alle yfere;
	And Pandarus, with a ful sobre cheere,
	Goth to the dore anon, withouten lette,
	Ther as they laye, and softely it shette.
750	And as he com ayeynward pryvely,
	His nece awook, and axed, "Who goth there?"
	"My dere nece," quod he, "it am I.
	Ne wondreth nought, ne have of it no fere."
	And ner he com and seyde hire in hire ere,
755	"No word, for love of God, I yow biseche!
	Lat no wight risen and heren of oure speche."
	"What, which wey be ye comen, benedicite?"
	Quod she; "And how, unwist of hem alle?"
	"Here at this secre trappe-dore," quod he.
760	Quod tho Criseyde, "Lat me som wight calle!"
	"I! God forbede that it sholde falle,"
	Quod Pandarus, "that ye swich folye wroughte!
	They myghte demen thyng they nevere er thoughte.
	"It is nought good a slepyng hound to wake,
765	Ne yeve a wight a cause to devyne:
	Youre wommen slepen alle, I undertake,
	So that, for hem, the hous men myghte myne,
	And slepen wollen til the sonne shyne.
	And whan my tale brought is to an ende,
770	Unwist, right as I com, so wol I wende.
	"Now, nece myn, ye shul wel understonde,"
	Quod he, "so as ye wommen demen alle,
	That for to holde in love a man in honde,
	And hym hire lief and deere herte calle,
775	And maken hym an howve above a calle --
	I meene, as love another in this while --
	She doth hireself a shame and hym a gyle.
	"Now, wherby that I telle yow al this:
	Ye woot youreself, as wel as any wight,
780	How that youre love al fully graunted is
	To Troilus, the worthieste knyght,
	Oon of this world, and therto trouthe yplight,
	That, but it were on hym along, ye nolde
	Hym nevere falsen while ye lyven sholde.
785	"Now stant it thus, that sith I fro yow wente,
	This Troilus, right platly for to seyn,
	Is thorugh a goter, by a pryve wente,
	Into my chaumbre come in al this reyn,
	Unwist of every manere wight, certeyn,
790	Save of myself, as wisly have I joye,
	And by that feith I shal Priam of Troie.
	"And he is come in swich peyne and distresse
	That, but he be al fully wood by this,
	He sodeynly mot falle into wodnesse,
795	But if God helpe; and cause whi this is.
	He seith hym told is of a frend of his,
	How that ye sholden love oon hatte Horaste;
	For sorwe of which this nyght shal ben his laste."
	Criseyde, which that al this wonder herde,
800	Gan sodeynly aboute hire herte colde,
	And with a sik she sorwfully answerde,
	"Allas! I wende, whoso tales tolde,
	My deere herte wolde me nought holde
	So lightly fals! Allas, conceytes wronge,
805	What harm they don! For now lyve I to longe!
	"Horaste! Allas, and falsen Troilus?
	I knowe hym nought, God helpe me so!" quod she.
	"Allas, what wikked spirit tolde hym thus?
	Now certes, em, tomorwe and I hym se,
810	I shal therof as ful excusen me,
	As evere dide womman, if hym like."
	And with that word she gan ful soore sike.
	"O God," quod she, "so worldly selynesse,
	Which clerkes callen fals felicitee,
815	Imedled is with many a bitternesse!
	Ful angwissous than is, God woot," quod she,
	"Condicioun of veyn prosperitee:
	For either joies comen nought yfeere,
	Or elles no wight hath hem alwey here.
820	"O brotel wele of mannes joie unstable!
	With what wight so thow be, or how thow pleye,
	Either he woot that thow, joie, art muable,
	Or woot it nought; it mot ben oon of tweye.
	Now if he woot it nought, how may he seye
825	That he hath verray joie and selynesse,
	That is of ignoraunce ay in derknesse?
	"Now if he woot that joie is transitorie,
	As every joye of worldly thyng mot flee,
	Than every tyme he that hath in memorie,
830	The drede of lesyng maketh hym that he
	May in no perfit selynesse be;
	And if to lese his joie he sette a myte,
	Than semeth it that joie is worth ful lite.
	"Wherfore I wol diffyne in this matere,
835	That trewely, for aught I kan espie,
	Ther is no verray weele in this world heere.
	But O thow wikked serpent, jalousie,
	Thow mysbyleved envyous folie,
	Why hastow Troilus mad to me untriste,
840	That nevere yet agylte hym, that I wiste?"
	Quod Pandarus, "Thus fallen is this cas --"
	"Wy! Uncle myn," quod she, "who tolde hym this?
	Why doth my deere herte thus, allas?"
	"Ye woot, ye, nece myn," quod he, "what is.
845	I hope al shal be wel that is amys,
	For ye may quenche al this, if that yow leste --
	And doth right so, for I holde it the beste."
	"So shal I do to-morwe, ywys," quod she,
	"And God toforn, so that it shal suffise."
850	"To-morwe? Allas, that were a fair!" quod he;
	"Nay, nay, it may nat stonden in this wise,
	For, nece myn, thus writen clerkes wise,
	That peril is with drecchyng in ydrawe;
	Nay, swiche abodes ben nought worth an hawe.
855	"Nece, alle thyng hath tyme, I dar avowe;
	For whan a chaumbre afire is or an halle,
	Wel more nede is, it sodeynly rescowe
	Than to dispute and axe amonges alle
	How this candel in the strawe is falle.
860	A, benedicite! For al among that fare
	The harm is don, and fare-wel feldefare!
	"And nece myn -- ne take it naught agrief --
	If that ye suffre hym al nyght in this wo,
	God help me so, ye hadde hym nevere lief!
865	That dar I seyn, now ther is but we two.
	But wel I woot that ye wol nat do so;
	Ye ben to wys to doon so gret folie,
	To putte his lif al nyght in jupertie."
	"Hadde I hym nevere lief? by God, I weene
870	Ye hadde nevere thyng so lief!" quod she.
	"Now by my thrift," quod he, "that shal be seene!
	For syn ye make this ensaumple of me,
	If ich al nyght wolde hym in sorwe se,
	For al the tresour in the town of Troie,
875	I bidde God I nevere mote have joie.
	"Now loke thanne, if ye that ben his love
	Shul putte his lif al night in jupertie
	For thyng of nought, now by that God above,
	Naught oonly this delay comth of folie,
880	But of malice, if that I shal naught lie.
	What! Platly, and ye suffre hym in destresse,
	Ye neyther bounte don ne gentilesse."
	Quod tho Criseyde, "Wol ye don o thyng
	And ye therwith shal stynte al his disese?
885	Have heere, and bereth hym this blewe ryng,
	For ther is nothyng myghte hym bettre plese,
	Save I myself, ne more hys herte apese;
	And sey my deere herte that his sorwe
	Is causeles; that shal be sene to-morwe."
890	"A ryng?" quod he, "Ye haselwodes shaken!
	Ye, nece myn, that ryng moste han a stoon
	That myghte dede men alyve maken;
	And swich a ryng trowe I that ye have non.
	Discrecioun out of youre hed is gon;
895	That fele I now," quod he, "and that is routhe.
	O tyme ilost, wel maistow corsen slouthe!
	"Woot ye not wel that noble and heigh corage
	Ne sorweth nought, ne stynteth ek, for lite?
	But if a fool were in a jalous rage,
900	I nolde setten at his sorwe a myte,
	But feffe hym with a fewe wordes white
	Anothir day, whan that I myghte hym fynde;
	But this thyng stant al in another kynde.
	"This is so gentil and so tendre of herte
905	That with his deth he wol his sorwes wreke;
	For trusteth wel, how sore that hym smerte,
	He wol to yow no jalous wordes speke.
	And forthi, nece, er that his herte breke,
	So speke youreself to hym of this matere,
910	For with o word ye may his herte stere.
	"Now have I told what peril he is inne,
	And his comynge unwist is to every wight;
	Ne, parde, harm may ther be non, ne synne:
	I wol myself be with yow al this nyght.
915	Ye knowe ek how it is youre owen knyght,
	And that bi right ye moste upon hym triste,
	And I al prest to fecche hym whan yow liste."
	This accident so pitous was to here,
	And ek so like a sooth at prime face,
920	And Troilus hire knyght to hir so deere,
	His prive comyng, and the siker place,
	That though that she did hym as thanne a grace,
	Considered alle thynges as they stoode,
	No wonder is, syn she did al for goode.
925	Criseyde answerde, "As wisly God at reste
	My soule brynge, as me is for hym wo!
	And em, iwis, fayn wolde I don the beste,
	If that ich hadde grace to do so;
	But whether that ye dwelle or for hym go,
930	I am, til God me bettre mynde sende,
	At dulcarnoun, right at my wittes ende."
	Quod Pandarus, "Yee, nece, wol ye here?
	Dulcarnoun called is `flemyng of wrecches':
	It semeth hard, for wrecches wol nought lere,
935	For verray slouthe or other wilfull tecches;
	This seyd by hem that ben nought worth two fecches;
	But ye ben wis, and that we han on honde
	Nis neither hard, ne skilful to withstonde."
	"Than, em," quod she, "doth herof as yow list.
940	But er he com, I wil up first arise,
	And for the love of God, syn al my trist
	Is on yow two, and ye ben bothe wise,
	So werketh now in so discret a wise
	That I honour may have, and he plesaunce:
945	For I am here al in youre governaunce."
	"That is wel seyd," quod he, "my nece deere.
	Ther good thrift on that wise gentil herte!
	But liggeth stille, and taketh hym right here --
	It nedeth nought no ferther for hym sterte.
950	And ech of yow ese otheres sorwes smerte,
	For love of God! And Venus, I the herye;
	For soone hope I we shul ben alle merye."
	This Troilus ful soone on knees hym sette
	Ful sobrely, right be hyre beddes hed,
955	And in his beste wyse his lady grette.
	But Lord, so she wex sodeynliche red!
	Ne though men sholde smyten of hire hed,
	She kouth. nought a word aright out brynge
	So sodeynly, for his sodeyn comynge.
960	But Pandarus, that so wel koude feele
	In every thyng, to pleye anon bigan,
	And seyde, "Nece, se how this lord kan knele!
	Now for youre trouthe, se this gentil man!"
	And with that word he for a quysshen ran,
965	And seyde, "Kneleth now, while that yow leste;
	There God youre hertes brynge soone at reste!"
	Kan I naught seyn, for she bad hym nought rise,
	If sorwe it putte out of hire remembraunce,
	Or elles that she took it in the wise
970	Of dewete, as for his observaunce;
	But wel fynde I she dede hym this plesaunce,
	That she hym kiste, although she siked sore,
	And bad hym sitte adown withouten more.
	Quod Pandarus, "Now wol ye wel bigynne.
975	Now doth hym sitte, goode nece deere,
	Upon youre beddes syde al ther withinne,
	That ech of yow the bet may other heere."
	And with that word he drow hym to the feere,
	And took a light, and fond his contenaunce,
980	As for to looke upon an old romaunce.
	Criseyde, that was Troilus lady right,
	And cler stood on a ground of sikernesse,
	Al thoughte she hire servant and hire knyght
	Ne sholde of right non untrouthe in hire gesse,
985	Yet natheles, considered his distresse,
	And that love is in cause of swich folie,
	Thus to hym spak she of his jalousie:
	"Lo, herte myn, as wolde the excellence
	Of love, ayeins the which that no man may --
990	Ne oughte ek -- goodly make resistence,
	And ek bycause I felte wel and say
	Youre grete trouthe and servise every day,
	And that youre herte al myn was, soth to seyne,
	This drof me for to rewe upon youre peyne.
995	"And youre goodnesse have I founde alwey yit,
	Of which, my deere herte and al my knyght,
	I thonke it yow, as fer as I have wit,
	Al kan I nought as muche as it were right;
	And I, emforth my connyng and my might,
1000	Have and ay shal, how sore that me smerte,
	Ben to yow trewe and hool with al myn herte,
	"And dredeles, that shal be founde at preve.
	But, herte myn, what al this is to seyne
	Shal wel be told, so that ye nought yow greve,
1005	Though I to yow right on youreself compleyne,
	For therwith mene I fynaly the peyne
	That halt youre herte and myn in hevynesse
	Fully to slen, and every wrong redresse.
	"My goode myn, noot I for-why ne how
1010	That jalousie, allas, that wikked wyvere,
	Thus causeles is cropen into yow,
	The harm of which I wolde fayn delyvere.
	Allas, that he, al hool or of hym slyvere,
	Shuld han his refut in so digne a place;
1015	Ther Jove hym sone out of youre herte arace!
	"But O, thow Jove, O auctour of nature,
	Is this an honour to thi deyte,
	That folk ungiltif suffren hire injure,
	And who that giltif is, al quyt goth he?
1020	O, were it lefull for to pleyn on the,
	That undeserved suffrest jalousie,
	Of that I wolde upon the pleyne and crie!
	"Ek al my wo is this, that folk now usen
	To seyn right thus, `Ye, jalousie is love!'
1025	And wolde a busshel venym al excusen,
	For that o greyn of love is on it shove.
	But that woot heighe God that sit above,
	If it be likkere love, or hate, or grame;
	And after that, it oughte bere his name.
1030	"But certeyn is, som manere jalousie
	Is excusable more than som, iwys;
	As whan cause is, and som swich fantasie
	With piete so wel repressed is
	That it unnethe doth or seyth amys,
1035	But goodly drynketh up al his distresse --
	And that excuse I, for the gentilesse;
	"And som so ful of furie is and despit
	That it sourmounteth his repressioun.
	But herte myn, ye be nat in that plit,
1040	That thonke I God; for which youre passioun
	I wol nought calle it but illusioun
	Of habundaunce of love and besy cure,
	That doth youre herte this disese endure.
	"Of which I am right sory but nought wroth;
1045	But, for my devoir and youre hertes reste,
	Wherso yow list, by ordal or by oth,
	By sort, or in what wise so yow leste,
	For love of God, lat preve it for the beste;
	And if that I be giltif, do me deye!
1050	Allas, what myght I more don or seye?"
	With that a fewe brighte teris newe
	Owt of hire eighen fille, and thus she seyde,
	"Now God, thow woost, in thought ne dede untrewe
	To Troilus was nevere yet Criseyde."
1055	With that here heed down in the bed she leyde,
	And with the sheete it wreigh, and sighte soore,
	And held hire pees; nought o word spak she more.
	But now help God to quenchen al this sorwe!
	So hope I that he shal, for he best may.
1060	For I have seyn of a ful misty morwe
	Folowen ful ofte a myrie someris day;
	And after wynter foloweth grene May;
	Men sen alday, and reden ek in stories,
	That after sharpe shoures ben victories.
1065	This Troilus, whan he hire wordes herde,
	Have ye no care, hym liste nought to slepe;
	For it thoughte hym no strokes of a yerde
	To heere or seen Criseyde, his lady, wepe;
	But wel he felt aboute his herte crepe,
1070	For everi tere which that Criseyde asterte,
	The crampe of deth to streyne hym by the herte.
	And in his mynde he gan the tyme acorse
	That he com there, and that, that he was born;
	For now is wikke torned into worse,
1075	And al that labour he hath don byforn,
	He wende it lost; he thoughte he nas but lorn.
	"O Pandarus," thoughte he, "allas, thi wile
	Serveth of nought, so weylaway the while!"
	And therwithal he heng adown the heed,
1080	And fil on knees, and sorwfully he sighte.
	What myghte he seyn? He felte he nas but deed,
	For wroth was she that sholde his sorwes lighte.
	But natheles, whan that he speken myghte,
	Than seyde he thus, "God woot that of this game,
1085	Whan al is wist, than am I nought to blame."
	Therwith the sorwe so his herte shette
	That from his eyen fil there nought a tere,
	And every spirit his vigour in knette,
	So they astoned or oppressed were.
1090	The felyng of his sorwe, or of his fere,
	Or of aught elles, fled was out of towne;
	And down he fel al sodeynly a-swowne.
	This was no litel sorwe for to se;
	But al was hust, and Pandare up as faste;
1095	"O nece, pes, or we be lost!" quod he,
	"Beth naught agast!" But certeyn, at the laste,
	For this or that, he into bed hym caste,
	And seyde, "O thef, is this a mannes herte?"
	And of he rente al to his bare sherte,
1100	And seyde, "Nece, but ye helpe us now,
	Allas, youre owen Troilus is lorn!"
	"Iwis, so wolde I, and I wiste how,
	Ful fayn," quod she. "Allas, that I was born"!
	"Yee, nece, wol ye pullen out the thorn
1105	That stiketh in his herte?" quod Pandare.
	"Sey `Al foryeve,' and stynt is al this fare!"
	"Ye, that to me," quod she, "ful levere were
	Than al the good the sonne aboute gooth."
	And therwithal she swor hym in his ere,
1110	"Iwys, my deere herte, I am nought wroth,
	Have here my trouthe!" -- and many an other oth.
	"Now speke to me, for it am I, Criseyde!"
	But al for nought; yit myght he nought abreyde.
	Therwith his pous and paumes of his hondes
1115	They gan to frote, and wete his temples tweyne;
	And to deliveren hym fro bittre bondes
	She ofte hym kiste; and shortly for to seyne,
	Hym to revoken she did al hire peyne;
	And at the laste, he gan his breth to drawe,
1120	And of his swough sone after that adawe,
	And gan bet mynde and reson to hym take,
	But wonder soore he was abayst, iwis;
	And with a sik, whan he gan bet awake,
	He seyde, "O mercy, God, what thyng is this?"
1125	"Why do ye with youreselven thus amys?"
	Quod tho Criseyde, "Is this a mannes game?
	What, Troilus, wol ye do thus for shame?"
	And therwithal hire arm over hym she leyde,
	And al foryaf, and ofte tyme hym keste.
1130	He thonked hire, and to hire spak, and seyde
	As fil to purpos for his herte reste;
	And she to that answerde hym as hire leste,
	And with hire goodly wordes hym disporte
	She gan, and ofte his sorwes to comforte.
1135	Quod Pandarus, "For aught I kan aspien,
	This light, nor I, ne serven here of nought.
	Light is nought good for sike folkes yen!
	But, for the love of God, syn ye ben brought
	In thus good plit, lat now no hevy thought
1140	Ben hangyng in the hertes of yow tweye" --
	And bar the candel to the chymeneye.
	Soone after this, though it no nede were,
	Whan she swiche othes as hire leste devyse
	Hadde of hym take, hire thoughte tho no fere,
1145	Ne cause ek non to bidde hym thennes rise.
	Yet lasse thyng than othes may suffise
	In many a cas, for every wyght, I gesse,
	That loveth wel, meneth but gentilesse.
	But in effect she wolde wite anon
1150	Of what man, and ek wheer, and also why
	He jalous was, syn ther was cause non;
	And ek the sygne that he took it by,
	She badde hym that to telle hire bisily,
	Or elles, certeyn, she bar hym on honde
1155	That this was don of malice, hire to fonde.
	Withouten more, shortly for to seyne,
	He most obeye unto his lady heste;
	And for the lasse harm, he moste feyne.
	He seyde hire, whan she was at swich a feste,
1160	She myght on hym han loked at the leste --
	Noot I nought what, al deere ynough a rysshe,
	As he that nedes most a cause fisshe.
	And she answerde, "Swete, al were it so,
	What harm was that, syn I non yvel mene?
1165	For, by that God that bought us bothe two,
	In alle thyng is myn entente cleene.
	Swiche argumentes ne ben naught worth a beene.
	Wol ye the childissh jalous contrefete?
	Now were it worthi that ye were ybete."
1170	Tho Troilus gan sorwfully to sike --
	Lest she be wroth, hym thoughte his herte deyde --
	And seyde, "Allas, upon my sorwes sike
	Have mercy, swete herte myn, Criseyde!
	And if that in tho wordes that I seyde
1175	Be any wrong, I wol no more trespace.
	Doth what yow list; I am al in youre grace."
	And she answerde, "Of gilt misericorde!
	That is to seyn, that I foryeve al this;
	And evere more on this nyght yow recorde,
1180	And beth wel war ye do namore amys."
	"Nay, dere herte myn," quod he, "iwys!"
	"And now," quod she, "that I have don yow smerte,
	Foryeve it me, myn owene swete herte."
	This Troilus, with blisse of that supprised,
1185	Putte al in Goddes hand, as he that mente
	Nothing but wel; and sodeynly avysed,
	He hire in armes faste to hym hente.
	And Pandarus with a ful good entente
	Leyde hym to slepe, and seyde, "If ye be wise,
1190	Swouneth nought now, lest more folk arise!"
	What myghte or may the sely larke seye,
	Whan that the sperhauk hath it in his foot?
	I kan namore; but of thise ilke tweye --
	To whom this tale sucre be or soot --
1195	Though that I tarie a yer, somtyme I moot,
	After myn auctour, tellen hire gladnesse,
	As wel as I have told hire hevynesse.
	Criseyde, which that felte hire thus itake,
	As writen clerkes in hire bokes olde,
1200	Right as an aspes leef she gan to quake,
	Whan she hym felte hire in his armes folde.
	But Troilus, al hool of cares colde,
	Gan thanken tho the bryghte goddes sevene;
	Thus sondry peynes bryngen folk in hevene.
1205	This Troilus in armes gan hire streyne,
	And seyde, "O swete, as evere mot I gon,
	Now be ye kaught; now is ther but we tweyne!
	Now yeldeth yow, for other bote is non!"
	To that Criseyde answerde thus anon,
1210	"Ne hadde I er now, my swete herte deere,
	Ben yolde, ywis, I were now nought heere!"
	O, sooth is seyd, that heled for to be
	As of a fevre or other gret siknesse,
	Men moste drynke, as men may ofte se,
1215	Ful bittre drynke; and for to han gladnesse
	Men drynken ofte peyne and gret distresse --
	I mene it here, as for this aventure,
	That thorugh a peyne hath founden al his cure.
	And now swetnesse semeth more swete,
1220	That bitternesse assaied was byforn;
	For out of wo in blisse now they flete;
	Non swich they felten sithen they were born.
	Now is this bet than bothe two be lorn.
	For love of God, take every womman heede
1225	To werken thus, if it comth to the neede.
	Criseyde, al quyt from every drede and tene,
	As she that juste cause hadde hym to triste,
	Made hym swych feste it joye was to sene,
	Whan she his trouthe and clene entente wiste;
1230	And as aboute a tree, with many a twiste,
	Bytrent and writh the swote wodebynde,
	Gan ech of hem in armes other wynde.
	And as the newe abaysed nyghtyngale,
	That stynteth first whan she bygynneth to synge,
1235	Whan that she hereth any herde tale,
	Or in the hegges any wyght stirynge,
	And after siker doth hire vois out rynge,
	Right so Criseyde, whan hire drede stente,
	Opned hire herte and tolde hym hire entente.
1240	And right as he that seth his deth yshapen,
	And dyen mot, in ought that he may gesse,
	And sodeynly rescous doth hym escapen,
	And from his deth is brought in sykernesse,
	For al this world, in swych present gladnesse
1245	Was Troilus, and hath his lady swete.
	With worse hap God lat us nevere mete!
	Hire armes smale, hire streghte bak and softe,
	Hire sydes longe, flesshly, smothe, and white
	He gan to stroke, and good thrift bad ful ofte
1250	Hire snowissh throte, hire brestes rounde and lite.
	Thus in this hevene he gan hym to delite,
	And therwithal a thousand tyme hire kiste,
	That what to don, for joie unnethe he wiste.
	Than seyde he thus: "O Love, O Charite!
1255	Thi moder ek, Citheria the swete,
	After thiself next heried be she --
	Venus mene I, the wel-willy planete! --
	And next that, Imeneus, I the grete,
	For nevere man was to yow goddes holde
1260	As I, which ye han brought fro cares colde.
	"Benigne Love, thow holy bond of thynges,
	Whoso wol grace and list the nought honouren,
	Lo, his desir wol fle withouten wynges;
	For noldestow of bownte hem socouren
1265	That serven best and most alwey labouren,
	Yet were al lost, that dar I wel seyn, certes,
	But if thi grace passed oure desertes.
	"And for thow me, that koude leest disserve
	Of hem that noumbred ben unto thi grace,
1270	Hast holpen, ther I likly was to sterve,
	And me bistowed in so heigh a place
	That thilke boundes may no blisse pace,
	I kan namore; but laude and reverence
	Be to thy bounte and thyn excellence!"
1275	And therwithal Criseyde anon he kiste,
	Of which certein she felte no disese,
	And thus seyde he: "Now wolde God I wiste,
	Myn herte swete, how I yow myght plese!
	What man," quod he, "was evere thus at ese
1280	As I, on which the faireste and the beste
	That evere I say deyneth hire herte reste?
	"Here may men seen that mercy passeth right;
	Th' experience of that is felt in me,
	That am unworthi to so swete a wight.
1285	But herte myn, of youre benignite,
	So thynketh, though that I unworthi be,
	Yet mot I nede amenden in som wyse,
	Right thorugh the vertu of youre heigh servyse.
	"And for the love of God, my lady deere,
1290	Syn God hath wrought me for I shall yow serve --
	As thus I mene: he wol ye be my steere,
	To do me lyve, if that yow liste, or sterve --
	So techeth me how that I may disserve
	Youre thonk, so that I thorugh myn ignoraunce
1295	Ne do no thyng that yow be displesaunce.
	"For certes, fresshe wommanliche wif,
	This dar I seye, that trouth and diligence,
	That shal ye fynden in me al my lif;
	N' y wol nat, certein, breken youre defence;
1300	And if I do, present or in absence,
	For love of God, lat sle me with the dede,
	If that it like unto youre wommanhede."
	"Iwys," quod she, "myn owen hertes list,
	My ground of ese, and al myn herte deere,
1305	Gramercy, for on that is al my trist!
	But lat us falle awey fro this matere,
	For it suffiseth, this that seyd is heere,
	And at o word, withouten repentaunce,
	Welcome, my knyght, my pees, my suffisaunce!"
1310	Of hire delit or joies oon the leeste
	Were impossible to my wit to seye;
	But juggeth ye that han ben at the feste
	Of swich gladnesse, if that hem liste pleye!
	I kan namore, but thus thise ilke tweye
1315	That nyght, bitwixen drede and sikernesse,
	Felten in love the grete worthynesse.
	O blisful nyght, of hem so longe isought,
	How blithe unto hem bothe two thow weere!
	Why nad I swich oon with my soule ybought,
1320	Ye, or the leeste joie that was theere?
	Awey, thow foule daunger and thow feere,
	And lat hem in this hevene blisse dwelle,
	That is so heigh that al ne kan I telle!
	But sooth is, though I kan nat tellen al,
1325	As kan myn auctour, of his excellence,
	Yet have I seyd, and God toforn, and shal
	In every thyng, al holly his sentence;
	And if that ich, at Loves reverence,
	Have any word in eched for the beste,
1330	Doth therwithal right as youreselven leste.
	For myne wordes, heere and every part,
	I speke hem alle under correccioun
	Of yow that felyng han in loves art,
	And putte it al in youre discrecioun
1335	To encresse or maken dymynucioun
	Of my langage, and that I yow biseche.
	But now to purpos of my rather speche.
	Thise ilke two, that ben in armes laft,
	So loth to hem asonder gon it were,
1340	That ech from other wenden ben biraft,
	Or elles -- lo, this was hir mooste feere --
	That al this thyng but nyce dremes were;
	For which ful ofte ech of hem seyde, "O swete,
	Clippe ich yow thus, or elles I it meete?"
1345	And Lord! So he gan goodly on hire se
	That nevere his look ne bleynte from hire face,
	And seyde, "O deere herte, may it be
	That it be soth, that ye ben in this place?"
	"Yee, herte myn, God thank I of his grace,"
1350	Quod tho Criseyde, and therwithal hym kiste,
	That where his spirit was, for joie he nyste.
	This Troilus ful ofte hire eyen two
	Gan for to kisse, and seyde, "O eyen clere,
	It weren ye that wroughte me swich wo,
1355	Ye humble nettes of my lady deere!
	Though ther be mercy writen in youre cheere,
	God woot, the text ful hard is, soth, to fynde!
	How koude ye withouten bond me bynde?"
	Therwith he gan hire faste in armes take,
1360	And wel a thousand tymes gan he syke --
	Naught swiche sorwfull sikes as men make
	For wo, or elles when that folk ben sike,
	But esy sykes, swiche as ben to like,
	That shewed his affeccioun withinne;
1365	Of swiche sikes koude he nought bilynne.
	Soone after this they spake of sondry thynges,
	As fel to purpos of this aventure,
	And pleyinge entrechaungeden hire rynges,
	Of whiche I kan nought tellen no scripture;
1370	But wel I woot, a broche, gold and asure,
	In which a ruby set was lik an herte,
	Criseyde hym yaf, and stak it on his sherte.
	Lord, trowe ye a coveytous or a wrecche,
	That blameth love and halt of it despit,
1375	That of tho pens that he kan mokre and kecche
	Was evere yit yyeven hym swich delit
	As is in love, in o poynt, in som plit?
	Nay, douteles, for also God me save,
	So perfit joie may no nygard have.
1380	They wol seyn "Yis," but Lord, so they lye,
	Tho besy wrecches, ful of wo and drede!
	Thei callen love a woodnesse or folie,
	But it shall falle hem as I shal yow rede:
	They shal forgon the white and ek the rede,
1385	And lyve in wo, ther God yeve hem meschaunce,
	And every lovere in his trouthe avaunce!
	As wolde God tho wrecches that dispise
	Servise of love hadde erys also longe
	As hadde Mida, ful of coveytise,
1390	And therto dronken hadde as hoot and stronge
	As Crassus did for his affectis wronge,
	To techen hem that they ben in the vice,
	And loveres nought, although they holde hem nyce.
	Thise ilke two of whom that I yow seye,
1395	Whan that hire hertes wel assured were,
	Tho gonne they to speken and to pleye,
	And ek rehercen how, and whan, and where
	Thei knewe hem first, and every wo and feere
	That passed was; but al swich hevynesse --
1400	I thank it God -- was torned to gladnesse.
	And evere mo, when that hem fel to speke
	Of any wo of swich a tyme agoon,
	With kissyng al that tale sholde breke
	And fallen in a newe joye anoon;
1405	And diden al hire myght, syn they were oon,
	For to recoveren blisse and ben at eise,
	And passed wo with joie contrepeise.
	Resoun wol nought that I speke of slep,
	For it acordeth nought to my matere.
1410	God woot, they took of that ful litel kep!
	But lest this nyght, that was to hem so deere,
	Ne sholde in veyn escape in no manere,
	It was byset in joie and bisynesse
	Of al that souneth into gentilesse.
1415	But whan the cok, comune astrologer,
	Gan on his brest to bete and after crowe,
	And Lucyfer, the dayes messager,
	Gan for to rise and out hire bemes throwe,
	And estward roos -- to hym that koude it knowe --
1420	Fortuna Major, that anoon Criseyde,
	With herte soor, to Troilus thus seyde:
	"Myn hertes lif, my trist, al my plesaunce,
	That I was born, allas, what me is wo,
	That day of us moot make disseveraunce!
1425	For tyme it is to ryse and hennes go,
	Or ellis I am lost for evere mo!
	O nyght, allas, why nyltow over us hove
	As longe as whan Almena lay by Jove?
	"O blake nyght, as folk in bokes rede,
1430	That shapen art by God this world to hide
	At certeyn tymes wyth thi derke wede,
	That under that men myghte in reste abide,
	Wel oughten bestes pleyne and folk the chide,
	That there as day wyth labour wolde us breste,
1435	That thow thus fleest, and deynest us nought reste.
	"Thow doost, allas, to shortly thyn office,
	Thow rakle nyght! Ther God, maker of kynde,
	The, for thyn haste and thyn unkynde vice,
	So faste ay to oure hemysperie bynde
1440	That nevere more under the ground thow wynde!
	For now, for thow so hiest out of Troie,
	Have I forgon thus hastili my joie!"
	This Troilus, that with tho wordes felte,
	As thoughte hym tho, for pietous distresse
1445	The blody teris from his herte melte,
	As he that nevere yet swich hevynesse
	Assayed hadde, out of so gret gladnesse,
	Gan therwithal Criseyde, his lady deere,
	In armes streyne, and seyde in this manere:
1450	"O cruel day, accusour of the joie
	That nyght and love han stole and faste iwryen,
	Acorsed be thi comyng into Troye,
	For every bore hath oon of thi bryghte yen!
	Envyous day, what list the so to spien?
1455	What hastow lost? Why sekestow this place?
	Ther God thi light so quenche, for his grace!
	"Allas, what have thise loveris the agylt,
	Dispitous day? Thyn be the peyne of helle!
	For many a lovere hastow slayn, and wilt;
1460	Thy pourynge in wol nowher lat hem dwelle.
	What profrestow thi light here for to selle?
	Go selle it hem that smale selys grave;
	We wol the nought; us nedeth no day have."
	And ek the sonne, Titan, gan he chide,
1465	And seyde, "O fool, wel may men the dispise,
	That hast the dawyng al nyght by thi syde,
	And suffrest hire so soone up fro the rise
	For to disese loveris in this wyse.
	What, holde youre bed ther, thow, and ek thi Morwe!
1470	I bidde God, so yeve yow bothe sorwe!"
	Therwith ful soore he syghte, and thus he seyde:
	"My lady right, and of my wele or wo
	The welle and roote, O goodly myn Criseyde,
	And shal I rise, allas, and shal I so?
1475	Now fele I that myn herte moot a-two,
	For how sholde I my lif an houre save,
	Syn that with yow is al the lif ich have?
	"What shal I don? For, certes, I not how,
	Ne whan, allas, I shal the tyme see
1480	That in this plit I may ben eft with yow;
	And of my lif, God woot how that shal be,
	Syn that desir right now so streyneth me
	That I am ded anon, but I retourne.
	How sholde I longe, allas, fro yow sojourne?
1485	"But natheles, myn owen lady bright,
	Were it so that I wiste outrely
	That I, youre humble servant and youre knyght,
	Were in youre herte iset so fermely
	As ye in myn -- the which thyng, trewely,
1490	Me levere were than thise worldes tweyne --
	Yet sholde I bet enduren al my peyne."
	To that Criseyde answerde right anon,
	And with a sik she seyde, "O herte deere,
	The game, ywys, so ferforth now is gon
1495	That first shal Phebus fallen fro his speere,
	And everich egle ben the dowves feere,
	And everich roche out of his place sterte,
	Er Troilus oute of Criseydes herte.
	"Ye ben so depe in-with myn herte grave,
1500	That, though I wolde it torne out of my thought,
	As wisly verray God my soule save,
	To dyen in the peyne, I koude nought.
	And, for the love of God that us hath wrought,
	Lat in youre brayn non other fantasie
1505	So crepe that it cause me to dye!
	"And that ye me wolde han as faste in mynde
	As I have yow, that wolde I yow biseche;
	And if I wiste sothly that to fynde,
	God myghte nought a poynt my joies eche.
1510	But herte myn, withouten more speche,
	Beth to me trewe, or ellis were it routhe,
	For I am thyn, by God and by my trouthe!
	"Beth glad, forthy, and lyve in sikernesse!
	Thus seyde I nevere er this, ne shal to mo;
1515	And if to yow it were a gret gladnesse
	To torne ayeyn soone after that ye go,
	As fayn wolde I as ye that it were so,
	As wisly God myn herte brynge at reste!"
	And hym in armes tok, and ofte keste.
1520	Agayns his wil, sith it mot nedes be,
	This Troilus up ros, and faste hym cledde,
	And in his armes took his lady free
	An hondred tyme, and on his wey hym spedde;
	And with swich voys as though his herte bledde,
1525	He seyde, "Farwel, dere herte swete;
	Ther God us graunte sownde and soone to mete!"
	To which no word for sorwe she answerde,
	So soore gan his partyng hire distreyne;
	And Troilus unto his paleys ferde,
1530	As wo-bygon as she was, soth to seyne.
	So harde hym wrong of sharp desir the peyne
	For to ben eft there he was in plesaunce,
	That it may nevere out of his remembraunce.
	Retorned to his real paleys soone,
1535	He softe into his bed gan for to slynke,
	To slepe longe, as he was wont to doone.
	But al for nought; he may wel ligge and wynke,
	But slep ne may ther in his herte synke,
	Thynkyng how she for whom desir hym brende
1540	A thousand fold was worth more than he wende.
	And in his thought gan up and down to wynde
	Hire wordes alle, and every countenaunce,
	And fermely impressen in his mynde
	The leeste point that to him was plesaunce;
1545	And verraylich of thilke remembraunce
	Desir al newe hym brende, and lust to brede
	Gan more than erst, and yet took he non hede.
	Criseyde also, right in the same wyse,
	Of Troilus gan in hire herte shette
1550	His worthynesse, his lust, his dedes wise,
	His gentilesse, and how she with hym mette,
	Thonkyng Love he so wel hire bisette,
	Desiryng eft to han hire herte deere
	In swich a plit, she dorste make hym cheere.
1555	Pandare, o-morwe, which that comen was
	Unto his nece and gan hire faire grete,
	Seyde, "Al this nyght so reyned it, allas,
	That al my drede is that ye, nece swete,
	Han litel laiser had to slepe and mete.
1560	Al nyght," quod he, "hath reyn so do me wake,
	That som of us, I trowe, hire hedes ake."
	And ner he com, and seyde, "How stant it now
	This mury morwe? Nece, how kan ye fare?"
	Criseyde answerde, "Nevere the bet for yow,
1565	Fox that ye ben! God yeve youre herte kare!
	God help me so, ye caused al this fare,
	Trowe I," quod she, "for al youre wordes white.
	O, whoso seeth yow knoweth yow ful lite."
	With that she gan hire face for to wrye
1570	With the shete, and wax for shame al reed;
	And Pandarus gan under for to prie,
	And seyde, "Nece, if that I shal be ded,
	Have here a swerd and smyteth of myn hed!"
	With that his arm al sodeynly he thriste
1575	Under hire nekke, and at the laste hire kyste.
	I passe al that which chargeth nought to seye.
	What! God foryaf his deth, and she al so
	Foryaf, and with here uncle gan to pleye,
	For other cause was ther noon than so.
1580	But of this thing right to the effect to go:
	Whan tyme was, hom til here hous she wente,
	And Pandarus hath fully his entente.
	Now torne we ayeyn to Troilus,
	That resteles ful longe abedde lay,
1585	And pryvely sente after Pandarus,
	To hym to com in al the haste he may.
	He com anon -- nought ones seyde he nay --
	And Troilus ful sobrely he grette,
	And down upon his beddes syde hym sette.
1590	This Troilus, with al th' affeccioun
	Of frendes love that herte may devyse,
	To Pandarus on knowes fil adown,
	And er that he wolde of the place arise
	He gan hym thonken in his beste wise
1595	An hondred sythe, and gan the tyme blesse
	That he was born, to brynge hym fro destresse.
	He seyde, "O frend of frendes the alderbeste
	That evere was, the sothe for to telle,
	Thow hast in hevene ybrought my soule at reste
1600	Fro Flegitoun, the fery flood of helle,
	That, though I myght a thousand tymes selle
	Upon a day my lif in thi servise,
	It myghte naught a moote in that suffise.
	"The sonne, which that al the world may se,
1605	Saugh nevere yet my lif, that dar I leye,
	So inly fair and goodly as is she
	Whos I am al, and shal, tyl that I deye.
	And that I thus am hires, dar I seye,
	That thanked be the heighe worthynesse
1610	Of Love, and ek thi kynde bysynesse.
	"Thus hastow me no litel thing yyive,
	For which to the obliged be for ay
	My lif. And whi? For thorugh thyn help I lyve,
	Or elles ded hadde I ben many a day."
1615	And with that word down in his bed he lay,
	And Pandarus ful sobrely hym herde
	Tyl al was seyd, and than he thus answerde:
	"My deere frend, if I have don for the
	In any cas, God wot, it is me lief,
1620	And am as glad as man may of it be,
	God help me so; but tak now nat a-grief
	That I shal seyn: be war of this meschief,
	That, there as thow now brought art in thy blisse,
	That thow thiself ne cause it nat to misse.
1625	"For of fortunes sharpe adversitee
	The worste kynde of infortune is this,
	A man to han ben in prosperitee,
	And it remembren whan it passed is.
	Th' art wis ynough; forthi do nat amys:
1630	Be naught to rakel, theigh thow sitte warme,
	For if thow be, certeyn it wol the harme.
	"Thow art at ese, and hold the wel therinne;
	For also seur as reed is every fir,
	As gret a craft is kepe wel as wynne.
1635	Bridle alwey wel thi speche and thi desir,
	For worldly joie halt nought but by a wir.
	That preveth wel, it brest al day so ofte;
	Forthi nede is to werken with it softe."
	Quod Troilus, "I hope, and God toforn,
1640	My deere frend, that I shal so me beere
	That in my gylt ther shal nothyng be lorn,
	N' y nyl nought rakle as for to greven heere.
	It nedeth naught this matere ofte stere;
	For wystestow myn herte wel, Pandare,
1645	God woot, of this thow woldest litel care."
	Tho gan he telle hym of his glade nyght,
	And wherof first his herte dred, and how,
	And seyde, "Frend, as I am trewe knyght,
	And by that feyth I shal to God and yow,
1650	I hadde it nevere half so hote as now;
	And ay the more that desir me biteth
	To love hire best, the more it me deliteth.
	"I not myself naught wisly what it is,
	But now I feele a newe qualitee --
1655	Yee, al another than I dide er this."
	Pandare answerd, and seyde thus, that "he
	That ones may in hevene blisse be,
	He feleth other weyes, dar I leye,
	Than thilke tyme he first herde of it seye."
1660	This is o word for al: this Troilus
	Was nevere ful to speke of this matere,
	And for to preisen unto Pandarus
	The bounte of his righte lady deere,
	And Pandarus to thanke and maken cheere.
1665	This tale ay was span-newe to bygynne,
	Til that the nyght departed hem atwynne.
	Soon after this, for that Fortune it wolde,
	Icomen was the blisful tyme swete
	That Troilus was warned that he sholde,
1670	There he was erst, Criseyde his lady mete,
	For which he felte his herte in joie flete
	And feithfully gan alle the goddes herie.
	And lat se now if that he kan be merie!
	And holden was the forme and al the wise
1675	Of hire commyng, and of his also,
	As it was erst, which nedeth nought devyse.
	But pleynly to th' effect right for to go:
	In joie and suerte Pandarus hem two
	Abedde brought, whan that hem bothe leste,
1680	And thus they ben in quyete and in reste.
	Nought nedeth it to yow, syn they ben met,
	To axe at me if that they blithe were;
	For if it erst was wel, tho was it bet
	A thousand fold; this nedeth nought enquere.
1685	Ago was every sorwe and every feere;
	And bothe, ywys, they hadde, and so they wende,
	As muche joie as herte may comprende.
	This is no litel thyng of for to seye;
	This passeth every wit for to devyse;
1690	For ech of hem gan otheres lust obeye.
	Felicite, which that thise clerkes wise
	Comenden so, ne may nought here suffise;
	This joie may nought writen be with inke;
	This passeth al that herte may bythynke.
1695	But cruel day -- so wailaway the stounde! --
	Gan for t' aproche, as they by sygnes knewe,
	For which hem thoughte feelen dethis wownde.
	So wo was hem that chaungen gan hire hewe,
	And day they gonnen to despise al newe,
1700	Callyng it traitour, envyous, and worse,
	And bitterly the dayes light thei corse.
	Quod Troilus, "Allas, now am I war
	That Piros and tho swifte steedes thre,
	Which that drawen forth the sonnes char,
1705	Han gon som bi-path in dispit of me;
	That maketh it so soone day to be;
	And for the sonne hym hasteth thus to rise,
	Ne shal I nevere don hire sacrifise."
	But nedes day departe hem moste soone,
1710	And whan hire speche don was and hire cheere,
	They twynne anon, as they were wont to doone,
	And setten tyme of metyng eft yfeere;
	And many a nyght they wroughte in this manere,
	And thus Fortune a tyme ledde in joie
1715	Criseyde and ek this kynges sone of Troie.
	In suffisaunce, in blisse, and in singynges,
	This Troilus gan al his lif to lede.
	He spendeth, jousteth, maketh festeynges;
	He yeveth frely ofte, and chaungeth wede,
1720	And held aboute hym alwey, out of drede,
	A world of folk, as com hym wel of kynde,
	The fresshest and the beste he koude fynde;
	That swich a vois was of hym and a stevene,
	Thorughout the world, of honour and largesse,
1725	That it up rong unto the yate of hevene;
	And, as in love, he was in swich gladnesse
	That in his herte he demed, as I gesse,
	That ther nys lovere in this world at ese
	So wel as he; and thus gan love hym plese.
1730	The goodlihede or beaute which that kynde
	In any other lady hadde yset
	Kan nought the montance of a knotte unbynde
	Aboute his herte of al Criseydes net.
	He was so narwe ymasked and yknet,
1735	That it undon on any manere syde,
	That nyl naught ben, for aught that may bitide.
	And by the hond ful ofte he wolde take
	This Pandarus, and into gardyn lede,
	And swich a feste and swich a proces make
1740	Hym of Criseyde, and of hire wommanhede,
	And of hire beaute, that withouten drede
	It was an hevene his wordes for to here;
	And thanne he wolde synge in this manere:

Canticus Troili.

	"Love, that of erthe and se hath governaunce,
1745	Love, that his hestes hath in hevene hye,
	Love, that with an holsom alliaunce
	Halt peples joyned, as hym lest hem gye,
	Love, that knetteth lawe of compaignie,
	And couples doth in vertu for to dwelle,
1750	Bynd this acord, that I have told and telle.
	"That, that the world with feith which that is stable
	Diverseth so his stowndes concordynge,
	That elementz that ben so discordable
	Holden a bond perpetuely durynge,
1755	That Phebus mote his rosy day forth brynge,
	And that the mone hath lordshipe over the nyghtes:
	Al this doth Love, ay heried be his myghtes! --
	"That, that the se, that gredy is to flowen,
	Constreyneth to a certeyn ende so
1760	His flodes that so fiersly they ne growen
	To drenchen erthe and al for evere mo;
	And if that Love aught lete his bridel go,
	Al that now loveth asondre sholde lepe,
	And lost were al that Love halt now to-hepe.
1765	"So wolde God, that auctour is of kynde,
	That with his bond Love of his vertu liste
	To cerclen hertes alle and faste bynde,
	That from his bond no wight the wey out wiste;
	And hertes colde, hem wolde I that he twiste
1770	To make hem love, and that hem liste ay rewe
	On hertes sore, and kepe hem that ben trewe!"
	In alle nedes for the townes werre
	He was, and ay, the first in armes dyght,
	And certeynly, but if that bokes erre,
1775	Save Ector most ydred of any wight;
	And this encrees of hardynesse and myght
	Com hym of love, his ladies thank to wynne,
	That altered his spirit so withinne.
	In tyme of trewe, on haukyng wolde he ride,
1780	Or elles honte boor, beer, or lyoun;
	The smale bestes leet he gon biside.
	And whan that he com ridyng into town,
	Ful ofte his lady from hire wyndow down,
	As fressh as faukoun comen out of muwe,
1785	Ful redy was hym goodly to saluwe.
	And moost of love and vertu was his speche,
	And in despit hadde alle wrecchednesse;
	And douteles, no nede was hym biseche
	To honouren hem that hadde worthynesse,
1790	And esen hem that weren in destresse;
	And glad was he if any wyght wel ferde,
	That lovere was, whan he it wiste or herde.
	For soth to seyne, he lost held every wyght,
	But if he were in Loves heigh servise --
1795	I mene folk that oughte it ben of right.
	And over al this, so wel koude he devyse
	Of sentement and in so unkouth wise
	Al his array, that every lovere thoughte
	That al was wel, what so he seyde or wroughte.
1800	And though that he be come of blood roial,
	Hym liste of pride at no wight for to chace;
	Benigne he was to ech in general,
	For which he gat hym thank in every place.
	Thus wolde Love -- yheried be his grace! --
1805	That Pride, Envye, Ire, and Avarice
	He gan to fle, and everich other vice.
	Thow lady bryght, the doughter to Dyone,
	Thy blynde and wynged sone ek, daun Cupide,
	Yee sustren nyne ek, that by Elicone
1810	In hil Pernaso listen for t' abide,
	That ye thus fer han deyned me to gyde --
	I kan namore, but syn that ye wol wende,
	Ye heried ben for ay withouten ende!
	Thorugh yow have I seyd fully in my song
1815	Th' effect and joie of Troilus servise,
	Al be that ther was som disese among,
	As to myn auctour listeth to devise.
	My thridde bok now ende ich in this wyse,
	And Troilus in lust and in quiete
1820	Is with Criseyde, his owen herte swete.

Explicit liber tercius.

Site Updated March 31, 2011